މިއީ ނޫސްވެރިންނަށް އަޅާލާނެ ސަރުކާރަކަށް ވެގެންދާނެ: ރައީސުލްޖުމްހޫރިއްޔާގެ ނައިބު

ނޫސްވެރިންނަށް އަޅާލާ ސަރުކާރަކަށް ރައީސުލްޖުމުހޫރިއްޔާ ޑރ. މުހައްމަދު މުޢިއްޒުގެ ސަރުކާރު ވެގެންދާނެ ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ބައިނަލްއަޤްވާމީ ނޫސްވެރިކަމުގެ މިނިވަންކަމުގެ ދުވަހާއި ގުޅުވައި އަދި ޕީއެސްއެމް ނިއުސްގެ 7 ވަނަ އަހަރީ ދުވަހާއި ގުޅުވައި ޕީއެސްއެމް ނިއުސްއަށް ދެއްވި ޙާއްސަ ބަސްތީގަތުމެއްގައި ރައީސުލްޖުމްހޫރިއްޔާގެ ނައިބު ވިދާޅުވީ، ސަރުކާރަށް ނޫސްވެރިންގެ ހާލަތު ވަރަށް ރަނގަޅަށް އެނގޭ ކަމަށެވެ.

އެގޮތުން ރައިސުލްޖުމްހޫރިއްޔާ އިންތިޚާބު ވެވަޑައިގެން ނޫސްވެރިންނާއި ބައްދަލު ކުރައްވާ ގާތްގުޅުމެއް އުފެއްދެވުމަށް މަސައްކަތް ކުރެއްވިކަން އެމަނިކުފާނު ފާހަގަކުރެއްވިއެވެ.

ނައިބު ރައީސް ވިދާޅުވީ، ނޫސްވެރިކަމުގެ މިނިވަންކަމުގެ ދުވަހު ލިބޭނެ އެންމެ ބޮޑު ހިތްހަމަ ޖެހުމަކަށް ވާނީ ރައްޔިތުން އިތުބާރުކުރާ ސަރުކާރެއް ނޫސްވެރިންގެ ކަންކަމާއި މެދު އަޅާލުމަށް އޮތުން ކަމަށެވެ.

"އަޅުގަނޑުމެންނަށް ދެވޭނެ ޔަޤީންކަމަކީ ނޫސްވެރިންނާއި ދޭތެރޭ އަޅާލާ ސަރުކާރަކަށް ރައީސް ޑރ. މުހައްމަދު މުޢިއްޒުގެ ސަރުކާރު ވެވަޑައިގަންނަވާނެކަން. ރައީސުލްޖުމްހޫރިއްޔާ ވެވަޑައިގެންފައިވާ ވަޢުދުތަކަކީ، ފުއްދައި ދެވިއްޖެ ކަމަށްވާނަމަ، ފުއްދޭނެ ފުއްދައިދެވުނީމަ ނޫސްވެރިންނަށް އެކި މަރުހަލާތަކުގައި އިހުސާސް ވަމުންދާނެ ކަންކަން." އަލްއުސްތާޛު ޙުސައިން މުޙައްމަދު ލަޠީފް ވިދާޅުވިއެވެ.

ރައީސުލްޖުމްހޫރިއްޔާ ނައިބު ވިދާޅުވީ، ޤާނޫނު އަސާސީގައި ލިޔެވިފައި ނެތަސް، ނޫސްވެރިކަމަކީ ޤައުމުގެ 4 ވަނަ ބާރު ކަމަށާއި، އެހެންކަމުން ނޫސްވެރިންނަށް މިއަދު ލިޔާ ޚަބަރުތަކަކީ ޒިންމާދާރުކަމާއިއެކު ލިޔެވޭ ތެދު ޚަބަރަށްވާން ޖެހޭ ކަމުގައެވެ. އަދި ޖަވާބުދާރީ ކުރަނިވި ގޮތަށް ޒިންމާދާރު ކުރަނިވި ގޮތަށް ޙަބަރުތައް ގެންނަން ޖެހޭ ކަމަށް އެމަނިކުފާނު ވިދާޅުވިއެވެ.

މިކަންކަން ހައްލުވަމުންދާ ވަރަކަށް ހެޔޮ ބަދަލުތަކެއް ފެނިގެންދާނެކަމަށް ރައިސުލްޖުމުހޫރިއްޔާގެ ނައިބު ވިދާޅުވިއެވެ.

ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވަނީ ނޫސްވެރިކަމުގެ މިނިވަންކަން ދަމަހައްޓައި ކުރިއެރުވުމަށް މުހިންމު ވަޢުދުތަކެއް ވެވަޑައިގެންފައެވެ.

އެގޮތުން މީޑިއާތަކަށް މާލީ މިނިވަންކަން ދިނުމަށް ދައުލަތުގެ ބަޖެޓުން މީޑިއާތަކަށް ވަކި އިންސައްތައެއް ކަނޑައެޅުމަށް އެކަމާއި ގުޅޭ އުޞޫލެއް މިހާރު ވަނީ އެކުލަވާލާފައެވެ. މީގެ އިތުރުން ހުޅުމާލޭގައި މީޑިއާތަކަށް ޚާއްސަކޮށް މީޑިއާ ވިލެޖެއް ޤާއިމް ކުރުމަށް ބިން ވަނީ ކަނޑައަޅުއްވާފައެވެ.

ޕީއެސްއެމް ނިއުސްގެ 7 ވަނަ އަހަރީ ދުވަހާއި ގުޅުވައި ޕީއެސްއެމް ނިއުސްއަށް އިންޓަރވިއު ދެއްވުމުގެ އިތުރުން ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް ވަނީ ޕީއެސްއެމް ނިއުސްގައި މަސައްކަތް ކުރާ މުވައްޒަފުންނާ ބައްދަލުކުރައްވާ، ވަގުތުކޮޅެއް ހޭދަކުރައްވާފައެވެ.