އެމްއާރުއެމްއާ ގުޅޭގޮތުން ސިވިލް ކޯޓުން ނިންމި ނިންމުން ހައިކޯޓުގައި އިސްތިއުނާފު ކުރަނީ

ކުރީގެ ރައީސް އަލްއުސްތާޛް މައުމޫން އަބްދުލްޤައްޔޫމް އިސްކޮށް ހުންނަވައިގެން އުފެއްވި، މޯލްޑިވްސް ރިފޯމް މޫވްމަންޓް (އެމްއާރުއެމް) އުވާލުމުގެ މައްސަލައިގައި ސިވިލް ކޯޓުން ކުރި ހުކުމް އިސްތިއުނާފް ކުރަން އިލެކްޝަންސް ކޮމިޝަނުން ނިންމަވައިފިއެވެ.

ސިޔާސީ ޕާޓީއެއްގައި ތިބުން ލާޒިމުވާ 3000 މެންބަރުން ހަމަނުވާތީ އިލެކްޝަންސް ކޮމިޝަނުން ވަނީ މެންބަރުން ހަމަކުރުމަށް މުއްދަތެއް ދިނުމަށްފަހު، އެ މުއްދަތުގެ ތެރޭގައި އެކަން ފުރިހަމަކޮށްފައި ނުވާތީ އެމްއާރުއެމް އުވާލާފައެވެ. ނަމަވެސް އެ މައްސަލަ އެމްއާރުއެމްއިން ސިވިލް ކޯޓަށް ހުށަހެޅުމުން އެ ކޯޓުން ވަނީ އެމްއާރުއެމް އުވާލުމަށް އިލެކްޝަނުން ނިންމީ ޤާނޫނާއި ހިލާފަށްކަމަށް އަންގާރަދުވަހު ހުކުމްކޮށްފައެވެ.

ސިވިލް ކޯޓުގެ ހުކުމުގައި ބުނީ އެމްއާރުއެމް އުވާލަން އިލެކްޝަންސްއިން ދީފައިވާ ނޯޓިސްއަކީ ސިޔާސީ ޕާޓީތަކުގެ ޤާނޫނާ ޚިލާފަށް ދީފައިވާ ނޯޓިސްއެއްކަމަށެވެ. އެގޮތުން، މެންބަރުންގެ އަދަދު ކަށަވަރުކޮށްދޭން ނޯޓިސް ދިނުމުގައި އަމަލުކުރަންޖެހޭ ގޮތަށް އިލެކްޝަންސްއިން އަމަލުނުކޮށްފައިނުވާކަމަށާއި، އަދި އޭގެ ގެއްލުން އެމްއާރުއެމުން އުފުލަން ނުޖެހޭނެ ކަމަށްވެސް ހުކުމްގައިވެއެވެ.

އިލެކްޝަންސް ކޮމިޝަނުގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ސިވިލް ކޯޓުގެ ނިންމުން އެ ކޮމިޝަނުން ހައިކޯޓުގައި އިސްތިއުނާފްކޮށްފައިވާކަމަށެވެ.

އެމްއާރުއެމް އުވާލަން ނިންމުމުގެ ސަބަބުން އެ ޕާޓީން ކޯޓަށް ދާން ޖެހި އެކަމަށް ހޭދަވި ޚަރަދުގެ ބަދަލުގެ ގޮތުގައި 50،000 ރުފިޔާ އެ ޕާޓީއަށް 7 ދުވަހުގެ ތެރޭގައި ދިނުމަށްވެސް ސިވިލް ކޯޓުން ވަނީ އަމުރުކޮށްފައެވެ.