މިދިޔަ 5 އަހަރު މާލޭގައި 42000 އަށްވުރެ ގިނަ އެއްގަމު އުޅަނދު ރަޖިސްޓްރީކުރި
-
ޓްރެފިކް މައްސަލައަކީ މާލެ ސަރަހައްދަށް ދިމާވެފައިވާ އެންމެބޮޑު އެއް މައްސަލައެއް
-
މުޅި ރާއްޖޭގައި 69،780 އުޅަނދު ރަޖިސްޓްރީ ކުރި
-
ރަޖިސްޓްރީކުރުމުގެ ކަންކަން ޤާނޫނުގެ ތެރެއިން ކަނޑައެޅިފައިވާ ނިޒާމެއްގެ ތެރެއިން ކުރަން ޖެހޭ
ފާއިތުވި ފަސް އަހަރުދުވަހުގެ ތެރޭގައި މާލެ ސަރަހައްދުގައި އެކަނި 42،000އަށްވުރެ ގިނަ އުޅަނދު ރަޖިސްޓްރީ ކޮށްފައިވާކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
ނޫސްވެރިންނަށް މައުލޫމާތު ދެއްވަމުން ވަޒީރު އަމީން ވިދާޅުވީ ވެހިކަލް ރަޖިސްޓްރީކުރުމުގެ ކަންކަން ކަނޑައެޅިފައިވާ ޤާނޫނީ ނިޒާމުގެތެރެއިން ކުރަންޖެހޭ ކަމަށެވެ. އެގޮތުން ހުރިހާ ޚިދުމަތެއް އެއް ޕޯޓަލަކުން ދެވޭގޮތަށް ބަދަލު ގެންނަން ޖެހޭ ކަމަށާ، އެ ބަދަލު ކުރިއަށް އޮތް ހަތަރު މަސް ދުވަހުގެ ތެރޭގައި ގެނެވޭނެކަމަށް ވެސް އަމީން ވިދާޅުވިއެވެ.
ޓްރެފިކް މައްސަލައަކީ މާލެ ސަރަހައްދަށް ދިމާވެފައިވާ ވަރަށްބޮޑު މައްސަލައެއްކަން ފާހަގަކުރައްވައި ވަޒީރު އަމީން ވިދާޅުވީ އެކަމަށް ހައްލެއް ހޯދަން ޖެހޭ ކަމަށެވެ. އަދި އެކަން ކުރުމަށް ސަރުކާރުގެ ހުރިހާ ފަރާތްތަކާ ގުޅިގެން މަސައްކަތް ކުރައްވަމުންދާ ކަމަށްވެސް އަމީން ވިދާޅުވިއެވެ.
އަމީން ވިދާޅުވީ މި ފާއިތުވި ފަސް އަހަރު ދުވަހުގެ ތެރޭގައި ރާއްޖޭގައި 69،780 އުޅަނދު ރަޖިސްޓްރީ ކޮށްފައިވާއިރު އޭގެ ތެރެއިން 42،000 އަށްވުރެ ގިނަ އުޅަނދަކީ މާލެ ސަރަހައްދުގައި ރަޖިސްޓްރީކޮށްފައިވާ އުޅަނދުތައް ކަމަށެވެ. މިގޮތަށް މިކަން ކުރިއަށްދާނަމަ ކޮންޓޯލްނުކުރެވޭ މިންވަރަށް މިމައްސަލަ ބޮޑުވެދާނެކަމަށް މިނިސްޓަރ ވިދާޅުވިއެވެ.
"މި ދެންނެވީ ވޭތުވެދިޔަ ފަސް އަހަރު ތެރޭގައި 42،000 އަށްވުރެ ގިނަ ދުއްވާ އުޅަނދު އެބަހުއްޓޭ ރަޖިސްޓްރިކޮށްފައި. މިއީ ވަރަށް ދެރަކޮށް ހިނގާ ކަމެއް. ޤާނޫނެއްގެ ތެރެއިން އުސޫލުއްގެ ތެރެއިން އަޅުގަނޑުމެން މިކަން ކުރަން ބޭނުންނަމަ ހެޔޮހިތައިގެން ކޮށްފިނަމަ އަޅުގަނޑަކަށް ހިއެއް ނުވޭ މިއަދަދަކަށް ރަޖިސްޓްރީވާނެހެނެއް.،" ވަޒީރު އަމީން ވިދާޅުވިއެވެ.
މާލެއަށް ދިމާވެފައިވާ ޓްރެފިކް މައްސަލަ ޙައްލުކުރުމަށް ބައިނަލްއަގުވާމީ މާލީ އެހީތެރިކަމާއެކު ޕްރޮފެޝަނަލް އެހީތައްވެސް ހޯދުމުގެ މަޝްރޫއެއް ފަށްތަވާނެކަމަށް ވަޒީރު ވިދާޅުވިއެވެ. އަދި ޓްރެފިކް ކޮންޓްރޯލް ކުރުމަށް ކާމިޔާބު ޤައުމެއްގެ ތަޖުރިބާކާރުން ގެނެސްގެން ހައްލު ހޯދުމަށް މަސައްކަތް ކުރުމަށް ފޮރިން މިނިސްޓްރީގައި އެދިވަޑައިގެންފައިވާނެކަމަށް ވެސް ވަޒީރު ވިދާޅުވިއެވެ.