ގުދުރަތީ ކާރިސާތަކާއި ގުޅިގެން އާއްމުކޮށް ފެންބޮޑުވާ ރަށްތަކަށް ޙައްލެއް ހޯދައިދިނުމުގެ ގޮތުން ފެން ހިންދުމަށް ބޭނުންވާތަކެތި 9 ރަށަކަށް ޔުނިސެފުން ހަދިޔާކޮށްފިއެވެ.
މިރަށްތަކުގެ ތެރޭގައި އާއްމުކޮށް ފެންބޮޑުވާ އަދި ފެން ބޮޑުވުމުގެ ފުރުސަތު ބޮޑު ރަށްތައް ހިމެނެއެވެ. އެގޮތުން ރ އަތޮޅާއި، މ، ގއ، ގދ އަދި ޏ އަތޮޅު ހިމެނެއެވެ. " ބިލްޑިންގ ރެސިލިއަންޓް ކޮމިއުނިޓީސް ފޯރ ޗިލްޑްރަން "ގެ ނަމުގައި ކުރިއަށްގެންދާ މަޝްރޫޢުގެ ދަށުން ޔުނިސެފުން ހަދިޔާކުރި ތަކެތީގެ ތެރޭގައި ފެން ހިންދުމަށް ބޭނުންކުރާ ޕަންޕާއި، ފެން ހޮޅި އާއި ޕަންޕު އޮޕަރޭޓްކުރުމަށް ބޭނުންވާ ޓޫލްބޮކްސްއާއި، ވާރޭ ކޯޓް އަދި ބޫޓް ހިމެނޭކަމަށް ޑިޒާސްޓަރ މެނޭޖްމަންޓް ސެންޓަރުން ވިދާޅުވެއެވެ.
ޑިޒާސްޓަރ މެނޭޖްމަންޓް ސެންޓަރުގެ ސީނިއަރ ޕްރޮގްރާމް އޮފިސަރ ފަރޫޝާ އަލީ ވިދާޅުވީ ޔުނިސެފްގެ އެހީގެ ދަށުން ފެން ހިއްކުމަށް ބޭނުންވާ ޕަންޕު ހައުސްތައް އަޅާ ނިމިފައިވާކަމަށެވެ. އަދި ޕަންޕުތައް އެއްތަނުން އަނެއްތަނަށް ބަދަލުކުރުމަށް ކުރަންޖެހޭ މަސައްކަތްތައް ކުރުމަށް ފައިސާގެ އެހީވެސް ދެވިގެންދާނެކަމަށެވެ.
ވޭތުވެދިޔަ އަހަރުގެ ތެރޭގައި ކުރިމަތިވި ގުދުރަތީ ކާރިސާތަކުގައި ރާއްޖޭގެ 11 އަތޮޅަކަށް ވަނީ އަސަރުކޮށްފައެވެ.