ޚަބަރު

ހަގީގަތާއި ޚިލާފު ވާހަކަތަކެއް ނަމަވެސް، ކެތްތެރިކަމާއެކު ރައީސް އަޑު އެއްސެވި


  • ރައްޔިތަކު ނުރުހުން ފާޅުކުރީ އޭނާ ތާއީދުކުރާ ކެންޑިޑޭޓަކަށް ކުރިމަތި ނުލެވޭތީ

  • އެ ކެނޑިޑޭޓަށް ވާދަނުކުރެވޭނެކަމަށް ކަނޑައެޅުއްވީ ސުޕްރީމް ކޯޓުން

ރައީސުލްޖުމްހޫރިއްޔާ ޑރ. މުހައްމަދު މުއިއްްޒުއަކީ ރައްޔިތުންގެ ޝަކުވާ ކެތްތެރިކަމާއެކު އަޑު އައްސަވާ ބޭފުޅެއްކަމަށް ވިދާޅުވެ، ގިނަ ބަޔަކު އެމަނިކުފާނަށް ސޯޝަލް މީޑިއާގައި ތައުރީފްކޮށްފިއެވެ.

ސޯޝަލް މީޑިއާގައި ރައީސުލްޖުމްހުރިއްޔާއަށް ގިނަ ބަޔަކު ތައުރީފުކޮށް ވާހަކަދައްކާފައި މިވަނީ މަޖިލިސް އިންތިޚަބުގެ ކެމްޕެއިނަށް ތާއީދު ހޯއްދެވުމަށް މިއަދު މާލޭޭގައި ކުރިއަށްދިޔަ ކެމްޕެއިން ހަރަކާތެއްގެ ތެރެއިން ފެނުނު މަންޒަރަކާއި ގުޅިގެނެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ތާއީދު ހޯއްދެވުމަށް ރައީސުލްޖުމްހުރިއްޔާ ޑރ. މުޙައްމަދު މުއިއްްޒު ގެންދަވަނީ ޑޯޓުޑޯ ކެމްޕެއިން ހަރަކާތެއް ކުރިއަށް ގެންދަވަމުންނެވެ. އެގޮތުން ކޮންމެ ދުވަހަކުވެސް މާލޭގެ އެކި ހިސާބުތަކުގައި އެމަނިކުފާނު ކެމްޕެއިން ހަރަކާތްތައް ކުރިއަށް ގެންދަވައެވެ. ޑޯޓުޑޯ ހަރަކާތުގެ ތެރެއިން އެކި ގޭގެއަށް ވަޑައިގެން ރައްޔިތުންގެ ހާލު ބައްލަވައި، ކަންބޮޑުވުންތައް އެ މަނިކުފާނު ގެންދަވަނީ އަޑު އައްސަވަމުންނެވެ. އަދި އެ ހަރަކާތުގެ ތެރެއިން މަގުމަތިން ބައްދަލުވާ ބޭފުޅުންނާއިވެސް އެމަނިކުފާނު ވާހަކަދައްކަވައި ކަންބޮޑުވުންތައް އައްސަވައެވެ. މިގޮތަށް އާއްމުންނާއި ބައްދަލުކުރައްވާއިރު ސިޔާސީ ކުލައަކަށް އެމަނިކުފާނު ނުބައްލަވާނެކަން ވަނީ ސާބިތުކޮށްދެއްވާފައެވެ.

މާލޭގައި ކުރިއަށްދިޔަ ކެމްޕެއިން ހަރަކާތެއްގެ ތެރެއިން ރައީސުލްޖުމްހޫރިއްޔާއާ ބައްދަލުވި މީހަކު ވަނީ އޭނާ ތާއީދުކުރާ ކެނޑިޑޭޓަށް އިންތިޚާބުގައި ވާދަނުކުރެވޭތީ ނުރުހުން ފާޅުކޮށްފައެވެ. އަދި އޭނާ ތާއީދުކުރާ ކެނޑިޑޭޓަށް މަޖިލިސް އިންތިހާބުގައި ވާދަނުކުރެވުނު ސަބަބުތަކުގެ ތެރޭގައި ރައީސުލްޖުމްހޫރިއްޔާ ފޮނުއްވި ސިޓީއެއްގެ މައްސަލައަކާ ގުޅިގެންކަމަށް ތުހުމަތުކުރެއްވިއެވެ. ނަމަވެސް ރައީސުލްޖުމްހޫރިއްޔާ ވަނީ ކެތްތެރިކަމާއެކު އޭނާގެ ވާހަކަތައް އަޑު އައްސަވާފައެވެ. އަދި އެއްވެސް ކެންޑިޑޭޓަކަށް އިންތިޚާބުގައި ވާދަނުކުރެވޭފަދަ ގޮތެއް ހައްދަވާފައިނުވާކަމަށް އެމަނިކުފާނު ވިދާޅުވިއެވެ. މީގެއިތުރުން ޖުޑީޝަރީއަށް އެއްވެސް ނުފޫޒެއް ނުފޯރުވާނެކަމަށް ވެވަޑައިގެންނެވި ވައުދާއި އެއްގޮތަށް އަމަލުކުރައްވާނެކަމަށްވެސް ރައީސް ވިދާޅުވިއެވެ.

