މަސައްކަތްކުރަނީ ބޭރުގެ ހަނގުރާމައަށް ގޮސްތިބި ހުރިހާ ދިވެހިން ރާއްޖެ ގެނައުމަށް: އިޙްސާން

ބޭރުގައުމުތަކުގައި ހިންގަމުންދާ ދާޚިލީ ހަނގުރާމަތަކަށް ގޮސް ހާލުގައި ޖެހިފައިތިބި ހުރިހާ ދިވެހިން، ރާއްޖެ ގެނެވެންދެން ސަރުކާރުން ހުއްޓާނުލާ މަސައްކަތް ކުރައްވާނެކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙުސާނު ވިދާޅުވެއްޖެއެވެ.

ދާޚިލީ ހަނގުރާމައަށް ގޮސް ހާލުގައިޖެހިފައިވާ ދިވެހިން ގެނައުމުގެ މަސައްކަތް ސަރުކާރުގެ ފުރަތަމަ ދުވަހުން ފަށައިގެންވެސް ވަނީ ފަށްޓަވާފައެވެ. ނިމުނު ހަފްތާގެ ތެރޭގައި ވަނީ ސޫރިޔާ-ތުރުކީ ބޯޑަރުގައި ހާލުގައި ޖެހިފައިވާ ދިވެހި 21 ދިވެހީން ރާއްޖެ ގެނެސްފައެވެ. މީގެތެރޭގައި ހިމެނެނީ 18 އަހަރުން ދަށުގެ 14 ކުދިންވެސް ހިމެނެއެވެ.

ވަޒީރު ވިދާޅުވީ ބޭރުގައި ހިނގަމުންދާ ހަނގުރާމައަށް ދާ މީހުންނަކީ، އެކަމުގެ ޙަޤީގަތް ރަނގަޅަށް ނޭނގި، ބައެއްގެ ނުފޫޒު އޭގައި ވަރަށްބޮޑަށް ހިމެނިގެން ދާ މީހުންކަމަށެވެ. ހަނގުރާމައަށްދާ މީހުންނާމެދު ކުރިމަތިވާ ލާއިންސާނީ ޙާލަތާއި، ތުއްތުކުދިންނަށް ދިމާވާ ހިތާމަވެރި ޙާލަތްތައް އެނގެނީ އެތަނަށް ދާ ފަހުންކަމަށްވެސް ވަޒީރު ވިދާޅުވިއެވެ.

އިޙުސާން ވިދާޅުވީ ހަނގުރާމަވެރި ސަރަޙައްދުތަކުގައި މިހާރުވެސް 100އަށްވުރެ ގިނަ ދިވެހިން ތާށިވެފައި ތިބިކަމުގެ މަޢުލޫމާތު ލިބިފައިވާކަމަށެވެ. ސަރުކާރުގެ އެންމެ ބޮޑު ޢަމާޒަކީ މި މީހުން އަވަހަށް ރާއްޖެ ގެނެސް، ފަރުވާގެ ނިޒާމު ފުރިހަމަކޮށް އަނބުރާ މުޖުތަމަޢުއަށް ނެރުންކަމަށް ފާހަގަކުރައްވާ ވަޒީރު ވިދާޅުވީ، މިހާތަނަށް ރާއްޖެ ގެނެސްފައިވާ 21 މީހުން ގެނައުމުގެ މަސައްކަތަކީވެސް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ތުރުކީއަށް ކުރެއްވި ދަތުރުފުޅުގެތެރެއިން، އެ ޤައުމުގެ ސަރުކާރާއެކު ވަރަށް ބޮޑަށް މަޝްވަރާކުރައްވާ ހޯއްދެވި ފުރުޞަތެއްކަމަށެވެ.

ދާޚިލީ ވަޒީރު ވިދާޅުވީ، ހަނގުރާމައަށް ގޮސްފައިތިބި 100 މީހުން ގެ ފުރިހަމަ މަަޢުލޫމާތާއި، އެމީހުން ތިބި ތަންތަންވެސް އެންމެ ރަނގަޅަށް ކަށަވަރު ނުވާކަމަށެވެ. ބައެއް މީހުން ތިބީ ރާއްޖެއާއި ޚާރިޖީ ގުޅުންތައް އެންމެ ރަނގަޅަށް ޤާއިމުވެސްފައި ނުވާ ސަރަޙައްދުތަކަށްވުމާއެކު އެކަމުގެ ގޮންޖެހުންތައް ހުރިނަމަވެސް، ސަރުކާރުން މަސައްކަތްކުރަމުންދަނީ ހުރިހާ ދިވެހިން ރައްކާތެރިކަމާއެކު ރާއްޖެއަށް އަނބުރާ ގެނައުމަށްކަމަށް ދާޚިލީ ސަލާމަތާބެހޭ ވަޒީރު ޢަލީ އިޙުސާން ވިދާޅުވިއެވެ.

