ބޯހިޔާވަހިކަމުގެ ސިޔާސަތުގެ ދަށުން، ސަރުކާރުން ނ. މަނަދޫގައި ޢިމާރާތްކުރައްވާ 25 ހައުސިންގ ޔުނިޓްގެ ތެރެއިން، މަސައްކަތް ހުއްޓިފައި ހުރި 10 ހައުސިންގ ޔުނިޓްގެ މަސައްކަތްކުރާނެ ބަޔަކު ހޯއްދެވުމަށް އިޢުލާން ކުރައްވައިފިއެވެ. 2012 ވަނައަހަރު ފެއްޓެވި މި މަޝްރޫޢުގެ ދަށުން، މިހާތަނަށް ނިމިފައިވަނީ 15 ހައުސިންގ ޔުނިޓްގެ މަސައްކަތެވެ. އަދި އެ ޔުނިޓްތަކުގައި މިހާރު މީހުން ދިރިއުޅެމުންދެއެވެ.
ނުނިމި ހުރި 10 ހައުސިންގ ޔުނިޓަކީ ދެ ކުންފުންޏަކާ ޙަވާލު ކުރައްވައިގެން ކުރިއަށް ގެންދެވި މަސައްކަތެކެވެ. ނަމަވެސް ޢިމާރާތުގެ ފައުންޑޭޝަންގެ މަސައްކަތް ފިޔަވައި އެހެން އެއްވެސް މަސައްކަތެއް ނުކޮށް، މަސައްކަތް ހުރީ ހުއްޓިފައެވެ.
ހައުސިންގ މިނިސްޓްރީން ވިދާޅުވީ، މަނަދޫގައި މަސައްކަތް ހުއްޓިފައި ހުރި 10 ހައުސިންގ ޔުނިޓްގެ މަސައްކަތާއެކު، ޅ.މާފިލާފުށިން ބަދަލުވި ޢާއިލާއަކަށް މަނަދޫގައި އަލަށް އިތުރު ގެއެއްވެސް ޢިމާރާތް ކުރެއްވުމަށް ހަމަޖެހިފައިވާ ކަމަށެވެ. އަދި އެ މަސައްކަތް ވަރަށް އަވަހަށް ބަޔަކާ ޙަވާލުކުރައްވައި، މިއަހަރުގެ ތެރޭގައި މިކަމުގެ ޢަމަލީ މަސައްކަތްތައް ފެށިގެންދާނެކަމަށް ހައުސިންގ މިނިސްޓްރީން ވިދާޅުވެއެވެ.