މި އަހަރުގެ ހޫނު މޫސުމުގައި އިންޑިޔާ ފަތުރުވެރިންގެ މެދުގައި އެންމެ މަޤްބޫލް މަންޒިލްތަކުގެ ތެރޭގައި ރާއްޖެ ހިމެނިއްޖެއެވެ.
މަޝްހޫރު ހޮޓެލް ބުކިންގ ވެބްސައިޓެއް ކަމަށްވާ ހޮޓެލްސް ޑޮޓް ކޮމްއިން ނެރުނު ތަފާސް ހިސާބްތައް ދައްކާގޮތުން މިއަހަރުގެ ޖެނުއަރީ މަހުގެ އެއްވަނަ ދުވަހުން ފެށިގެން މާރޗްމަހުގެ ނިޔަލަށް އެ ވެބްސައިޓުން ބުކިންގްސް ހަދާފައިވާ ފަރާތްތަކުގެ ތެރެއިން އިންޑިއާ ފަތުރުވެރިންގެ މެދުގައި އެންމެ މަޤްބޫލު މަންޒިލްތަކަކީ ރާއްޖެ، ބެންގކޮކް، ސިންގަޕޫރެވެ.
އިންޑިއާއަކީ ރާއްޖޭގެ ފަތުރުވެރިކަމަށް މުހިއްމު މަރކެޓެކެވެ. އެގޮތުން މި ސަރަޙައްދުގެ ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމަކީ އިންޑިޔާއެވެ.
ރާއްޖޭގެ ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ ދެމަސް ދުވަސްތެރޭ އިންޑިޔާއިން ރާއްޖެއަށް ނުވަހާސް އަށްސަތޭކަ އަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު މި އަދަދަކީ މިދިޔަ އަހަރުގެ އެ މުއްދަތާއި އަޅާބަލާއިރު ވިހި އިންސައްތަ އިތުރު އަދަދެކެވެ.