ދިވެހިބަހުން ދައްކާ ވާހަކަ ތާނައިން ލިޔެވޭ "ކޭލި" ސޮފްޓްވެއަރ ޝަރުޢީ ދާއިރާއަށް ތަޢާރަފްކޮށްފި

ދިވެހިބަހުން ދައްކާ ވާހަކަ ތާނައިން ލިޔެވޭ ސްޕީޗް ޓު ޓެކްސްޓް ސޮފްޓްވެއަރ "ކޭލި" ޝަރުޢީ ދާއިރާއަށް ތަޢާރަފުކޮށް އެ ސޮފްޓްވެއަރ މިއަދު އިފްތިތާޙްކޮށްފިއެވެ.

މިކަމަށްޓަކައި ދަރުމަވަންތަ ހޮސްޕިޓަލްގެ ކޮންފަރެންސް ހޯލްގައި ބޭއްވެވި ރަސްމިއްޔާތެއްގައި ކޭލި ސޮފްޓްވެއަރ އިފްތިތާހްކޮށްދެއްވީ ދިވެހިރާއްޖޭގެ އުއްތަމަ ފަނޑިޔާރު އަޙްމަދު މުޢުތަޞިމް ޢަދުނާނެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވިދާޅުވީ މިސޮފްޓްވެއަރއަކީ ކޯޓުތަކަށް ހުށަހެޅޭ މައްސަލަތައް އެކަށީގެންވާ އަވަސް މިނެއްގައި ހިންގުމަށް މަގުފަހުކޮށްދިނުމުގެ ބޭނުމުގައި ތަޢާރަފްކުރި ސޮފްޓްވެއަރއެއްކަމަށެވެ.

މިސޮފްޓްވެއަރ އިފްތިތާހްކުރުމުގެ ރަސްމިއްޔާތުގައި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޙުސްނުއް ސުޢޫދު ދެއްކެވި ވާހަކައިގައި ވިދާޅުވީ މި ސޮފްޓްވެއަރއަކީ ޝަރުޢީ ދާއިރާއިން ޓެކްނޮލޮޖީއަށް ފައިހަމަކޮށް، ޓެކްނޮލޮޖީގެ މާހައުލުގައިވެސް ދިވެހިބަސް ހިފަހައްޓާލެވޭނެކަން ރަމްޒުކޮށްދޭ އަލިގަދަ ދަލީލެއް ކަމަށެވެ.

ހުސްނުއް ސުޢޫދު ވިދާޅުވީ މިސޮފްޓްވެއަރގެ ސަބަބުން ފަސޭހަ ވެގެންދާނީ ހަމައެކަނި ޝަރީއަތުގެ މަޖިލީހުގައި ދެކެވޭ ވާހަކަތަކަށް އަކުރަށް ބަދަލުކުރުމަށް ނޫން ކަމަށާއި، ފަނޑިޔާރުންނަށް ޙުކުމްވެސް މިސޮފްޓްވެއަރއިން ޑިކްޓޭޓް ކުރެވޭނެ ކަމަށެވެ. އަދި އަރބިޓްރޭޝަން ފަދަ މަޖިލިސްތަކުގައި ދެކެވޭ ވާހަކަތައްވެސް އަކުރަށް ބަދަލުކުރެވިގެން ދިއުމަކީ މީގެ ސަބަބުން ލިބޭ ބޮޑު ކުރިއެރުމެއް ކަމަށް ވިދާޅުވިއެވެ.

"ޝަރީޢަތް ނިމުނުގޮތުގެ ރިޕޯޓް ތައްޔާރުކޮށްފަ ހަވާލުކުރަން މިއޮންނަނީ 15 ދުވަސް. އެކަން ހިނގަމުން ނުދޭ އެކަށީގެންވާ ގޮތަކަށް. މިގޮތަށް ހިނގަމުން ނުދިއުމަށް ދިމާވާ ދައްޗަކީ މައިގަނޑު ދައްޗަކީ މަޙްޟަރު ބަޔާންތައް ލިއުން. އެކަމަށް ވަރަށްބޮޑު ކުރިއެރުމެއް ލިބި ފާގަތިކަން ލިބިގެންދާނެ" ސުޢޫދު ވިދާޅުވިއެވެ.

ސުޢޫދު ވިދާޅުވީ މިސޮފްޓްވެއަރ ދެގޮތަކަށް ބޭނުން ކުރެވޭނެކަމަށެވެ. އެއީ ރެކޯޑްކޮށްފަ އަޕްލޯޑްކޮށްގެން ތާނައަށް ކޮންވަރޓް ކޮށްލައިގެންނާއި، ލައިވްކޮށް ދެކެވޭ ވާހަކަތައް ތަރުޖަމާކޮށް ދިވެހިބަހުގެ އަކުރުތަކަށް ކޮންވަރޓްކުރަމުން ލިއުން ކަމަށެވެ.

މިރަސްމިއްޔާތުގައި ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛާ ޢާއިޝަތު ރިޒްނާ ދެއްކެވި ވާހަކައިގައި ވިދާޅުވީ ސްޕީޗް ޓު ޓެކްސްޓް ސޮފްޓްވެއަރއެއް އުފެއްދުމުގެ މަސައްކަތް ފެށީ 2021ވަނަ އަހަރު ކަމަށެވެ. އަދި މިސޮފްޓްވެއަރއަކީ ދިވެހި ޑިވެލޮޕަރުންގެ ޓީމެއް ކަަމަށްވާ އިންޓެލިއަރ ޕާޓްނަރޝިޕުން ކުރެއްވި ބުރަ މަސައްކަތުގެ ނަތީޖާ ކަމަށް ރިޒްނާ ވިދާޅުވިއެވެ. ރިޒްނާ ވިދާޅުވީ ސޮފްޓްވެއަރ ބޭނުންކުރަން ފެށުމަކީ ދިވެހި ބަހަށާއި ޝަރުޢީދާއިރާއަށް އިންގިލާބެއް ގެނުވާނެ ކަމެއްކަމަށެވެ.

"މި ސޮފްޓްވެއަރ ބޭނުންކުރަން ފެށުމުން، ޝަރުޢީ ކޯޓުތަކަށް ދިމާވެފައިވާ އެންމެ ބޮޑު އެއް ގޮންޖެހުންކަމަށްވާ މުވައްޒަފުންނާއި ވަސީލަތް ނެތުމުގެ ސަބަބުން ޝަރީޢަތްތަކުގެ ބަޔާންތައް ޓައިޕްކުރުމުގަ ދިމާވާ ދަތިތަކަށް ހައްލު ލިބި، ޝަރީޢަތްތަކުގައި ދެކެވޭ ވާހަކަ އަކުރުން އަކުރަށް ލިޔެ މަޙްޟަރުކުރުމުގެ މަސައްކަތް ފަސޭހަވެ އަވަސްވެގެންދާނެ" ރިޒްނާ ވިދާޅުވިއެވެ.

ޑީޖޭއޭއިން ހާމަކުރި ގޮތުގައި މީގެ ކުރިން 30 މިނެޓްގެ ބަޔާނެއް ޓައިޕްކުރުމަށް 2 ގަޑިއިރު ހޭދަވެއެވެ. ނަމަވެސް މި ސޮފްޓްވެއަރ ބޭނުންކޮށްގެން 30 މިނެޓްގެ ބަޔާނެއް ޓައިޕްކުރުމަށް ހޭދަވާނީ ގިނަވެގެން 3 މިނެޓްކަމަށެވެ.