ދިރާގުން ސެމްސަންގް ގެލެކްސީ S24ގެ މޮޑެލްތައް ރާއްޖޭގެ ބާޒާރަށް

ދިރާގުން ސެމްސަންގް ގެލެކްސީ S24 ، S24 ޕްލަސް އަދި S24 އަލްޓްރާ ރާއްޖޭގައި ލޯންޗުކޮށްފިއެވެ.

ދިރާގު ހެޑް އޮފީހުގައި ބޭއްވި ޚާއްސަ ހަފްލާގައި ސެމްސަންގްގެ މި ފޯނުތައް ޕްރީ-އޯޑަރ ކުރި ކަސްޓަމަރުންނަށް ވަނީ ފޯނު ޙަވާލުކޮށްފައެވެ. ސެމްސަންގް ގެލެކްސީގެ އެންމެފަހުގެ ފޯނުތައް ލޯންޗުކޮށްފައިވަނީ ސެމްސަންގް ސްރީލަންކާ އަދި ދިވެހިރާއްޖޭގެ މެނޭޖިންގ ޑިރެކްޓަރ، ސެންގްވާ ސޯންގް އަދި ދިރާގުގެ ޑިރެކްޓަރ، ބްރޭންޑް އެންޑް މަރކެޓިންގ ކޮމިއުނިކޭޝަންސް، މުހައްމަދު މިރްޝާން ހަސަނެވެ.

މި ހަފްލާގައި ވާހަކަދައްކަވަމުން ސެމްސަންގް ސްރީލަންކާ އަދި ދިވެހިރާއްޖޭގެ މެނޭޖިންގ ޑިރެކްޓަރ، ސެންގްވާ ސޯންގް ވަނީ 2015ވަނަ އަހަރުން ފެށިގެން ސެމްސަންގާއި ދިރާގާ ދެމެދު ގާއިމްކުރެވިފައިވާ ޕަރޓްނާޝިޕަށް އަލިއަޅުއްވާލައްވާފައެވެ. މީގެ އިތުރުން ސެމްސަންގްގެ ކަސްޓަމަރުން ރާއްޖޭގައި އިތުރުވަމުންދާކަން ފާހަގަކޮށް، އެންމެ ފަހުގެ ސެމްސަންގް ސްމާޓްފޯންތައް ރާއްޖެއަށް ގެނައުމަކީ ސެމްސަންގްއަށް ލިބޭ ވަރަށް ބޮޑު އުފަލެއްކަމަށްވެސް ވަނީ ވިދާޅުވެފައެވެ.

ދިރާގުގެ ޑިރެކްޓަރ، ބްރޭންޑް އެންޑް މަރކެޓިންގ ކޮމިއުނިކޭޝަންސް، މުހައްމަދު މިރްޝާން ހަސަން ވިދާޅުވިގޮތުގައި ސެމްސަންގާއެކު ގާއިމުކުރެވިފައިވާ މި ދެމެހެއްޓެނިވި ޕަރޓްނަރޝިޕްއަކީ ކަސްޓަމަރުންނަށް އެންމެ ރަނގަޅު ސްމާޓް ޓެކްނޮލޮޖީ ފޯރުކޮށްދީ، ޑިޖިޓަލް މުސަތަގުބަލުގައި އެފަރާތްތަކަށް ކުރިއަށް އެރުމަށް މަގުފަހިކޮށްދިނުމަށް ދިރާގުން ކުރަމުންދާ މަސައްކަތުގެ މުހިންމު ބައެކެވެ.

ގެލެކްސީ S24 ސީރީޒްއާ އެކު ސެމްސަންގުން ވަނީ 'ގެލެކްސީ އޭ.އައި' ތައާރަފުކޮށްފައެވެ.
މިދިޔަ ޖަނަވަރީ މަހު ތެރޭގައި ދިރާގުން ވަނީ ޚާއްސަ އޮފާރއަކާ އެކު ސެމްސަންގް ގެލެކްސީ ފޯނުތަކުގެ ޕްރީ-އޯޑަރަށް ހުޅުވާލާފައެވެ. އެގޮތުން ދިރާގުން ގަންނަ ކޮންމެ ފޯނަކާއެކު ކަސްޓަމަރުންނަށް 12 މަސް ދުވަހުގެ ނިޔަލަށް ކޮންމެ މަހަކު 5ޖީބީ ހިލޭ ބޯނަސް ޑޭޓާ ލިބޭނެއެވެ. މީގެ އިތުރުން ދިރާގު ކަސްޓަމަރުންނަށް ގެލެކްސީ S24 ޕްލަސް އަދި S24 އަލްޓްރާއާ އެކު ހިލޭ ގެލެކްސީ ވޮޗް 6 ކްލަސިކްއެއް އަދި S24 އާ އެކު ހިލޭ ގެލެކްސީ ވޮޗްއެއް ލިބޭނެއެވެ.