ސްވިސް ކޮންފެޑެރޭޝަނަށް ދިވެހިރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް ޑރ.ހާލާ ޙަމީދު އައްޔަންކުރެއްވުމަށް ދިރާސާކުރުމަށް ރައްޔިތުންގެ މަޖިލީހުގެ ޤައުމީ ސަލާމަތާ ބެހޭ ކޮމިޓީއަށް ފޮނުއްވައިފިއެވެ. ޑރ.ހާލާ ޙަމީދު ސަފީރުކަމަށް އައްޔަންކުރެއްވުމަށް އެދިވަޑައިގެން، ރައީސުލްޖުމްހޫރިއްޔާ މަޖިލީހަށް ފޮނުއްވަވާފައިވާ ސިޓީ ވަނީ މިއަދުގެ ޖަލްސާއަށް އިއްވަވާފައެވެ.
ޑރ.ހާލާ މިހާރު މިހާރު އިންނަވަނީ ޖެނީވާގައި ހުންނަ އދ. އޮފީހުގެ ދާއިމީ މަންދޫބުގެ މަޤާމުގައެވެ. ހާލާ ޙަމީދު ވަނީ ރައީސް އޮފީހުގައި ގިނަ ދުވަސްތަކެއް ވަންދެން މަސައްކަތް ކުރައްވާފައެވެ. އަދި ނޭޝަނަލް އިންޓަގްރިޓީ ކޮމިޝަނުގެ ނައިބް ރައީސްކަމާއި، ޖެންޑާ މިނިސްޓްރީގެ ސްޓޭޓް މިނިސްޓަރުގެ މަޤާމުވެސް އަދާކުރައްވައިފައިވެއެވެ. މީގެ އިތުރުން ފޮރިން މިނިސްޓްރީގެ އެޑިޝަނަލް ސެކްރެޓަރީގެ މަޤާމާއި، އެމްބެސެޑާ އެޓް ލާޖްގެ މަގާމުވެސް ފުރުއްވާފައިވެއެވެ.