އެމްޑީޕީއާއި ޑިމޮކްރެޓްސް ގުޅުނަސް ސަރުކާރު ހުއްޓުމަކަށް ނުގެނެވޭނެ: އަބްދުއްރަހީމް

ސަރުކާރު ހުއްޓުމަކަށް ގެންނަން އިދިކޮޅު ސިޔާސީ ޕާޓީތަކުން ކުރާ މަސައްކަތް ކާމިޔާބުނުވާނެކަމަށް ސަރުކާރު ކޯލިޝަންގައި ހިމެނޭ ކޮންގްރެސް ޕާޓީގެ ޗެއަރޕާސަން އަދި ސްޕެޝަލް އެޑްވައިޒަރ ޓު ދަ ޕްރެސިޑެންޓް އަބްދުއްރަހީމް އަބްދުﷲ ވިދާޅުވެއްޖެއެވެ.

އަބްދުއްރަހީމް މިހެން ވިދާޅުވެފައި މިވަނީ އެމްޑީޕީއާއި ދަ ޑިމޮކްރެޓްސްއިން މަޖިލީހުގައި ގުޅިގެން މަސައްކަތްކުރުމަށް ނިންމާފައިވާ ދަނޑިވަޅެއްގައެވެ.

ނޫސްވެރިންނަށް މައުލޫމާތު ދިނުމަށް ޕީޕީއެމް ޕީއެންސީން ބޭއްވި ބައްދަލުވުމެއްގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ އެމްޑީޕީއާއި ދަ ޑިމޮކްރެޓްސްއިން އުޅެނީ ސަރުކާރު ހުއްޓުމަކަށް ގެނައުމަށްކަަމަށެވެ. އެގޮތުން ސިޔާސީ މަޤާމުތަކަށް އައްޔަންކުރާ ބޭފުޅުންގެ އަދަދު ކަނޑައަޅަން އެ ޕާޓީތަކުން ކުރަން ނިންމާފައިވާ މަސައްކަތަކީ އޭގެ ހެއްކެއްކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ ރައްޔިތުންގެ މަޖިލީހުގެ މެމްބަރުންގެ އަދަދު ވަކި މިންވަރެއްގައި ހިފެހެއްޓުމަކީ ޕީޕީއެމް ޕީއެންސީގެ ވިސްނުމެއްކަމަށާއި، ނަމަވެސް އިދިކޮޅު ފަރާތްތަކުން އެކަން ކުރަން އުޅެނީ އެހެން މަޤްޞަދެއް އޮވެގެންކަމަށެވެ.

އަބްދުއްރަހީމް ވިދާޅުވީ ރައީސުލްޖުމްހޫރިއްޔާގެ މަސްއޫލިއްޔަތުތައް އަދާކުރެއްވުމަށް ސިޔާސީ މަގާމުތަކަށް މީހުން އައްޔަން ކުރެއްވުމަކީ އެމަނިކުފާނަށް ޤާނޫނުއަސާސީން ލިބިދޭ ބާރެއް ކަމަށެވެ. އަދި މި ސަރުކާރުން މަޤާމުތަކަށް ބޭފުޅުން އައްޔަންކުރަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ރައްޔިތުންނަށް ވެވަޑައިގެންނެވި ވަޢުދުތައް ފުއްދެވުމުގެ ޒިންމާ އަދާކުރެއްވުމަށްކަމަށްވެސް އަބްދުއްރަހީމް ވިދާޅުވިއެވެ.

"ކީއްވެގެންތޯ އެ ބޭފުޅުން ސަރުކާރުގައި ތިއްބެވިއިރު، އެ ބޭފުޅުންގެ އަތްޕުޅުގައި މަޖިލިސްގެ ސުޕަ މެޖޯރިޓީ އޮވެ އެ ބަދަލު ނުގެންނެވި. 1200، 1300، 1400 އަށް ދަންދެން ސިޔާސީ މީހުން އިތުރުކުރެއްވީ ކީއްވެގެންތޯ؟ އަޅުގަނޑުމެން ރައީސް ވިދާޅުވި 700 ވުރެ އިތުރު ނުކުރައްވާނެ ވާހަކަ. އަދި މިހާތަނަށް އައިއިރު އެ ހިސާބާ ކައިރިވެސް ނުވޭ،" އަބްދުއްރަހީމް ވިދާޅުވިއެވެ.

ސަރުކާރުގެ ޚާރިޖީ ސިޔާސަތާއި ގުޅޭގޮތުން އެމްޑީޕީ އަދި ޑިމޮކްރެޓްސްއިން ފާޅުކުރި ކަންބޮޑުވުންތަކަށް އިޝާރާތްކުރައްވައި އަބްދުއްރަހީމް ވިދާޅުވީ ރާއްޖެއިން އަބަދުވެސް ގެންގުޅެނީ މެދުމިނުގެ ޚާރިޖީ ސިޔާސަތެއް ކަމަށާއި މި ސަރުކާރުންވެސް ގެންގުޅެނީ އެ ސިޔާސަތު ކަމަށެވެ.

އަބްދުއްރަހީމް ދެއްކެވި ވާހަކައިގައި ވަނީ ވަޒީރުންނަށް ރުހުން ނުދީ ލަސްކުރަމުންދާތީ އެކަމަށް ފާޑު ވިދާޅުވެފައެވެ. އެގޮތުން އެއީ ޒިންމާދާރުކަން ކުޑަކަމެއްކަމަށާއި ވަޒީރުންނަށް ރުހުން ނުދީ ލަސްކުރަމުންދަނީ ސަރުކާރު ހުއްޓުވުމުގެ ބޭނުމުގައިކަމަށްވެސް އަބްދުއްރަހީމް ތުހުމަތުކުރެއްވިއެވެ.