ޤައުމެއް ތަރައްގީވާނީ ވެރިންނާއި ރައްޔިތުންގެ ބަދަހި ގުޅުމެއް އޮވެގެން: ރައީސް
-
ތަރައްޤީގެ ވިސްނުންތައް އުފަންވާންވާނީ ރައްޔިތުންގެ ސިކުނޑިތަކުގައި
-
2023ގެ ފަހު ހަފުތާ އަދި 2024ގެ ފުރަތަމަ ހަފުތާތަކަކީ، ތަރައްގީގެ ޚާއްސަ މޫސުމެއް
-
އިވޭ އަޑުތަކާއި، ލިބޭ މަޢުލޫމާތުން ދޮގުތެދު ވަކިކުރާ އަހަރަކަށް ހަދަން އެދިވަޑައިގެންނެވި
ޤައުމެއް ތަރައްގީވާނީ ވެރިންނާއި ރައްޔިތުންގެ ބަދަހި ގުޅުމެއް ހިމެނިގެން ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އައު އަހަރުގެ ތަހުނިޔާ ވިދާޅުވެ ފޮނުއްވި ޚިތާބުގައެވެ.
ރައީސްގެ ޚިތާބުގައި ވިދާޅުވީ ފާއިތުވި އަހަރަކީ ދިވެހިން މުހިންމު ނިންމުންތަކެއް ނިންމި އަހަރެއް ކަމަށާއި އައު އަހަރަށް ދިވެހިން ދެކޭ ހުވަފެންތައް ބިނާވެފައިވަނީ އެ އުއްމީދުތަކާއި ތަސައްވުރުތަކުގެ މައްޗަށް ކަމަށެވެ. އަދި ތަރައްޤީ ފެށިގެން އަންނަންވާނީ ތިރިން މައްޗަށް ކަމަށާއި ތަރައްޤީގެ ވިސްނުންތައް އުފަންވާންވާނީ ރައްޔިތުންގެ ސިކުނޑިތަކުގައިކަން ގަބޫލުކުރައްވާ ކަމަށް ވެސް އެމަނިކުފާނު ވިދާޅުވިއެވެ. އަދި ރައްޔިތުން މަސްއޫލިއްޔަތު ހަވާލުކުރާ ފަރާތްތަކުގެ ވާޖިބަކަށް ވާންވާނީ، މާތް ﷲއަށް ބިރުވެތިވެ، ތެދުވެރިކަމާއި ވަފާތެރިކަމާއެކު، އެ ޒިންމާތަކާއި މަސްއޫލިއްޔަތުތައް ފުރިހަމައަށް އަދާކުރުންކަމަށް ވެސް ރައީސް ފާހަގަކުރެއްވިއެވެ.
އަދި ވެރިންނާއި ރައްޔިތުންގެ ބަދަހި ގުޅުމެއް ޤައުމުގެ ތަރައްގީއަށް މުހިންމުކަން ފާހަގަކުރައްވައި ރައީސް ވިދާޅުވީ ވެރީން ރައްޔިތުންނަށް ރަހުމުހުރި ބަޔަކަށްވެ ވަޢުދަށް ކަމޭ ހިތަން ޖެހޭނެ ކަމަށެވެ. އަދި ރައްޔިތުން ވެރީންނަށް ކިޔަމަންވާން ޖެހޭ ކަމަށާއި އެއްބަޔަކު އަނެއްބަޔަކަށް އެއްބާރުލުން ދޭން ޖެހޭ ކަމަށެވެ.
މީގެ އިތުރުން ތަރައްޤީއަށްޓަކައި ވިސްނުންތެރިކަމާއި ހަމަޖެހުމާއި ތެދުވެރިކަމާއި އިޚްލާޞްތެރިކަން ބޭނުންވާކަން ރައީސް ފާހަގަކުރެއްވިއެވެ. އެހެންކަމުން، އައު އަހަރަކީ ތިމާގެ އަމިއްލަ ނަފުސު ތެދުވެރިކަމުގެ މައްޗަށް ބިނާކުރާ އަހަރަކަށް ހެދުމަށް އެމަނިކުފާނު އެދިވަޑައިގެންނެވިއެވެ.
ރައީސް ވިދާޅުވީ ނިމިދިޔަ އަހަރުގެ ފަހު ހަފުތާތަކާއި، މި ފެށުނު އަހަރުގެ ފުރަތަމަ ހަފުތާތަކަކީ، ތަރައްގީގެ ވަރަށް ޚާއްސަ މޫސުމެއް ކަމަށެވެ. އަދި މިއީ މި ސަރުކާރުގެ ހަފުތާ 14އިގެ ތެރޭގައި ގިނަގުނަ ވަޢުދުތަކެއް އަކުރުން އަކުރަށް ފުއްދަވަމުންދާ ދުވަސްތަކެއް ކަމަށް ވެސް ވިދާޅުވިއެވެ.
އައު އަހަރަކީ އިވޭ އަޑުތަކާއި، ލިބޭ މަޢުލޫމާތުން ދޮގުތެދު ވަކިކުރާ އަހަރަކަށް ހެދުމަށާއި ޙަޤީޤަތް ޤަބޫލުކޮށް، އައު އުންމީދުތަކާއި، އައު ކުރިއެރުންތަކާއެކު ހަލުވިކޮށް ކުރިއަށްދާ އަހަރެއް ކަމުގައި ހެދުމަށް ވެސް ރައީސުލްޖުމްހޫރިއްޔާ އެދިވަޑައިގެންނެވިއެވެ.