ހިންނަވަރުގެ ގެދޮރުވެރިކަމުގެ މައްސަލައަށް ދާއިމީ ހައްލެއް ހޯދައިދޭނަން: ރައީސް

މި ސަރުކާރުން، ހިންނަވަރުގެ ގެދޮރުވެރިކަމުގެ މައްސަލައަށް ދާއިމީ ހައްލެއް ހޯއްދަވައިދެއްވާނެކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ހަވީރު ފާދިއްޕޮޅު ހިންނަވަރުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

ހިންނަވަރުގައި ކުރިއަށްދިޔަ މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ މުޅި ރާއްޖޭގެ ތަރައްޤީއަށާއި ރައްޔިތުންނަށް އެންމެ މުހިއްމުކަމަކަށްވެފައި އޮތީ ގެދޮރުވެރިކަމުގެ ދާއިރާއަށް ހައްލު ގެނައުންކަމަށެވެ. ރައީސުލްޖުމްހޫރިއްޔާ ވިދާޅުވީ ޤައުމީ ކަންކަމަށް އިސްކަންދިނުމަށްފަހު ދެން އެންމެ ބޮޑު އިސްކަމެއް ދެއްވާނީ ބޯހިޔާވަހިކަމުގެ މައްސަލައަށް ހައްލު ހޯދައިދިނުމަށްކަމަށެވެ.

ރާއްޖޭގައި ބޯހިޔާވަހިކަމުގެ އެކި މަޝްރޫއުތައް ކުރިއަށްގެންދަވާނެކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ ރާއްޖޭގެ އެކި ކަންކޮޅުތަކުގައި އެޅުމަށް ނިންމާފައިވާ 40،000 ހައުސިންގ ޔުނިޓުގެ މަޝްރޫޢުގައި ހިންނަވަރުވެސް ހިމެނޭނެކަމަށެވެ.

ރައީސުލްޖުމްހޫރިއްޔާގެ ވާހަކަފުޅުގައި ރާއްޖޭގެ އެކި ސަރަޙައްދުތަކުގައި ބިން ހިއްކުމުގެ އެތަކެއް މަޝްރޫޢުތަކެއް ކުރިއަށް ގެންދެވިނަމަވެސް އެތަންތަން މިހާތަނަށް އެންމެ އެދެވޭ ގޮތުގައި ބޭނުން ނުކުރެވިއޮތްކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ، އެފަދަ ބިންތަކުގައި މީހުންނަށް އާބާދުވެވޭނީ އެންމެ އަސާސީ ޚިދުމަތްތައް ގާއިމްކުރެވިގެންކަމަށެވެ. އެހެންކަމުން މިއަހަރުގެ ތެރޭގައި އެފަދަ ބިންތަކުގައި ފެނާއި ކަރަންޓާއި، މަގު ހެދުމުންފަދަ މަޝްރޫޢޫތައް ފައްޓަވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

" ހިއްކާފައި ހުރި ބިމުގައި އާބާދުވަމުންދާއިރު ފެނާ ކަރަންޓް އެޅުމުގެ މަސައްކަތްވެސް އެބަހުރި. އެބިން އޮތީ ހަނަފަސްތަނެއްގެ ގޮތުގައި. އެއްވެސް ބޭނުމެއް ނުހިފޭ. މިގޮތަށް ހިއްކާފައި ހުރި ބިންތަކުގައި އަސާސީ ޚިދުމަތްތައް ޤާއިމްކުރުމުގެ މަސައްކަތް ފަށާނެ. ގިނަދުވަސްވެފައިވާ ހިއްކި ބިންތަކުގައި މިއަހަރުގެ ތެރޭގައި ފެނާ ނަރުދަމާގެ ނިޒާމް ޤާއިމްކުރަން ފެށޭނެ." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ގެދޮރުވެރިކުރުވުމުގެ މަސައްކަތުގެ އިތުރުން، އުމްރާނީ ތަރައްޤީގެވެސް ގިނަ މަޝްރޫޢުތައް ހިންނަވަރުގައި ހިންގަން ޖެހިފައިވާކަމުގައެވެ. އެގޮތުން މަގު ހެދުމާއި، ބަނދަރުގެ މަސައްކަތްވެސް ބަދަލުތަކާއެކު ކުރިއަށްގެންދަވާނެ ކަން އެމަނިކުފާނު ފާހަގަކުރެއްވިއެވެ. ހަމަ އެއާއެކު، ހިންނަވަރުގެ ހިއްކާފައިވާ ސަރަހައްދުގައި ފެނާ ކަރަންޓު އަދި ނަރުދަމާ ފަދަ އަސާސީ ޚިދުމަތް ޤާއިމުކުރުމުގެ މަސައްކަތް މި އަހަރުތެރޭގައި ކުރައްވާނެ ކަމުގައިވެސް ވިދާޅުވިއެވެ.

ހިންނަވަރަކީ، ރައީސުލްޖުމްހޫރިއްޔާ ފާދިއްޕޮޅަށް މިއަދު ފެއްޓެވި ދަތުރުފުޅުގެ ތެރެއިން އެމަނިކުފާނު ވަޑައިގެންނެވި ދެވަނަ މަންޒިލެވެ.