ކޮންމެ ބަޔަކަށްވެސް ސިޔާސީ ޕާޓީ އުފެއްދެންވާނެ، ހުރަހެއް ނާޅާނަން: ރައީސް

ކޮންމެ ބަޔަކަށްވެސް ސިޔާސީ ޕާޓި އުފެއްދުމުގެ ހައްގު އޮންނާނެކަމަށާއި، އެކަމަށް ހުރަސް ނާޅުއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ކުރީގެ ރައީސް ޢަބްދުﷲ ޔާމީންގެ އަރިސް ބޭފުޅުންތަކެއް އުފެއްދުމަށް މަސައްކަތްކުރާ ޕީއެންއެފްގެ ޖަލްސާ ރޭ ޣިޔާސުއްދީން ސްކޫލްގައި ބޭއްވުމަށް މަސައްކަތްކުރަނިކޮށް އެސްއޯ ފުލުހުން ހުރަސް އެޅުމާއި ގުޅިގެން ރައީސް ވަނީ އެކަމުގެ ކަންބޮޑުވުން ފާޅުކުރައްވާފައެވެ. އެއީ ރައީސްގެ އެންގެވުމާ ޚިލާފަށް ހިނގައިދިޔަކަމެއްކަން ހާމަކުރައްވާ ރައީސް ވަނީ އެކަމުގައި އިހުމާލުވެފައިވާ ފަރާތްތައް ހޯދައި ފިޔަވަޅު އަޅުއްވާނެކަމަށް ވިދާޅުވެފައެވެ.

މިކަމާއި ގުޅޭގޮތުން މީޑިއާއާއި ވާހަކަފުޅު ދައްކަވަމުން ރައީސް ވިދާޅުވީ، ކޮންމެ ބަޔަކަށްވެސް ސިޔާސީ ޕާޓީ އުފެއްދެންވާނެކަމަށާއި، އެއީ ކޮންމެ މީހަކަށްވެސް އޮތް ޙައްގެއްކަމަށެވެ.

"ޕީއެންއެފްގެ ނަމުގައި ޕާޓީއެއް އުފައްދަން ބޭނުންފުޅުވި ބޭފުޅުންނަށް އެކަން ކުރުމުގެ ފުރުޞަތު އޮންނަންވާނެ. އަދި އުފާވެސް ކުރަން އެބޭފުޅުންނަށް ޖަލްސާ ބޭއްވިގެން އެބޭފުޅުންގެ ޤާނޫނީ ކަންކަން ރޭގަ ފުރިހަމަ ކުރެއްވީމަ. ވަރަށް މަރުހަބާވެސް ދަންނަވަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ރައީސް ވިދާޅުވީ މީޤައުމުގައި ސިޔާސީ ކަންކަމަށްވެސް މިނިވަންކަން އޮންނަންވާނެކަމަށާއި، އެކަމަށް ހުރަސް ނާޅުއްވާނެކަމަށެވެ. އެއީ އެމަނިކުފާނުގެ ސިޔާސަތުކަމަށް ވިދާޅުވާ ވިދާޅުވުން ތަކުރާރުކުރެއްވިއެވެ.

ރައީސް ވިދާޅުވީ މިޤައުމަށް ސިޔާސީ ހަމަޖެހުން ގެނަންން ބޭނުންފުޅުވާކަަމަށާއި، ސިޔާސީ ވިސްނުން ފާޅުކޮށްގެން އެއްވެސް މީހަކަށް ހުރަސް ނާޅުއްވާނެކަމަށެވެ.. އެއްވެސް މީހަކު ސިޔާސީ ވާހަކަ ދައްކައިގެން ފުލުސް އޮފީހަށް ގެންގޮސްފައިނުވާނެކަށާއި، ކުރިއަށް އޮތްތަނުގައިވެސް ނުގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.