ޑޮލަރު ކުރިމަތީ ދިވެހި ރުފިޔާގެ ބާރުގަދަކުރުމުގެ މަސައްކަތް މިދަނީ ކުރަމުން: ސަޢީދު

ޑޮލަރުގެ ކުރިމަތީ ދިވެހި ރުފިޔާއަކީ ބާރު ލިބިގެންވާ ފައިސާއަކަށް ހެދުމުގެ މަސައްކަތް ކުރަމުންދާކަމަށް އިޤްތިޞާދީ ތަރައްޤީއާއިބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، ރާއްޖޭގެ ޙާއްސަ އިޤްތިޞާދީ ސަރަޙައްދުތައް ތަރައްޤީކުރަން ދުބާއީ ކުންފުންޏަކާއި ހަވާލުކުރުމުގެ އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. އެގޮތުން ވަޒީރު ވަނީ ރާއްޖޭގެ އިޤްތިޞާދާއި މާލީ ސިނާޢަތް ކުރިއެރުވުމަށް ކުރަމުންދާ ބައެއް މަސައްކަތްތަކަށް އަލިއަޅުވާލައްވާފައެވެ.

މި ރަސްމިއްޔާތުގައި ވަޒީރު ސަޢީދު ވިދާޅުވީ، ރާއްޖޭގެ ބޭރު ފައިސާގެ ބާޒާރުގައި ހުރި މައްސަލަތައް ހައްލުކުރުމުގެ މަސައްކަތް މިހާރު ސަރުކާރުން ކުރަމުންދާ ކަމަށެވެ. އެގޮތުން ދިވެހި ރުފިޔާ ޑޮލަރު ކުރިމަތީ ބާރުވެރިކުރުމަށް މަސައްކަތް ކުރައްވަމުންދާކަން ވަޒީރު ފާހަގަކުރެއްވިއެވެ. އަދި މިކަން ކުރަނީ ދުނިޔޭގެ ބޮޑެތި މާކެޓްތަކާގުޅިގެންކަމަށްވެސް ވަޒީރު ވިދާޅުވިއެވެ.

"ރާއްޖެއަށް ފޮރިން ކަރަންސީ، ފޮރިން އެކްސްޗޭންޖުގައި ހުރި މައްސަލަތައް ހައްލު ކުރެވި، އިރާދަކުރެއްވިއްޔާ ރުފިޔާއަކީ ޑޮލަރުގެ ކުރިމަތީގައި ބާރު ލިބިގެންވާ ކަރަންސީއަކަށް ހެދުމަށް ކުރަން ޖެހޭ މަސައްކަތްތައް އެބަކުރަން. އޭގެ ތެރޭގައި ބޮޑެތި މާކެޓުތައް ކަމަށްވާ ޗައިނާއާއި އިންޑިއާއެކު ވަރަށް ބާރަށް މަސައްކަތް ކުރިއަށް އެބަ ގެންދަން." ވަޒީރު ސައީދު ވިދާޅުވިއެވެ.

މިހުރިހާ މަސައްކަތެއްގެ ނަތީޖާ ކުރިއަށް އޮތް 5 އަހަރު ތެރޭގައި ފެނިގެންދާނެ ކަމަށް އުއްމީދު ކުރައްވާކަމަށް ވަޒީރު ސައީދު ވިދާޅުވިއެވެ.

ރާއްޖޭގެ ބޭރު ފައިސާގެ ބާޒާރުގައި ހުރި މައްސަލަތައް ހައްލުކުރުމަށް ސަރުކާރުން މަސައްކަތް ކުރަމުންދާއިރު ކުރިއަށް އޮތް ޖުލައި މަހު އެމެރިކާ އަދި އިނގިރޭސިވިލާތަށް ސަރުކާރުގެ ވަފުދެއް ދަތުރުކުރުމަށް ވަނީ ހަމަޖެހިފައެވެ. މީގެ ބޭނުމަކީ ޔޫކޭ ފަދަ މާލީ ގޮތުން ކުރިއަރައި ތަޖުރިބާ ލިބިފައިވާ މާކެޓުތަކުގެ ތަޖުރިބާ ހޯދައި، އަދި އެމެރިކާގެ އެހީގައި ރާއްޖޭގެ ފިންޓެކް ނިޒާމު ހަރުދަނާ ކުރުން ކަމަށް އިޤްތިޞާދީ ތަރައްޤީއާއި ބެހޭ ވުޒާރާއިން ވިދާޅުވެއެވެ.