އެންޓި-ޑިފެކްޝަން ބިލް ތަސްދީގުނުވެ ދިގުދެމިގެންދިއުމަކީ ޑިމޮކްރަސީއަށް އެޅޭ ހުރަހެއް: ރައީސް ޞާލިޙް

ރައްޔިތުންގެ މަޖިލީހުން ފާސްކޮށްފައިވާ އެންޓި-ޑިފެކްޝަން ބިލް ތަސްދީގުނުކުރާނަމަ އެއީ ޑިމޮކްރަސީއަށް އެޅޭ ހުރަހެއް ކަމަށް ކުރީގެ ރައީސް އަދި އެމްޑީޕީގެ އެޑްވައިޒަރު ރައީސް އިބްރާހީމް މުހައްމަދު ޞާލިހް ވިދާޅުވެއްޖެ އެވެ. ރައީސް ޞާލިޙް މިހެން ވިދާޅުވީ ގއ. އަތޮޅުގައި އެމްޑީޕީން ބޭއްވި ކެމްޕޭން ހަރާކާތެއްގައި ވާހަކަފުޅު ދައްކަވަމުންނެވެ.

އެންޓި-ޑިފެކްޝަން ޤާނޫނުގެ މުހިއްމުކަމާއި ގުޅޭގޮތުން ވާހަކަފުޅުދައްކަވަމުން ރައީސް ޞާލިޙް ވިދާޅުވީ، މަޖިލިސް އިންތިހާބު ކުރިއަށް އޮތް އިރު، މިވަގުތަކީ އެފަދަ ޤާނޫނަކަށް ނުހަނު ބޭނުންވެފައިވާ ވަގުތެއްކަމަށެވެ.

ރައީސް ޞާލިޙް ވިދާޅުވީ ރައީސުލްޖުމްޙޫރިއްޔާ، އެންޓި-ޑިފެކްޝަން ބިލް އަނބުރާ މަޖިލީހަށް ފޮނުވާލައްވާނެ ކަމުގެ މައުލޫމާތު ލިބިވަޑައިގެންފައިވާކަމަށް ވިދާޅުވެ، އެ ބިލް އަނބުރާ ފޮނުވާލެއްވިނަމަވެސް އެމްޑީޕީން އެ ބިލް ފާސްކުރާނެ ކަމަށް ވިދާޅުވެފައެވެ.

"ތިބޭފުޅުން އިންތިހާބުކުރާ ކެންޑިޑޭޓަކު، އެ އިންތިހާބުކުރާ ޕާޓީއެއްގައި ފަސް އަހަރު ދުވަހު ހުންނާނެކަމުގެ ގާނޫނީ ގޮތުން އެ ބަދެވުން، އިރާދަކުރެއްވިއްޔާ ގާނޫނުގެ ތެރެއިން ހައްލު ހޯދައިދޭނަން" އެމަނިކުފާނު ވިދާޅުވި އެވެ.

ރައްޔިތުންގެ މަޖިލީހަށް މެންބަރަކު އިންތިޚާބުވާ ޕާޓީ ބަދަލުކޮށްފި ނަމަ މެންބަރުކަމުން އަމިއްލައަށް އިސްތިއުފާ ދޭންޖެހޭ ގޮތަށް އެންޓި ޑިފެކްޝަން ގާނޫނުގެ ބިލް ރައްޔިތުންގެ މަޖިލީހުން ފާސްކޮށްފައިވަނީ މިމަހުގެ 1 ވަނަ ދުވަހުގައެވެ. އެމްޑީޕީގެ ފަރާތުންހުށަހެޅި އެ ބިލު ދިރާސާކުރަން އުފެއްދި ޚާއްސަ ކޮމިޓީން ވަނީ ބިލު ތަޅުމަށް ފޮނުވުމުގެ ކުރިން ބޮޑެތި އިސްލާހުތަކެއް ގެނެސްފައެވެ. އެގޮތުން އެޕާޓީގެ 7 މެންބަރުންގެ މައްޗަށް އެކުލެވޭ ކޮމިޓީއަކުން އެ ބިލަށް ގެނައި މައިގަނޑު ބަދަލުތަކުގެ ތެެރޭގައި ބިލުގައި ގޮނޑި ގެއްލޭނެ ކަމަށް ބުނެފައިވީނަމަވެސް އަމިއްލައަށް އިސްތިއުފާ ދޭން ޖެހޭނެކަމާއި އެގޮތަށް އިސްތިއުފާ ދޭންޖެހޭނެ ތިން ހާލަތެއް ވަނީ މާއްދާއެއްގައި ބަޔާންކޮށްފައެވެ.

އެންޓި-ޑިފެކްޝަންގެ ބިލް ތަސްދީގުކުރުން ލަސްކަން ދޭހަވާގޮތަށް ރައީސް ޞާލިޙް ވާހަކަފުޅުދައްކަވާފައިވާއިރު، އެބިލް ތަޞްދީގުކުރުމަށް ރައީސްއޮފީހަށް ފޮނުވާފައިވަނީ މިމަހުގެ 7 ވަނަ ދުވަހުގެރޭގަކަމަށާއި، ބިލް ތަޞްދީގު ކުރުމަށް ނުވަތަ އަނބުރާ ފޮނުވާލުމަށްވެސް 15 ދުވަހުގެ މުއްދަތެއް އޮންނަކަމަށް ވިދާޅުވެ ޕްރޮގްރެސިވް ކޮންގްރެސް ކޯމިޝަނުން މިއަދުވަނީ މިހާރުކުރިއަށްދަނީ ބިލް ތަސްދީގު ކުރުމުގެ ކުރިން ރައީސުލްޖުމްހޫރިއްޔާ ހޯއްދަވަންޖެހޭ ޤާނޫނީ ލަފާހޯދުމުގެ މަސައްކަތް ކަމަށް ބުނެފައެވެ.

މެންބަރުކަމުގެ ގޮނޑި ގެއްލޭ ގޮތަށް އެންމެ ފުރަތަމަ އެންޓި-ޑިފެކްޝަންގެ ބިލެއް ހުށަހަޅައި ޤާނޫނެއް އެކުލަވާލީ 18 ވަނަ ރައްޔިތުންގެ މަޖިލީހުގަ އެވެ. ނަމަވެސް އޭރުގެ ސަރުކާރު ބަދަލުވުމާއެކު އެޤާނޫނު އުވާލާފައިވަނީ އެމްޑީޕީންނެވެ.