ދިވެހިންގެ އިން، ދިވެހިންނަށް ބެލެހެއްޓޭނެ!

ދިވެހިންނަކީ ޞުލްޙަވެރި ޞުލްޙައަށް ލޯބިކުރާ ބައެއްކެވެ. ދިވެހިން ބޭނުންވަނީ، މި ޤައުމަކީ އަމިއްލަވަންތަ ޤައުމެއްގެ ގޮތުގައި ތާއަބަދު ދެމިއޮތުމެވެ. ދިވެހީން ބޭނުންވަނީ އިޤްތިޞާދީ ގޮތުން ބާރުވެރި، އަމިއްލަ ސިޔާދަތީ ބާރުވެރިކަން އޮތް ޤައުމެއްގެގޮތުގައި ދެމިއޮންނާށެވެ. މި ހުރިހާ ކަމެއް ހާސިލުކުރުމުގައި އެންމެ މުހިންމީ މިނިވަންކަމާއެކު ދިވެހީންގެ އަމިއްލަ ބާރުވެރިކަންމަތީގައި ދެމިތިބެވޭނެކަން ޔަޤީންވެގެން ދިއުމެވެ.

ދިވެހިރާއްޖެއަކީ އިމުގެގޮތުން 974000 އަކަ ކިލޯމީޓަރު ބޮޑު ޤައުމެކެވެ. ރާއްޖެ އޮތް މައިކަނޑަކީ ވަށައިގެންވާ ހުރިހާ ޤައުމުތަކަކަށްވެސް ނިސްބަތްވާ ކަނޑެކެވެ. އެހެން ނަމަވެސް މިކަނޑުގައި އެއް ޤައުމަކަށް، އެންމެބޮޑު ޙިއްޞާއެއް އޮތް ޤައުމަކީ ދިވެހިރާއްޖެއެވެ. ވުމާއެކު މިހާ ބޮޑު ބިޔަ ކަނޑުގެ ސަރަހައްދެއް ރާއްޖެއިން ބެލެހެއްޓުންވާނީ ބޮޑު ގޮންޖެހުމަކަށެވެ.

ރާއްޖޭގެ ކަނޑުގެ ސަރަހައްދުގެ ބޮޑުކަމާއި ބިޔަކަމުން ރާއްޖެއިން އަމިއްލައަށް ކަނޑުމަގުންނާއި ވައިގެ މަގުން އެ ސަރހައްދު ފުރިހަމައަށް ބެލެހެއްޓޭ ގޮތެއް މިހާތަނަކަށް ނެތެވެ. މިހާތަނަށް އެކަން ކުރަމުން އައީ ކައިރި އަވަށްޓެރި ޤައުމުތަކަށް ބަރޯސާވެގެންނެވެ. އެކަން ކުރުމަށް އެޤައުމުތަކުގެ ކަނޑުގެ ބައެއް އުޅަނދާއި، ވައިގެ އުޅަނދުތައް ރާއްޖެ ގެނެސް، އެ އުޅަނދުތަކާއެކު ބޭރުގެ ގިނަ ޢަދަދެއްގެ ސިފައިން ރާއްޖޭގައި ޤާއިމްވެ ތިބިނަމަވެސް އެއީ ދިވެހީން ބޭނުންވާގޮތެއް ނޫނެވެ. މާޒީވެދިޔަ ބައެއް ސަރުކާރުތަކުގެ މަދު ވެރިންތަކެއްގެ ޒާތީ ސިއްރު އެޖެންޑާއެއްގެ ދަށުން ހިނގާފައި އޮތްކަމެއްކަމުގެ ތުހުމަތުބޮޑެވެ.

