ޖީޑީޕީ 12 ބިލިއަން ޑޮލަރަށް އިތުރުކުރުމުގައި، ކަސްޓަމްސްއިން މުހިއްމު ދައުރެއް އަދާކުރާނެ: ސަޢީދު

ރާއްޖޭގެ ޤައުމީ އުފެއްދުންތެރިކަން 6 ބިލިއަނުން 12 ބިލިއަން ޑޮލަރަށް އިތުރުކުރުމުގައި މޯލްޑިވްސް ކަސްޓަމްސް ސަރވިސްއިން މުހިއްމު ދައުރެއް އަދާކުރާނެ ކަމަށް އިޤްތިސާދީ ތަރައްޤީ އާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު ސައީދު މިހެން ވިދާޅުވީ ބައިނަލްއަޤްވާމީ ކަސްޓަމްސް ދުވަސް ފާހަގަކުރުމަށް ބޭއްވި ހަފްލާ ޝަރަފްވެރިކޮށްދެއްވާ ވާހަކަދައްކަވަމުންނެވެ. ކޮންމެ އަހަރެއްގައިވެސް ޖެނުއަރީމަހުގެ 26ވަނަ ދުވަސް ފާހަގަކުރަނީ ބައިނަލްއަޤްވާމީ ކަސްޓަސްމްސް ދުވަހުގެގޮތުގައެވެ.

ކަސްޓަމްސް ދުވަސް ފާހަގަކުރުމަށް ބޭއްވި ހަފްލާގައި އިިޤްތިސާދީ ތަރައްޤީއާ ބެހޭ ވަޒީރު މުޙައްމަދު ސަޢީދުވަނީ ރާއްޖޭގެ ޤައުމީ އުފެއްދުންތެރިކަން 6 ބިލިއަނުން 12 ބިލިއަން ޑޮލަރަށް އިތުރުކުރުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެވަޑައިގަންނަވާފައިވާ ވަޢުދުފުޅު ޙަގީގަތަކަށް ހެއްދެވުމަށް، ރާއްވަވާފައިވާ ކަންތައްތަކާ ގުޅޭ މައުލޫމާތު ހިއްސާކުރައްވާފައެވެ.

މިއަމާޒު ހާސިލްކުރުމަށްޓަކާ 4 ކަމަކަށް ފޯކަސްކުރުމަށް ނިންމަވާފައިވާ ކަމަށް ވަޒީރު ވިދާޅުވިއެވެ. އެއީ ޓޫރިޒަމް ސިނާއަތް ވަރުގަދަ ކުރުމާއި، މެރިޓައިމް އިކޮނޮމީ ވަރުގަދަކޮށް، ފުޅާކުރުމާއި، އެއަރ ޓްރާންސްޝިޕްމަންޓު ނުވަތަ އެއަރ ކާގޯ އިތުރުކުރުމާއި، ފައިނޭންޝަލް އިކޮނޮމީ ފުޅާކުރުން ކަމަށް ވިދާޅުވިއެވެ.

ވަޒީރު ވިދާޅުވީ، މެރިޓައިމް އިކޮނޮމީ ވަރުގަދަކުރުމަށްޓަކާ ތަރައްޤީކުރާ ޒަމާނީ އައު ޕޯޓާއެކު ރާއްޖެއަށް އެތެރެކުރާ މުދާ އިތުރުވެގެން ދާނެ ކަމަށެވެ. އަދި އެއަރ ކާގޯ އިތުރުކުރުމަށްވެސް ކަސްޓަމްސްގެ ދައުރު ބޮޑުކަން ވަޒީރު ސައީދު ފާހަގަކުރެއްވިއެވެ.

" ސަރުކާރުގެ ފަރާތުން ޔަޤީންކަން ދެން ކަސްޓަމްސްއަށް ބޭނުންވާ ޒަމާނީ ވަސީލަތްތައް ޤާއިމްކުރުމަށް އެހީތެރިކަންދޭނެ، ޑިޖިޓަލް އިކޮނޮމީއަކަށް ދިޔުމަށް ކަސްޓަމްސްއިން ބޭނުންވާ ކަންތައްތައް ސަރުކާރަށް ހުށަހެޅުމުން ސަރުކާރުން އެކަންތައްތައް ފަހިކޮށްދޭނެ،" ވަޒީރު ސައީދު ވިދާޅުވިއެވެ.

ބައިނަލްއަޤްވާމީ ކަސްޓަމަސް ދުވަސް ފާހަގަކުރުމަށް ބޭއްވި ހަފްލާގައިވަނީ އޮތޮރައިޒްޑް އިކޮނޮމިކް އޮޕަރޭޓަރ ޚިދުމަތާއި، މުދާ ގިންތިކުރުމުގައި އާޓިފިޝަލް އިންޓެލިޖެންސް ނިޒާމް ބޭނުންކުރަން ފެށުން އިފްތިތާހުކޮށްފައެވެ. މިއާއެކު ކަސްޓަމްސްގެ ޚިދުމަތްތައް އަވަސްވެ، ހަރުދަނާވެގެންދާނެ ކަމަށް ކަސްޓަމަސްއިން ހާމަކުރެއެވެ.

މި ހަފްލާގައި ކޮމިޝަނަރ ޖެނެރަލް އޮފް ކަސްޓަމްސް ޔޫސުފް މާނިޢު ވިދާޅުވީ ކަސްޓަމްސްއިން ދެމުން އަންނަ ޚިދުމަތްތަކަށް ޒަމާނީ ގިނަ ބަދަލުތަކެއް އައިސްފައިވާ ކަމަށެވެ. އަދި ޚިދުމަތްތައް އިތުރަށް ތަރައްޤީ ކުރުމަށް ގިނަ މަސައްކަތްތަކެއް ކުރުމަށް ރާވާފައިވާ ކަމަށެވެ.

" ވަރަށް ބައިވަރު ކަންތައްތައް އޮޓޮމޭޓުވެގެންދާނެ، ވަރަށް ފަސޭހައިން އެކިއުރޭޓުކޮށް ޑިޒިޝަންތައް މޭކްކުރުން ބަދަލުވެގެންދާނެ،" ކޮމިޝަނަރ ޖެނެރަލް އޮފް ކަސްޓަމްސް ޔޫސުފް މާނިޢު ވިދާޅުވިއެވެ.

މި ހަފްލާގައިވަނީ ބައިނަލްއަޤްވާމީ ކަސްޓަމްސް ދުވަހުގެ މިދިޔަ އަހަރުގެ ޝިއާރާ ގުޅޭގޮތުން ޚާއްޞަ މަސައްކަތްތަކެއް ކޮށްފައިވާ 17 އޮފިސަރަކަށް ދުނިޔޭގެ ކަސްޓަމްސް ޖަމްއިއްޔާގެ މެރިޓް ސެޓްފިކެޓް ހަވާލުކުރައްވާފައެވެ.