މިކަމާއި ގުޅިގެން ގިނަ ބަޔަކު ވަނީ ރައީސުލްޖުމްހޫރިއްޔާއަށް ތައުރީފްކުރައްވާފައެވެ. އެގޮތުން ރައީސްގެ ހިތްތިރިކަން މިއަދު ފެނިގެން ދިޔަ ކަމަށާއި، އެމަނިކުފާނަކީ ރައްޔިތުންގެ އަޑު އައްސަވާ ވެރިއެއްކަން އެނގިގެން ދިޔަކަމަށް ސޯޝަލް މީޑިއާގައި ބައެއް ފަރާތްތަކުން ވަނީ ޝުޢޫރުފާޅުކޮށްފައެވެ.

ރައީސުލްޖުމްހޫރިއްޔާ ވިދާޅުވި ފަދައިން އެ ބުނާ ކެންޑިޑޭޓަކަށް އިންތިޚާބުގައި ވާދަނުކުރެވެނީ އެމަނިކުފާނު ކުރެއްވި ކަމެއްގެ ސަބަބަން ނޫންކަން އޮތީ ހާމަވާށެވެ. އެ ކެނޑިޑޭޓަށް އިންތިހާބުގައި ވާދަނުކުރެވޭނެކަމަށް ކަނޑައެޅުއްވީ ސުޕްރީމް ކޯޓުންނެވެ. އެއީ ސާބިތު ދަރަންޏެއްގެ މައްސަލައިގައެވެ. ފާހަގަކޮށްލެވޭ ގޮތުގައި އެ މައްސަލައަކީ މިވެރިކަމުގެ ތެރޭގައި ކޯޓަށް ހުށަހެޅި މައްސަލައެއްވެސް ނޫނެވެ. އެއީ މީގެ އަހަރުތަކެއްކުރިން ކޯޓަށް ހުށަހެޅި މައްސަލައެކެވެ.

އާއްމު ރައްޔިތެއް ހިންހަމަނުޖެހުމާއެކު ޝުއޫރު ފާޅުކުރިނަމަވެސް ކެތްތެރިކަމާއެކު އެ ވާހަކަތައް އަޑު އެއްސެވީތީ ގިނަ ބަޔަކު ވަނީ ރައީސުލްޖުމްހުރިއްޔާއަށް ތައުރީފްކުރައްވާފައެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއަކީ އާއްމު ރައްޔިތުންނަށް ފިއްލަވައިގެން އުޅުއްވާ ބޭފުޅެއްގެ ބަދަލުގައި، ރައްޔިތުންނާއި ގާތުން ބައްދަލުކުރައްވައި، ހާލު ބައްލަވައި، މަޑުމައިތިރިކަމާއި ކެތްތެރިކަމާއެކު އެ ރައްޔިތުންގެ އަޑު އައްސަވާ ބޭފުޅެއްކަންވެސް ގިނަ ބަޔަކު ވަނީ ފާހަގަކޮށްފައެވެ.

ފަހުގެ ޚަބަރު

ގޯލްޑް ކަޕް: ކެންދޫ އަތުން އަލިފުއްޓަށް ފަސޭހަ މޮޅެއް

ގޯލްޑް ކަޕް: ދިއްދޫ ބަލިކޮށް ފުވައްމުލަކަށް ދެވަނަ މޮޅު

ޒަޔަނިސްޓު އިސްރާއީލުގެ ވެރިންނަށް މަރުގެ އަދަބު ދިނުމަށް ޚާމަންޢީ ގޮވައިލައްވައިފި

މޮނިއުމެންޓް މުބާރާތުގެ ޑިޒައިންތައް އަލުން ބަލަން އެޗްޑީސީން ނިންމައިފި

މ.ނިޔަނދުރުމާގޭގެ ގުދަނުގައި ރޯވި އަލިފާން ނިއްވާލައިފި