އިދިކޮޅު ހަރަކާތްތަކަށް ހުރަސް އަޅަން މިސަރުކާރުން ފުލުހުންނަށް ނާންގާނެ: ހީނާ

މި ސަރުކާރަކުން ސިޔާސީ ވެރިންނަށް ބިރު ނުދައްކާނެ ކަމަށާއި، އިދިކޮޅު ސިޔާސީ ހަރަކާތްތަކަށް ހުރަސްއަޅަން ފުލުހުންނަށް ނާންގާނެ ކަމަށް ޕީއެންސީގެ މަޖިލިސް ކެމްޕެއިންގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ހީނާ ވިދާޅުވީ ނިމިދިޔަ އެމްޑީޕީގެ ފަސް އަހަރަކީ ޚިޔާލު ފާޅު ކުރުމާއި އެއްވެ އުޅުމަށް އެންމެ ދަތިކުރި ދުވަސްތައް ކަމަށެވެ.

ހީނާ ވިދާޅުވީ، އެއިރު ސުލްހަ ވެރި މުޒާހަރާތަކުގައި، އެންގުމަކާއި ނުލައި މީހުން ހައްޔަރުކޮށް، އުމުރުން ދުވަސްވީ މީހުންނާއި އަންހެނުންނަށް ޓާގެޓްކޮށްގެން ފުލުހުން އަނިޔާކުރިކަމަށެވެ. އަދި އެ އަނިޔާތަކާއި ގުޅިގެން ކަމާ ބެހޭ ފަރާތްތަކަށް މައްސަލަ ހުށަހެޅުއްވި ކަމަށާއި ނަމަވެސް، ތަހުގީގަށް ވެސް ފުލުހުންގެ އެއްބާރުލުން ނުލިބުނުކަމަށް ހިނާ ވިދާޅުވިއެވެ.

"އަނިޔާ ކުރި މައްސަލަތަކާއި ޕެޕަރ ސްޕްރޭ ޖަހަމުންދާ މައްސަލަތަކާއި ގާނޫނާއި ގަވާއިދާ ޚިލާފަށް އެއްވެސް ކަހަލަ އިންޒާރެއް ފުލުހުން ދިނުމެއް ނެތި މުޒާހަރާގެ ބައިވެރިން ހައްޔަރު ކުރަމުންދާ މައްސަލަތަކާއި މިހުރިހާ މައްސަލަތަކެއް އަޅުގަނޑުމެން ކެނޑިނޭޅި ކަމާ ބެހޭ ފަރާތްތަކަށް ހުށަހަޅަމުން ދިޔައިން، އެހެން ނަމަވެސް އަޅުގަނޑުމެންނަށް މިމައްސަލަތަކުގައި އެއްވެސް ކަހަލަ އިންސާފެއް ނުލިބުނު." ހިނާ ވިދާޅުވިއެވެ.

ހީނާ ވިދާޅުވީ މިސަރުކާރަކުން ސިޔާސީ ވެރިންނަކަށް ބިރެއް ނުދައްކާނެ ކަމަށާއި ސިޔާސީ ވެރިން ހައްޔަރެއް ވެސް ނުކުރާނެ ކަމަށެވެ. އެއީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސިޔާސަތެއް ނޫން ކަމަށާއި އެ މަނިކުފާނުގެ ސިޔާސަތަކީ ހުރިހާ ފަރާތްތަކަށް މިނިވަން ކަމާއެކު ހަރަކާތްތެރިވެވޭނެ މާހައުލެއް އޮތުން ކަމަށް ހީނާ ވިދާޅުވިއެވެ.