ދިވެހި ރައްޔިތެއްކަން ދޫކޮށްލަން ބޭނުންވާ މީހުންނަށް އެކަން ކުރެވޭ ގޮތަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ. ބިލެއްދޫ ދާއިރާގެ މެމްބަރު އަޙްމަދު މުބީން "ސިޓިޒެންޝިޕް ޤާނޫނަށް" ހުށައެޅުއްވި އިޞްލާޙު ފާސްވީ ވޯޓުގައި ބައިވެރިވެވަޑައިގެންނެވީ 52 މެމްބަރުންގެ ޢިއްތިފާޤުންނެވެ.
ދިވެހި ރައްޔިތުކަން ދޫކޮށްލަން އެދޭ ކޮންމެ މީހަކަށް އެކަން ކުރެވޭނެ ކަމަށް ޤާނޫނު އަސާސީގައި ބުނެފަވާއިރު، އެފަދަ ޤާނޫނެއް މިހާތަނަށް ވުޖޫދުގައި ނެތުން ހުށަހެޅުއްވި އިޞްލާޙެއްކަމަށް މި އިޞްލާޙު ހުށައެޅުއްވި ބިލެއްދޫ ދާއިރާގެ މެމްބަރު އަޙްމަދު މުބީން ވިދާޅުވިއެވެ.
މި ޤާނޫނަށް މަޖިލީހުން ގެންނެވި އިޞްލާޙުގައި ވަނީ ޢުމުރުން 18 އަހަރުވެފައިވާ ކޮންމެ މީހަކަށް ދިވެހި ރައްޔިތުކަން ދޫކޮށްލެވިދާނެ ކަމަށާއި، އެމީހަކީ އެހެން ޤައުމެއްގެ ރައްޔިތުކަން ލިބިފައިވުން ނުވަތަ އެހެން ޤައުމެއްގެ ރައްޔިތުކަން ލިބޭނެކަމުގެ ޔަޤިންކަން ލިބިފައިވާ ފަރާތަކަށް ވާންޖެހޭނެކަމަށެވެ. އަދި ދިވެހި ރައްޔިތުކަން ދޫކޮށްލާ މީހެއްގެ 12 އަހަރު ނުފުރޭ ދަރިއެއްގެ ދިވެހި ރައްޔިތުކަން ދޫކޮށްލަން އެދޭނަމަ، އެކުއްޖެއްގެ ދިވެހި ރައްޔިތުކަން ދޫކޮށްލެވޭނީ ކުއްޖާގެ މަންމައާއި ބައްޕައާ ދެމީހުންނަކީ ދިވެހި ރައްޔިތުން ކަމުގައި ވެފައި، ދިވެހި ރައްޔިތުކަން ދޫކޮށްލަން އެދެނީ އޭގެ ތެރެއިން އެކަކު ކަމުގައިވާ ޙާލަތުގައި، ކުއްޖާގެ ދިވެހި ރައްޔިތުކަން ދޫކޮށްލުމަށް އަނެއް ބެލެނިވެރިޔާގެ ރުހުން ލިބިގެންކަމަށް ފާސްކުރެއްވި އިޞްލާޙުގައިވެއެވެ. އަދި ކުއްޖާއަށް އެހެން ޤައުމެއްގެ ރައްޔިތުކަން ލިބޭނެކަމުގެ ޔަޤީންކަން ލިބިފައިވާން ޖެހޭނެކަމަށްވެސް ބުނެފައިވޭ. ކޮމެޓީން ގެންނެވި ގިނަ އިޞްލާޙުތަކަށް މެމްބަރުން ތާއީދުކުރެއްވިއެވެ. މަޖިލީހުން ފާސްކުރެއްވި އިޞްލާޙުގައި ދިވެހި ރައްޔިތުކަން ދޫކޮށްލައިފިނަމަ ދިވެހި ރައްޔިތަކަށްވީތީ ލިބިދޭ އެންމެހައި ޙައްޤުތަކާއި އިމްތިޔާޒްތަކާއި ޢިނާޔްތަތައް އެމީހަކަށް ގެއްލޭނެކަމަށް ބަޔާންކޮށްފައިވެއެވެ. އޭގެ ތެރޭގައި، ދިވެހި ޕާސްޕޯޓެއްގައި ދަތުރުފަތުރުކުރުމުގެ ޙައްޤާއި، އިތުރު ހުއްދައެއް ހޯދުމަކާ ނުލައި ރާއްޖެއަށް އެތެރެވުމުގެ ޙައްޤާއި، ރާއްޖޭގައި ބައްވާ އިންތިޚާބުތަކުގައި ވޯޓުލުމާއި، ކުރިމަތިލުމުގެ ޙައްޤު ނުލިބޭނެކަމަށް ރައްޔިތުންގެ މަޖިލީހުން މިއަދު ފާސްކުރެއްވި އިޞްލާޙުގައިވެއެވެ.