މިއަހަރުގެ ފުރަތަމަ 3 މަސް ދުވަހު އެމްޓީސީސީއަށް ސާފު ފައިދާގެ ގޮތުގައި 29 މިލިއަން ރުފިޔާ ލިބިއްޖެއެވެ.
އެމްޓީސީސީން ޢާއްމުކޮށްފައިވާ މިއަހަރުގެ ފުރަތަމަ ކުއަރޓަރގެ މާލީ ހިސާބުތައް ދައްކާގޮތުން ފުރަތަމަ ކުއާޓަރގައި ސާފު ފައިދާ، މިދިޔަ އަހަރުގެ ފަހު ކުއަރޓަރގައި ސާފު ފައިދާއާ އަޅާ ބަލާއިރު 19 އިންސައްތަ ދަށެވެ. މިދިޔަ އަހަރުގެފަހު ކުއަރޓަރގައި އެމްޓީޓީސީސީއަށް ސާފު ފައިދާގެ ގޮތުގައި ލިބިފައިވަނީ ތިރީސް ހަމިލިއަން ރުފިޔާއެވެ.
އެމްޓީސީސީގެ ފުރަތަމަ ކުއަރޓަރގެ މާލީ ހިސާބުތައް ދައްކާގޮތުން އެކުންފުންޏަށް ލިބިފައިވާ ސާފު ފައިދާ ދަށަށް ގޮސްފައިވަނީ، ސަރުކާރުން އެމްޓީސީސީއަށް ދެއްވަމުން ގެންދެވި ސަބްސިޓީ ކަނޑުއްވާލެއްވުމާ ގުޅިގެންނާއި، އެކުންފުނިން ދޭ ދަތުރުފަތުރުގެ ޚިދުމަތުން ގެއްލުންވާތީކަމަށް އެކުންފުނީގެ ރިޕޯޓްގައި ބަޔާންކޮށްފައިވެއެވެ. ފުރަތަމަ ކުއަރޓަރގެ ހިސާބުތައް ދައްކާ ގޮތުން އެކުއާޓަރުގައި އެ ކުންފުނިން 315 މިލިއަން ރުފިޔާގެ ވިޔަފާރިކޮށްފައިވެއެވެ. މި ކުއާޓަރުގައި އާމްދަނީގެ ގޮތުގައި ލިބިފައިވަނީ 71 މިލިއަން ރުފިޔާއެވެ. އެމްޓީސީސީގެ މާލީ ހިސާބުތައް ދައްކާ ގޮތުން ޓެކްސްއަށް ކެނޑުމުގެ ކުރިން ފުރަތަމަ ކުއަރޓަރގައި އާމްދަނީގެ ގޮތުގައި ލިބިފައިވަނީ 35 މިލިއަން ރުފިޔާއެވެ. ޙިއްޞާއަކަށް ޖެހޭ ފައިދާގެ މިންވަރަކީ 59.71 ރުފިޔާއެވެ. މިއަހަރުގެ ފުރަތަމަ ކުއަރޓަރގައި އެމްޓީސީސީއަށް އެގާރަ މަޝްރޫއުއެއް ލިބިފައިވެއެވެ. އޭގެތެރޭގައި ބިން ހިއްކުމުގެ މަސައްކަތާއި، ގޮނޑުދޮށް ޙިމާޔަތްކުރުމުގެ މަސައްކަތް ފަދަ މަޝްރޫއުތައް ހިމެނެއެވެ.
އެމްޓީސީސީއިން ފުރަތަމަ ކުއަރޓަރގެ ތެރޭގައި 11 މަޝްރޫޢެއްގެ މަސައްކަތް ފަށައި، ފަސް މަޝްރޫއެއްގެ މަސައްކަތް ވަނީ ނިންމާފައެވެ.