315 ކެންޑިޑޭޓުންނާއެކު މަޖިލިސް ބަހުސް ކާމިޔާބުކަމާއެކު ނިންމާލައިފި
-
އިންތިޚާބުގައި 371 ކެންޑިޑޭޓުން ވާދަކުރައްވާ
-
ބަހުސްގައި 315 ކެންޑިޑޭޓުން ބައިވެރިވެވަޑައިގެންނެވި
-
ބައިވެރިވެވަޑައި ނުގަންނަވަނީ 56 ކެންޑިޑޭޓުުން
ޕަބްލިކް ސަރވިސް މީޑިއާ، ޕީއެސްއެމުން އިންތިޒާމުކޮށްގެން ބޭއްވި " މަޖިލިސް 2024" ބަހުސް ކާމިޔާބުކަމާއެކު ނިންމާލައިފިއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންނަށް ޚާއްޞަކޮށްގެން ކުރިއަށް ގެންދިޔަ ބަހުސް ފަށާފައިވަނީ މިދިޔަ މަހުގެ 20 ވަނަ ދުވަހުއެވެ. އަދި ބަހުސް ނިންމާލީ ރޭގައެވެ. ޕީއެސްއެމްގެ ބަހުސްގައި އެންމެ ފުރަތަމަ ގެނެސްދިނީ މާލޭގެ ދާއިރާތަކުގެ ބަހުސެވެ. އެންމެ ފަހުން ގެނެސްދިނީ އައްޑޫ ސިޓީ ފޭދޫ އުތުރު ދާއިރާގެ ބަހުސެވެ. ބަހުސް ގެނެސްދިނީ ރައްޔިތުންގެ މަޖިލީހުގައި ދާއިރާތައް ތަރުތީބުކޮށްފައިވާ ގޮތަށެވެ.
ކޮންމެ ދުވަހަކުވެސް ފަސް ގަޑިއެއްގައި ޕީއެސްއެމްގެ ޗެނަލްތަކުން ބަހުސް ގެނެސްދިނެވެ. އަދި ޗެނަލްތައް މެދުވެރިކޮށްގެންނާއި، ސޯޝަލް މީޑިއާގެ އެކި ވަސީލަތްތަކުން ގިނަ ޢަދަދެއްގެ ބަޔަކު ވަނީ ބަހުސްތައް ބަލާފައެވެ. ގިނަ ބައެއްގެ ތަރުހީބު ބަހުސަށް ލިބިގެން ދިޔައެވެ.
މަޖިލިސް އިންތިޚާބުގައި 93 ދާއިރާއަށް 371 ކެންޑިޑޭޓުން ވާދަކުރައްވައެވެ. ޕީއެސްއެމުން ވަނީ އެ ހުރިހާ ކެންޑިޑޭޓުންނަށްވެސް ބަހުސްގައި ބައިވެރިވެވަޑައިގަތުމުގެ ފުރުޞަތު ދެއްވާފައެވެ. އޭގެތެރެއިން 315 ކެންޑިޑޭޓުން ބަހުސްގައި ބައިވެރިވެވަޑައިގަތެވެ. ބަހުސްގައި ބައިވެރިވެވަޑައި ނުގަންނަވަނީ 56 ކެންޑިޑޭޓުންނެވެ.
މިފަހަރުގެ ބަހުސްއިން ފެނުނު އެންމެ ބޮޑު ބަދަލަކީ ޢާންމުންނަށް ކެންޑިޑޭޓުންނާ ސުވާލުކުރުމުގެ ފުރުޞަތު ޕީއެސްއެމުން ފަހިކޮށްދިނުމެވެ. އެގޮތުން އެދާއިރާއެއްގެ ކެންޑިޑޭޓަކާ ކުރަން ބޭނުންވާ ސުވާލުތައް އެސްއެމްއެސްގެ ޒަރީއާއިން ހުށަހެޅުމުގެ ފުރުސަތު ހުޅުވާލައި، ޢާންމުން ފޮނުވި ސުވާލުތައް ވަނީ ކެންޑިޑޭޓުންނާ ކުރައްވާފައެވެ.
ޢާންމުންނަށް ސުވާލު ފޮނުވުމަށް ހުލުވާލި ފުރުޞަތުގައި ގިނަ ޢަދަދެއްގެ ސުވާލު ފޮނުވާފައިވެއެވެ.
މިފަހަރުގެ ބަހުސްއިން ފެނުނު އަނެއް ބަދަލަކީ ޢާބާދީ ބޯޑެތި ސަރަހައްދުތަކުން ބަހުސް ގެނެސްދިނުމެވެ. އެގޮތުން ކުޅުދުއްފުށި ސިޓީ، ގދ. ތިނަދޫ، ފުވައްމުލައް ސިޓީ އަދި އައްޑޫ ސިޓީން ވަނީ ބަހުސް ގެނެސްދީފައެވެ.
މިފަދަ ބަހުސެއް ޕީއެސްއެމުން ބޭއްވުމުގެ އެންމެ ބޮޑު ބޭނުމަކީ އިންތިޚާބުގައި ވާދަކުރައްވާ ކެންޑިޑޭޓުން ރައްޔިތުންނަށް ތަޢާރަފްވުމުގެ ފުރުޞަތު ދެއްވުމާއި، ކެންޑިޑޭޓުން ގެންގުޅުއްވާ ސިޔާސަތުތައް ރައްޔިތުންނަށް ހާމަކޮށްދިނުމެވެ.
ކޮންމެއަކަސް މި ބަހުސާއެކު މަޖިލީހުގެ އިންތިޚާބުގައި ވާދަކުރައްވާ ކެންޑިޑޭޓުންގެ ތެރެއިން ރައްޔިތުންގެ ފައިދާއާއި ކުރިއެރުމަށް އަދި ދާއިރާއާއި ޤައުމުގެ ތަރައްޤީއަށް އެންމެ ރަނގަޅު ތަސައްވުރުތަކައި ސިޔާސަތުތައް އެކަށައަޅާފައިވާ ކެންޑިޑޭޓުން ކަނޑައެޅުމަށް ރައްޔިތުންނަށް ފަސޭހަވެގެން ދާނެއެވެ.
ރައްޔިތުންގެ މަޖިލީހުގެ އިންތިޚާބު ބޭއްވުމަށް ނިންމާފައިވަނީ އަންނަ އޭޕްރީލް މަހުގެ 21 ވަނަ ދުވަހުއެވެ.