މުދަލު ޒަކާތަކީ، އިސްލާމް ދީނުގެ ރުކުނެއްކަމަށްވާއިރު، ދިވެހި ސަރުކާރުން މަސައްކަތްކުރައްވަނީ އިސްލާމް ދީނުގައި އޮތް ގޮތަށް ޒަކާތް ނެންގެވުންކަމަށް އިސްލާމިކް މިނިސްޓަރ ޑރ. އަޙުމަދު ޒިޔާދު ވިދާޅުވެއްޖެއެވެ. ޒިޔާދު ވިދާޅުވީ ރާއްޖޭގައި ޒަކާތް ދައްކަންޖެހޭ މީހުންގެ ތެރެއިން ޒަކާތް ދައްކަނީ، މަދު ބަޔަކަށްވުމަކީ ވެގެންވާނެ ގޮތެއް ނޫންކަމަށެވެ.
މުދަލު ޒަކާތަކީ އިސްލާމް ދީނުގެ ރުކުންތަކުގެ ތެރެއިން އެއް ރުކުނެވެ. ކަނޑައެޅިފައިވާ ނިސާބު ހަމަވާވަރަށް މުދާ ނުވަތަ ފައިސާ ހުރި ކޮންމެ މުސްލިމެއްގެ މައްޗަށް ޒަކާތް ދެއްކުން ވާޖިބުވެގެންވެއެވެ. ރާއްޖޭގެ އިސްލާމިކް މިނިސްޓްރީން މިހާރު އިޢުލާންކުރައްވާފައިވާ ގޮތުގައި، ރާއްޖޭގައި މިހާރުގެ ޒަކާތުގެ ނިޞާބަކީ، ހަތަރުހާސް ބާރަ ރުފިޔާ ފަސްދޮޅަސް ލާރިއެވެ. މި ޒަކާތަކީ ކޮންމެ އަހަރަކު އެއްފަހަރު ދައްކަންޖެހޭ އެއްޗެކެވެ.
އިސްލާމިކް މިނިސްޓަރ ޑރ. އަޙުމަދު ޒިޔާދު ވިދާޅުވީ ރާއްޖޭގައި ތިބި މުދަލު ޒަކާތް ދައްކަންޖެހޭ މީހުންގެ ތެރެއިން މުދަކު ޒަކާތް ދައްކަނީ ދިހައެއް އިންސައްތަ މީހުންކަމަށެވެ. އެހެންނަމަވެސް އެކަން އެގޮތަށް ދޫކޮށްނުލައްވާ، ދައުލަތުން މި ޒަކާތް އިސްލާމް ދީނުގައިވާ ގޮތުގެ މަތީން ނަންގަވާނެކަމަށް މިނިސްޓަރ ވިދާޅުވިއެވެ. img:http://s2.psmnews.mv/images/660x400/14590857713500.jpg|މުދަލު ޒަކާތް ބަލައިގަތުން މީރާއާ ހަވާލުކުރުމަށް ބޭއްވި ރަސްމިއްޔާތުގެ ތެރެއިން / ފޮޓޯ: ޕީއެސްއެމް ނިއުސް
"މި ދައްކަނީ އިސްލާމް ދީނުގެ ރުކުނެއްގެ ވާހަކަ. 10 އެއް އިންސައްތަ މިހުން އިސްލާމް ދީނުގެ މި ރުކުން މި ޤާއިމްކުރަނީ. އެހެންމީވާ، މިއަދު ދިވެހި ސަރުކާރުން މި ބުނަނީ، އިސްލާމް ދީނުގައި އޮތް ގޮތަށޭ ޒަކާތް ނަގާނީ. ކުރިން ބޭނުން މީހަކު ޒަކާތް ދައްކަނީ. މުދަލު ޒަކާތަކީ އެމީހަކު ދައްކަން ބޭނުމިއްޔާ ދައްކަންޖެހޭ އެއްޗެއް ނޫންކަމަށް. އެއީ ދައުލަތުން ނަގަންޖެހޭ އެއްޗެއް. ސަރުކާރުން ނަގަންޖެހޭ އެއްޗެއް. ޤުރުއާނުގައި އޮތީ މިކަން މިގޮތަށް އަންގަވާފައި."
މުދަލު ޒަކާތް ބަލައިގެންނެވުމުގެ މަސައްކަތް، އިސްލާމިކް މިނިސްޓްރީން ކުރިޔަށް ގެންދެވި ގޮތުގެ ބަދަލުގައި އެކަން މޯލްޑިވްސް އިންލަންޑް ރެވެނިއު އޮތޯރިޓީން ކުރައްވާ ގޮތަށް ސަރުކާރުން ހަމަޖެއްސެވި ނަމަވެސް މިކަމުގެ ސަބަބުން، ދިވެހި ރައްޔިތުންނަށް ދެރަވާނެ އެއްވެސް ގޮތެއް ނުވާނެ ކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ މުދަލު ޒަކާތް ރައްޔިތުންގެ އަތުން ނެގުމަށްފަހުގައި މީރާއިން އެ ފައިސާ ޖަމާކުރާނީ މިހާރުވެސް މުދަލު ޒަކާތް ޖަމާކުރާ އެކައުންޓަށް ކަމަށެވެ. އަދި ކަމާބެހޭ ރިޕޯޓެއް ކޮންމެ މަހަކު މީރާއިން އިސްލާމިކް މިނިސްޓްރީއަށް ފޮނުއްވާނެ ކަމަށެވެ. ޒަކާތް ބެހުމުގައި އެއްވެސް ޒިންމާއެއް އެއްވެސް ދައުރެއް މީރާއަކަށް ނޯންނާނެކަމަށްވެސް އިސްލާމިކް މިނިސްޓަރ ވިދާޅުވިއެވެ.
"މިކަންކަން ރަނގަޅަށް ދާތީވެ އެކަން އެހެން ވިޔަނުދިނުމަށްޓަކައި ބަޔަކު މީހުން މުޖުތަމަޢުގައި ފިތުނަވެރިކަން އުފައްދަން މަސައްކަތްކުރަނީ. އަޅުގަނޑުމެން ޔަޤީންކަން މިދެނީ އިރާދަކުރެއްވިއްޔާ މިކަންކަން ފުރިހަމަ ގޮތުގައި ކުރިޔަށްދާނެ."
މިނިސްޓަރ އޮފް އިސްލާމިކް އެފއަރޒް ފާހަގަކުރެއްވި ގޮތުގައި މީރާއިން ކުރަމުން އަންނަ މަސައްކަތްތަކާމެދު ރައްޔިތުންގެ މެދުގައި އިތުބާރު އިތުރުވަމުންދާ ކަމަށެވެ. މީރާއާ ގުޅިގެން މިކަން ކުރުމުން މުދަލު ޒަކާތް ދައްކާ މީހުން އިތުރުވެ، ޒަކާތުގެ ގޮތުގައި ލިބޭ ފައިސާ އެތައް ގުނައެއް އިތުރުވެގެން ދާނެކަމަށް އެމަނިކުފާނު ލަފާކުރައްވައެވެ.
މިނިސްޓަރ ވިދާޅުވީ މުދަލު ޒަކާތް މީރާއަށް ދައްކަން ހަމަޖެއްސެވިނަމަވެސް ފިޠުރު ޒަކާތް ބަލައިގަންނަވާނީ އިސްލާމިކް މިނިސްޓްރީންނާއި އެ މީނިސްޓްރީއާ ކައުންސިލް އިދާރާތައް ގުޅިވަޑައިގެން އިންތިޒާމް ކުރައްވާ ގޮތެއްގެ މަތީންކަމަށެވެ.