ގަލްފް ސަރަޙައްދުގައި ބާއްވާ އެންމެ ބޮޑު ޓްރެވަލް ފެއަރ ކަމަށްވާ " އަރަބިއަން ޓްރެވަލް މާކެޓް " ގައި ރާއްޖެއިން ސަތޭކަ އެގާރަ ފަރާތަކުން ބައިވެރިވުމަށް ހަމަޖެހިފައިވާކަމަށް މޯލްޑިވްސް މާރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމް.އެމް.ޕީ.އާރު.ސީން ހާމަކޮށްފިއެވެ.
ދުބާއީގައި މިމަހުގެ ފަންސަވީހުން އަށާވީހަށް ބާއްވާ މި ފެއަރގައި ރާއްޖެއިން ބައިވެރިވާ ސަތޭކަ އެގާރަ ފަރާތަކީ ރާއްޖޭގެ ފަންސާސް ދެ ކުންފުންޔަކުން ބައިވެރިވާ ފަރާތްތަކެއްކަމަށް އެމްއެމްޕީއާރުސީން މަޢުލޫމާތުދެއެވެ. އަރަބިއަން ޓްރެވަލް މާކެޓްގައި މެދު އިރުމަތީގެ ޤައުމުތަކުން ފަތުރުވެރިކަމުގެ ސިނާއަތުގައި ހަރަކާތްތެރިވާ ގިނަ އަދަދެއްގެ ބަޔަކު ބައިވެރިވާނެއެވެ. އަދި ސައްބީސް ހާހަށްވުރެ ގިނަ އަދަދަކަށް މީހުން މި ފެއަރ އަށް ޒިޔާރަތްކުރާނެއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން މިދިޔަ އަހަރު މެދު އިރުމަތީގެ ޤައުމުތަކުން ސާޅީސް އެއްހާސް ނުވަސަތޭކަ ހަތްދިހަ ހަ ފަތުރުވެރިން ރާއްޖެއަށް އައިސްފައިވާ އިރު މިއީ 2014 ވަނަ އަހަރާއި އަޅާ ބަލާއިރު 12.8 އިންސައްތަ އިތުރު އަދަދެކެވެ.