އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއަށް މިދިޔަ މަހު 199 މައްސަލައެއް

ނިމިދިޔަ ޑިސެމްބަރު މަހުގައި އިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާއަށް 199 މައްސަލައެއް ހުށައަޅާ އެޓެންޑްކޮށްފައިވާކަމަށް އެ ވުޒާރާއިން ވިދާޅުވެއްޖެއެވެ. މީގެ ތެރޭގައި ގިނައީ ކުޑަކުދިންނަށް ކުރާ އެކި ބާވަތުގެ އަނިޔާގެ މައްސަލަތަކެވެ.

އިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާއިން އާއްމުކޮށްފައިވާ މިދިޔަ ޑިސެމްބަރުމަހުގެ ތަފާސްހިސާބުތައް ދައްކާގޮތުން ކުޑަކުދިންނަށް ކުރާ އެކި ބާވަތުގެ އަނިޔާއާ ގުޅޭ 76 މައްސަލައެއް ޑިސެންބަރ މަހު ވަނީ ރިޕޯޓުކޮށްފައެވެ. މި ބާވަތުގެ މައްސަލަތަކުގެ ތެރެއިން އެންމެ ގިނައިން ރިޕޯޓުކޮށްފައިވަނީ ޖިސްމާނީ އަނިޔާގެ މައްސަލައެވެ. އެގޮތުން މިބާވަތުގެ 26 މައްސަލައެއް ވަނީ އެވުޒާރާއަށް ހުށަހަޅާފައެވެ.

މީގެ އިތުރުން ޖިންސީ އަނިޔާގެ 14 މައްސަލައަކާއި، އިހުމާލުގެ 11 މައްސަލައަކާއި، އެހެން ކުދިންގެ ފަރާތުން ގޯނާ ލިބުމާއި ފުރައްސާރަ ލިބުމުގެ 10 މައްސަލައެއްވެސް ހިމެނެއެވެ.

ވަކި ޖިންސަކަށް ވީތީ ކުރާ އަނިޔާ އަދި ގެވެށި އަނިޔާގެ 37 މައްސަލަ ޑިސެންބަރ މަހުގެ ތެރޭގައި އެވުޒާރާއަށް ވަނީ ހުށަހެޅިފައިވެއެވެ. މިފަދަ މައްސަލަތަކުގެ ތެރެއިން އެންމެ ގިނައިން ރިޕޯޓްކޮށްފައިވަނީ ނަފްސާނީ އަނިޔާ ކުރުން ނުވަތަ އަނގަ ބަހުން ކުރެވޭ އަނިޔާގެ މައްސަލައެވެ. މިބާވަތުގެ 18 މައްސަލަ ވަނީ ހުށަހެޅިފައެވެ. މީގެ އިތުރުން ޖިސްމާނީ އަނިޔާ ކުރުމުގެ 16 މައްސަލައަކާއި، ޖިންސީ ހާނިއްކަ ކުރުމުގެ 2 މައްސަލަ އަދި ގަދަކަމުން ޖިންސީ ގޯނާ ކުރުމުގެ 1 މައްސަލަ ވަނީ ހުށަހަޅާފައެވެ.

ޢާއިލީ މައްސަލަތަކާއި ގުޅުންހުރި 16 މައްސަލައެއް ޑިސެންބަރ މަހުގެ ތެރޭގައި އެވުޒާރާއަށް ހުށަހަޅާފައިވެއެވެ. މިފަދަ މައްސަލަތަކުގެ ތެރޭގައި ކުދިން ބެލުމުގައި ޖެހޭ މައްސަލަތަކުގެ 9 މައްސަލަ އަދި ކުދިންނާއި ބައްދަލު ކުރުމުގައި ޖެހޭ 7 މައްސަލަ ހިމެނެއެވެ. އަދި އަމިއްލަ ނަފުސަށް ގެއްލުން ދިނުމާއި އަމިއްލައަށް މަރުވާން އުޅުމާއި ގުޅޭ 17 މައްސަލަ ޑިސެންބަރ މަހު އެވުޒާރާއަށް ވަނީ ހުށަހަޅާފައެވެ.

ނުކުޅެދުންތެރިކަން ހުންނަ މީހުންނާއި އުމުރުން ދުވަސްވީ މީހުންނަށް އަޅާލުމާއި އެހީތެރިކަން ބޭނުންވެގެން 22 މައްސަލަ ޑިސެންބަރ މަހުގެ ތެރޭގައި އެވުޒާރާއަށް ވަނީ ހުށަހަޅާފައެވެ. އަދި ކުށުގެ ވެއްޓަށް ހުށަހެޅިދާނެފަދަ އަމަލުތަކާއި ގުޅިގެން 2 މައްސަލައެއް ޑިސެންބަރ މަހުގެ ތެރޭގައި އެވުޒާރާއަށް ވަނީ ހުށަހަޅާފައެވެ.

ކުޑަކުދިންގެ އަޚުލާޤާއި ގުޅުން ހުރި 20 މައްސަލައެއް ޑިސެންބަރު މަހު ހުށައަޅާފައިވާއިރު، މީގެ ތެރޭގައި ގެއިން ނިކުމެގެން ދިއުމުގެ 5 މައްސަލަ އަކާއި ރުޅިގަދަވުން ނުވަތަ ރުޅި އިސްކުރުމުގެ 4 މައްސަލައާ ސްކޫލަށް ދާން ބޭނުން ނުވުމުގެ 4 މައްސަލައިގެ އިތުރުން ސުލޫކީ މައްސަލައިގެ 3 މައްސަލައާ ކުށުގެ ވެއްޓަށް ހުށަހެޅިދާނެފަދަ އަމަލުތަކުގެ 2 މައްސަލައެއް ހިމެނެއެވެ.

ޑިސެންބަރ މަހުގެ ނިޔަލަށް ދައުލަތުގެ ބެލުމުގެ ދަށުގައި ތިބި ކުދިންގެ ޖުމުލަ ޢަދަދަކީ 159 އެވެ. ދައުލަތަށް އަލަށް 2 ކުއްޖަކު ނަގާފައިވާއިރު، 5 ކުއްޖަކު އާއިލާއަށް ރީއިންޓަރގްރޭޓް ކުރެވި، 2 ކުއްޖަކު ފޮސްޓަރކޮށްފައިވާކަމަށް އިޖުތިމާޢީ އަދި ޢާއިލީ ތަރައްޤީއާއި ބެހޭ ވުޒާރާއިން ވިދާޅުވިއެވެ.