ޝަރުޢީ ދާއިރާގެ މުވާޞަލާތީ ވިއުގަ އިތުރަށް ތަރައްޤީކުރުމަށްޓަކައި ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނާއި ދިރާގާއި ދެމެދު އެއްބަސްވުމެއްގައި ސޮއިކޮށްފިއެވެ.
ޝަރުޢީ ދާއިރާއަކީ ޒަމާނީ ވަޞީލަތްތައް ފަހިވެފައިވާ ދާއިރާއެއްގެ ގޮތުގައި ތަރައްޤީ ކުރުމަށް، މި މަޝްރޫޢު އެއްކޮށް ފުރިހަމަ ވުމުން، ޝައުރީ ދާއިރާ ކަރުދާހަށް ބަރޯސާވެފައިވާ މިންވަރު ބޮޑުތަން ދަށްކުރެވިގެންދާނެކަން ޖުޑީޝަލް އެޑްމިނިސްޓްރޭޝަނުން ފާހަގަ ކުރައްވައެވެ.
ޝަރުއީ ދާއިރާގެ ނެޓްވޯރކް އިތުރަށް ހަރުދަނާކުރުމަށްޓަކައި ޖުޑީޝަރީ ނެޓްވޯކް ތަރައްޤީކުރުމުގެ މަޝްރޫޢުގެ ނަމުގައި ކުރިއަށްގެންދާ މި މަޝްރޫޢުގެ ދަށުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނާއި 101 މެޖިސްޓްރޭޓް ކޯޓް، އިންޓަގްރޭޓެޑް ކޮމިއުނިކޭޝަން ނެޓްވާރކަކުން ގުޅާލެވި، މިކޯޓުތަކުގައި ޔުނިފައިޑް ކޮމިއުނިކޭޝަން އެންހޭންސްމަންޓް ސޮލިއުޝަނެއް ޤާއިމްކުރެވިގެންދާނެއެވެ.
މިނިޒާމް ޤާއިމްކުރުމުން ފެކްސް ފޮނުވުން ހުއްޓުމަކަށް އައިސް، ޝަރުއީ ދާއިރާގެ މައި ސޮޕްޓްވެއަރ މޯލްޑިވްސް އީ-ކޯޓު މެނޭޖްމަންޓް ސިސްޓަމް މެދުވެރިކޮށް ޑޭޓާ ބަދަލުކުރުމުގެ އިންތިޒާމްތައް ހަމަޖެހިގެންދާނެ ކަމަށް ވެސް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނުން ހާމަކުރެއެވެ.