މިހާތަނަށް އަމިއްލަ ބާރުގައި ބެލެހެއްޓުނީ ރާއްޖޭގެ ސަރަހައްދުގެ ދެތިން އިންސައްތައެވެ. އެއީވެސް ރާއްޖޭގެ އެތެރެވަރީގައި އޮތް ސަރަހައްދެވެ. ކަނޑުގެ ބިޔަ ބޮޑު ސަރަޙައްދު މިއިން ޒަމާނަކު ދިވެހީންނަށް ރަނގަޅަށް ބެލެހެއްޓިފައެއްނެތެވެ. ވުމާއެކު ރާއްޖޭގެ އިޤްތިޞާދީ ޚާއްޞަ ސަރަހައްދަށް ބޭރު ޤައުމުތަކުގެ އެތައް އުޅަނދެއްވަދެ ކަނޑުގެ ވަސީލަތްތައް ދަނީ ބޭނުންކުރަމުންނެވެ. އެކަން ހުއްޓުވޭނެ ގޮތެއް ނެތެވެ. އޭގެސަބަބުން ކޮންމެފަދަ ނުރައްކަލެއް އަޔަސް ކުރެވޭނެ ކަމެއް ނެތެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތަކީ ދިވެހީންގެ މިނިވަންކަމާއި، އަމިއްލަވަންތަކަން ކަށަވަރުކޮށްދެއްވައި ދިވެހިންގެ ދިވެހިރާއްޖެ ޙަޤީޤީ މާނައިގައި ހޯދައިދިނުމެވެ. އެގޮތުން ވެރިކަމުގެ އެންމެ ފުރަތަމަ ދުވަހުން ފެށިގެންވެސް އެމަނިކުފާނު ވަނީ އެ މަސައްކަތްޕުޅު ފަށްޓަވާފައެވެ.

ދިވެހި ޒަޢާމަތާ ހަވާލުވެވަޑައިގެން، ޤައުމާ މުޚާޠަބު ކުރައްވައި ދެއްވި ފުރަތަމަ ތަޤުރީރުގައިވެސް ރައީސް ވަނީ އެކަމަށް ބާރު ދެއްވާފައެވެ. ރައީސް ވިދާޅުވީ، އެމަނިކުފާނުގެ ސަރުކާރުގެ ސިޔާސަތު ބިނާވާނީ، ދިވެހި ރައްޔިތުންނަށް އެންމެ މަސްލަހަތު ހުރި ގޮތުގެ މައްޗަށްކަމަށެވެ. އެމަނިކުފާނަށް ދިވެހި ރައްޔިތުން އަންނަނީ، ލިސްޓުގެ އެއްވަނައަށްކަމަށާއި، އެހެން ޤައުމެއްގެ ބަޔަކު އަންނާނީ، އޭގެ ފަހަތަށްކަމަށް ރައީސް ވިދާޅުވެފައިވެއެވެ. އެމަނިކުފާނު ވިދާޅުވެފައިވަނީ ޤައުމުތަކާ ރަޙްމަތްތެރިވާނެކަމަށާއި، ހަސަދަވެރިކަމެއް ނުބާއްވާނެކަމަށެވެ. ނަމަވެސް ޤައުމުތަކަށް އިހްތިރާމްކުރުމާއެކުވެސް އަބަދުވެސް ދިވެހި ރައްޔިތުންގެ މިނިވަންކަމާއި، ސިޔާދަތީ ރަތް ރޮނގު ފިސާރި ފަލަކޮށް ދަމާނެކަމަށް އެމަނިކުފާނު ވިދާޅުވެފައިވެއެވެ.

"އެހެން ޤައުމުތަކުގެ މިނިވަންކަމާއި، ސިޔާދަތީ ރަތް ރޮނގަށް ދިވެހި ދައުލަތުން ފުރިހަމަޔަށް އިޙްތިރާމުކުރާނެ. ދިވެހި ދައުލަތުގެ ރަތް ރޮނގަށްވެސް އެ ޙައްޤު އޮންނަންވާނެ. އެކަމުގައި ކުޑައެއް ބޮޑެއް، ގާތެއް ދުރެއް ތަފާތުވެގެނެއް ނުވާނެ. އެ އިޙްތިރާމު ލިބެންޖެހޭނެ. އިރާދަކުރެއްވިއްޔާ، އެ ޙައްޤު ނިގުޅައިގަންނާކަށް އަޅުގަނޑު ފުރުޞަތެއް ނުދޭނަން. ދިވެހީންނަކީ މިނިވަންކަމުގެ ދަރީން." ރައީސް ޑރ. މުޙައްމަދު މުޢިއްޒު ވިދާޅުވެފައިވެއެވެ.