"ސީރިއާއިން ވަކިވެގަތުމަށް ހަނގުރާމަ ކުރާ ކޭމްޕެއްގައިވެސް ދިވެހިން ތާށިވެފައި އެބަތިބި. ބައެއް ސަރަޙައްދުތަކަކީ، ނުވަދެވޭ އަދި މުވާސަލާތްވެސް ނުކުރެވޭ ސަރަޙައްދުތައް. މިގޮތަށް ޙާލުގައި ޖެހުމަށްފަހު ގެނައުމަށް އުނދަގޫ. ނަމަވެސް ރައީސްގެ އިރުޝާދަކީ ކެނޑިނޭޅި މަސައްކަތްކޮށް ދިވެހި ހުރިހާ ރައްޔިތުން ދެނެގަނެ ސަލާމަތުގެ އައްސޭރިއަކަށް ގެނެވެންދެން މަސައްކަތްކުރުން." ދާޚިލީ ސަލާމަތާބެހޭ ވަޒީރު ޢަލީ އިޙުސާން ވިދާޅުވިއެވެ.

ވަޒީރު ވިދާޅުވީ ހަނގުރާމައިން ގެންނަ ދިވެހިންނަށް މުޖުތަމަޢުއަށް ނެރުމަށް ހިންގާ ޕްރޮގްރާމްތަކަކީ ވަރަށް ހަރުދަނާކަމާއެކު ކުރެވޭ ބޮޑު މަސައްކަތެއްކަމަށެވެ. މިގޮތަށް ރިހެބިލިޓޭޝަންގައި ތިބޭއިރު އެމީހުންގެ ވިސްނުމާއި ޢަމަލުތައް ހުންނަގޮތް ވަރަށް ގާތުން މޮނިޓަރ ކުރެވޭކަމަށް ވަޒީރު ވިދާޅުވިއެވެ. މިކަމުގައި އެއްވެސް ގޯހެއް ފާހަގަކުރެވިއްޖެނަމަ ތަޙުޤީޤުކޮށް، ޓެރަރިޒަމް މަނާކުރުމުގެ ޤާނޫނުގެދަށުން ފިޔަވަޅު އަޅާނެކަމަށްވެސް ދާޚިލީ ސަލާމަތާބެހޭ ވަޒީރު ވިދާޅުވިއެވެ.

"އަދި ދިމައެއް ނުވޭ އަމިއްލަ "ވިލް"ގައި ހަނގުރާމައަށް ދިޔަ މީހެއް. އެސެސްމަންޓްތައް އެބަ ހަދަން ވިސްނުން ދެނެގަންނަން. އެމީހުންގެ ވިސްނުން ހުރި ނެތް ގޮތް ބަލާ ޓެރަރިޒަމްގެ ޤާނޫނަށް ބަލާ ތަޙުޤީޤަކަށްވެސް ބަދަލުކުރާނަން. އެފަދަ ޙާލަތުގައި ކުޑަކުދިން ދަޢުލަތަށް ނަގާ ޤާނޫނީ އޮނިގަނޑުގެ ތެރެއިން ބަލަހައްޓަމުންދާނެ." ދާޚިލީ ސަލާމަތާބެހޭ ވަޒީރު ޢަލީ އިޙުސާން ވިދާޅުވިއެވެ.

ވަޒީރު ވިދާޅުވީ މި މައްސަލަ ޙައްލުކުރުމުގައި އެންމެ ބޮޑު އިސްކަމެއް ދޭނީ މުޖުތަމަޢު މިކަމަށް ހޭލުންތެރިކުރުމާއި ދީނީގޮތުން ސައްޙަ މަޢުލޫމާތު ފޯރުކޮށްދިނުމަށްކަމަށެވެ. އަދި އެފަދަ މީހުން ހަނގުރާމައަށް ގޮސް، އެމީހުންނަށް ކުރިމަތިވާ ޙާލަތު ތިލަކޮށްދޭނެކަމަށްވެސް ވަޒީރު ވިދާޅުވިއެވެ.

ސަރުކާރުން އިސްކަންދޭނީ، ނުރައްކާތެރި ފިކުރާއި، ހަނގުރާމައާއި އެފަދަ ވިސްނުންތަކަށް މީހާ ހުށައެޅުމުގެ ކުރިން، އެކަމުން ސަލާމަތްކުރަންކަމަށް ދާޚިލީ ސަލާމަތާއި ފަންނިއްޔަތާ ބެހޭ ވަޒީރު ޢަލީ އިޙުސާން ވިދާޅުވިއެވެ.