ޕީއެސްއެމުން އިންތިޒާމްކޮށްގެން މި އަހަރުގެ ރަމަޟާންމަހު ބާއްވާ ކުޑަކުދިންގެ ޤުރުއާން ކިޔެވުމުގެ މުބާރާތުގެ މާލޭ އޮޑިޝަންގައި ބާރަސަތޭކަ އަށްވުރެ ގިނަ ކުދިންގެ ކިޔެވުމާއެކު، އޮޑިޝަން ނިންމާލައިފިއެވެ. މިމުބާރާތުގެ އޮޑިޝަން ފެށީ މިދިޔަ ބުރާސްފަތި ދުވަހުއެވެ. މާލޭގެ އިތުރުން ރާއްޖޭގެ 4 ސަރަޙައްދެއްގައި އޮޑިޝަން ކުރިއަށް ގެންދިޔުމަށް ހަމަޖެހިފައިވާއިރު، މާލޭގެ އޮޑިޝަން ކުރިއަށް ގެންދިޔައީ ޕީއެސްއެމް ރޭޑިއޯ ބިލްޑިންގގެ ސެނެކޯ މާލަމުގައެވެ.
ކުޑަކުދިންގެ ހިތްތަކުގައި ކީރިތި ޤުރުޢާން ކިޔެވުމުގެ ލޯބި އަށަގަންނުވައި، ތަޖުވީދު މަގުން ޤުރުއާން ކިޔަވާ ކުދިންތަކެއް ބިނާކުރުމުގެ ބޭނުމުގައި ކޮންމެ އަހަރެއްގެވެސް ރަމަޟާންމަހު ބާއްވާ ކުޑަކުދިންގެ ޤުރުއާން ކިޔެވުމުގެ މުބާރާތުގައި މާލެ އޮޑިޝަންގައި ބާރަސަތޭކަ ފަންސަވީސް ކުދިން ބައިވެރިވެ ވަނީ ކިޔާފައެވެ. މީގެތެރެއިން ޤުރުއާން މުބާރާތުގައި ބައިވެރިވާނީ އެންމެ މަތިން މާކްސް ލިބުނު 500 ކުދިންނެވެ. މިކުދިންނަށް ކުރިއަށް އޮތް ދިހަވަރަކަށް ދުވަހުގެ ތެރޭގައި މުބާރާތުގައި ކިޔަވަން ހޮވުނުކަން އަންގާނެއެވެ.
އޮޑިޝަނަކާއެކު ކުރިއަށްގެންދާ މިމުބާރާތުގައި ބައިވެރިވުމަށް ބޭނުންވާ އަތޮޅުތަކުގެ ކުދިންގެ ތެރެއިން މުބާރާތަށް ހޮވާ ކުދިން ނެގުމަށްޓަކައި ޕީއެސްއެމްގެ ޓީމުން މިހަފްތާގެ ތެރޭގައި އަތޮޅުތަކަށް ދަތުރުތައް ފަށާނެއެވެ. ރާއްޖޭގެ 4 ސަރަޙައްދެއްގައި އޮޑިޝަން ބާއްވާ ޖުމްލަ 200 ކުދިން މުބާރާތައް ނެގުމަށް ވަނީ ހަމަޖެހިފައެވެ.
އަތޮޅުތެރެއިން ހދ. ކުޅުދުއްފުށީގެ އޮޑިޝަން އޮންނާނީ، މެއި މަހުގެ ފަހަކުން ހަތަކަށެވެ.
އައްޑޫ ސިޓީގެ ހިތަދޫގެ އޮޑިޝަން އޮންނާނީ، މެއި ބާރައިން ސާދައަށެވެ.
ރ އުގޫފާރުގެ އޮޑިޝަން އޮންނާނީ، މެއި މަހުގެ ނަވާރައިން އެކާވީހަށެވެ.
އަދި ލ ފޮނަދޫގެ އޮޑިޝަން އޮންނާނީ، މެއި މަހުގެ ސައްބީހުން އަށާވީހަށެވެ.
އަތޮޅުތެރޭގައި މުބާރާތަށް ހޮވޭ ކުދިން މާލެ އައިސް ކިޔެވުމުގެ ބަދަލުގައި މުބާރާތުގައި ކިޔެވުމުގެ ބައި އެއަތޮޅަކުން އޮޑިޝަނަށްފަހު ރެކޯޑްކުރުމަށް ވަނީ ހަމަޖެހިފައެވެ.
އޮޑިޝަންގައި ކިޔެވުމަށް އެޕްލިކޭޝަން ފޯމެއް ހުށަހަޅާކަށް ނުޖެހެއެވެ. މުބާރާތުގައި ބައިވެރިވުމަށް އޮޑިޝަންގައި ބައިވެރިވުމަށްޓަކައި ވާދަކުރާ ޢުމުރުފުރާއިން ބޭނުންވާ ގޮފީގެ ކިޔެވުން އޮންނަ ގަޑިއެއްގައި ފޮޓޯޖެހި ރަސްމީ ލިޔުމެއް ހިފައިގެން ދިޔުމުން އޮޑިޝަނުން ފުރުޞަތު ލިބޭނެ އިންތިޒާމު ވަނީ ހަމަޖައްސާފައެވެ.