ރައީސް ދެއްވި ޔަޤީންކަމަކީ ދިވެހިރާއްޖެއަކީ ބޭރުގެ އެހެން އެއްވެސް ޤައުމެއްގެ ސިފައިން ނެތް ރާއްޖެއަކަށް ހަދާނެކަމެވެ. ޤައުމީ ހައިސިއްޔަތުން ބަލާއިރު، ދިވެހި ޤައުމަށް ވަފާތެރިވުމަށްވުރެ ބޮޑު އުފަލެއް އެމަނިކުފާނަށް ނެތްކަން ރައްޔިތުންނަށް ކަށަވަރުކޮށްދޭނެކަމަށްވެސް ރައީސް ވިދާޅުވެފައިވެއެވެ.

މިއާއެކު ދިވެހި އަސްކަރިއްޔާގެ ވަސީލަތްތައް އިތުރުކޮށް، ރާއްޖޭގެ ޤައުމީ ދިފާޢީ ބާރަށް ރާއްޖޭގެ ކަނޑުގެ ސަރަޙައްދު ބެލެހެއްޓޭނެ ތަނަވަސްކަން ރައީސްގެ އިސްނެންގެވުމަށް ވަނީ ފަށްޓަވާފައެވެ. އެގޮތުން އިންޑިއާ ސަރުކާރުގެ އެހީގައި ރާއްޖޭގެ ކަނޑުގެ ސަރަހައްދުގައި ކުރިއަށްގެންދާ ހައިޑްރޯގްރަފީ ސާރވޭ އެއްބަސްވުން ނިންމުމަކަށް ގެނެސް ދިވެހި އަސްކަރިއްޔާއިން އެކަން ކުރާގޮތަށް ރައީސް ވަނީ ހަމަޖައްސަވާ އެކަމަށް ބަޖެޓުވެސް ފަހިކޮށްދެއްވާފައެވެ. އެހެން ޤައުމަކުން އެކަން ކުރުމުގެ ބަދަލުގައި ދިވެހި ޢަސްކަރިއްޔާ އަމިއްލަ ފައިމައްޗަށް ތެދުވެ، ކަނޑުގެ ސްކޭން ކުރުމާއި، މެޕް ކުރުމުގެ މަސައްކަތް ކުރެވޭނެ ވަސީލަތްތައް ހޯދުމުގެ މަސައްކަތް ސަރުކާރުން ދަނީ ކުރަމުންނެވެ. އެކަމަށް ބޭނުންވާ ސޮފްޓްވެއަރއާއި، ހާޑްވެއަރއާއި އެހެންވެސް ހުރިހާ އެއްޗެހި ގަނެގެން، ދިވެހީން އަމިއްލައަށް އެ މަސައްކަތްކުރުމަށް ދަނީ ތައްޔާރުވަމުންނެވެ.

"އެހެންވީމާ، ކަނޑުގެ އަޑިޔާއި، ވަޔާއި، ކަނޑާއި، އެއްގަމާ، ހުރިހާ ތަނެއްވެސް، އަމިއްލަ ފައިމައްޗަށް ތެދުވެ، އަމިއްލައަށް އަޅުގަނޑުމެން ބަލަހައްޓާނީ. އަމިއްލައަށް އެކަން ކުރާނީ. އިރާދަކުރެއްވިއްޔާ އަމިއްލަވަންތަ، މިނިވަން ޤައުމެއްގެ ގޮތުގައި މި ޤައުމު ދަމަހައްޓާނީ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ހައިޑްރޯގްރަފީ އެއްބަސްވުން ނިމުމަކަށް ގެނައީ ދިވެހި ރައްޔިތުންނަށްޓަކައި، މި ޤައުމުގެ މިނިވަންކަމާއި ސިޔާދަތު ޙިމާޔަތް ކުރުމަށްޓަކައިކަމަށް ރައީސް ވިދާޅުވެފައިވެއެވެ.

ރާއްޖޭގެ ދެކުނުގެ ކަނޑުގެ ބޮޑު ސަރަޙައްދެއް ގެއްލިގެން ދިޔައީއެވެ. އެހެން ދިމާވީ ރާއްޖެއިން ގެންގުޅުނު ސިޔާސަތެއްގެ ސަބަބުންކަމަށް ޤާނޫނީ ފަންނުގެ ބައެއް ބޭފުޅުން ވިދާޅުވެއެވެ. ރައީސް ޑރ.މުޢިއްޒު ވަނީ ވެރިކަމުގެ އެންމެ ފުރަތަމަ ދުވަހުން ފެށިގެން ދެކުނު ކަނޑުން ގެއްލުނު ބައި ހޯދުމުގެ މަސައްކަތް ފަށްޓަވާފައެވެ. އެކަމުގައި ކުރަންޖެހޭ މަސައްކަތް ބޮޑުވުމުން، އެކަމަށްޓަކައި ނަގާ ވަގުތު އިތުރުކަމަށް ސަރުކާރުން ވިދާޅުވެއެވެ. ނަމަވެސް އެކަމަށްޓަކައި ކުރަންޖެހޭ ހުރިހާ މަސައްކަތެއް ކުރާކަމުގެ ޔަޤީންކަން ރައީސް ވަނީ ދެއްވާފައެވެ.

"އަޅުގަނޑުމެންގެ ކަނޑުން ދޫކޮށްލި ބޮޑު ބައި، ޒިންމާދާރު ކަމެއްނެތި، ޤާނޫނާ ޚިލާފަށް ދޫކޮށްލި ބައި ހޯދުމުގައި ފަހަތަށްނުޖެހި ކުރިއަށްދާނަން. އިރާދަކުރެއްވިއްޔާ އެކަންވެސް ހާސިލުކޮށްދޭނަން ރައްޔިތުންނަށް." މިދިޔަ ފެބުރުއަރީ މަހުގެ 6 ވަނަ ދުވަހު ތ.ވޭމަންޑޫގައި ވާހަކަފުޅު ދައްކަވަމުން ރައީސް ޑރ. މުޙައްމަދު މުޢިއްޒު ވިދާޅުވެފައިވެއެވެ.

މި ހުރިހާ ކަމަކާއެކު ރާއްޖޭގެ ކަނޑުގެ ސަރަހައްދު 24 ގަޑިއިރު ބެލެހެއްޓޭނެ ނިޒާމެއް ވަރަށް އަވަހަށް ގާއިމުވެގެން ދާނެކަމުގެ ޔަޤީންކަން ރައީސް ވަނީ ދެއްވާފައެވެ. މިމަހުގެ ކުރީކޮޅު ރ. މީދޫގައި ވާހަކަފުޅު ދައްކަވަމުން ރައީސް ވިދާޅުވެފައިވަނީ ރާއްޖޭގެ އިގްތިސާދީ ސަރަހައްދު މިއަދާ ހަމައަށްވެސް ރަނގަޅަށް ބެލެހެއްޓިފައި ނެތް ކަމަށާއި ނަމަވެސް މާރިޗް މަހުގެ ތެރޭގައި އެ މަސައްކަތް ފެށޭނެކަމަށށް ރައީސް ވިދާޅުވިއެވެ.

"އިރާދަކުރެއްވިއްޔާ މި މާރިޗު މަހުގެ ތެރޭގައި އަޅުގަނޑުމެންނަށް އެ މަސައްކަތް ފެށޭނެ. ހުއްޓުމެއްނެތި 24 ގަޑިއިރު ހުއްޓުމެއްނެތި މި ސަރަހަައްދު ބެލެހެއްޓޭނެ،" ރައީސް ޑރ. މުޙައްމަދު މުޢިއްޒު ވިދާޅުވެފައިވެއެވެ.

ކޮންމެއަކަސް 9 ލައްކަ އަކަ ކިލޯ މީޓަރަށްވުރެ ބޮޑު ބިޔަ ކަނޑުގެ ސަރަޙާއްދު އަބަދާއި އަބަދު ބެލެހެއްޓޭނެ ފެންވަރަށް ދިވެހީންގެ އަމިއްލަ ބާރުވެރިކަން އެދަނީ ޤާއިމްކުރަމުންނެވެ. ދިވެހި ޤައުމުގެ މިނިވަންކަން، ސުވާލެއްނެތި ޙިމާޔަތްކޮށްދޭނެކަން ރައީސް އެ ގެންދަވަނީ ސާބިތުކޮށްދެއްވަމުންނެވެ. މާގިނަ ދުވަހެއް ނުވެ ރައީސް އެ ދެއްވި ޔަޤީންކަން ހަގީގަތަކަށް ވެގެންދާނެއެވެ.