ނިމިދިޔަ ރިޔާސީ އިންތިޚާބުގައި ވާދަކުރެއްވި ކެންޑިޑޭޓުންގެތެރެއިން 5 ކެންޑިޑޭޓެއްގެ މާލީ ބަޔާން، އިންތިޚާބުތަކާބެހޭ ޢާންމު ޤާނޫނުގައި ބަޔާންކުރާ މިންގަނޑުތަކަށް ނުފެތޭކަމަށް އިލެކްޝަންސް ކޮމިޝަންގެ ނައިބު ރައީސް އިސްމާޢީލް ޙަބީބް ވިދާޅުވެއްޖެއެވެ.
ޙަބީބް މިހެން ވިދާޅުވީ އޭނާގެ އެކްސް އެކައުންޓްގައި ކުރެއްވި ޕޯސްޓެއްގައެވެ. ޙަބީބް ވިދާޅުވެފައިވަނީ ކެންޑިޑޭޓުން ހުށަހެޅި މާލީ ބަޔާންތައް ދިރާސާކުރެއްވުމަށްފަހު، އިންތިޚާބުތަކާބެހޭ ޢާންމު ޤާނޫނުގައި ބަޔާންކުރާ މިންގަނޑަށް ނުފެތޭ 5 ކެންޑިޑޭޓެއްގެ މާލީ ބަޔާން ފާހަގަކުރެވިފައިވާކަމަށެވެ.
އެހެންކަމުން އެ ކެންޑިޑޭޓުންނާއި އެމީހުންގެ އިންތިޚާބީ އޭޖެންޓުންނާމެދު ޤާނޫނުގައިވާ ގޮތުގެމަތިން، ފިޔަވަޅު އަޅަން، މިއަދު ބޭއްވި އިލެކްޝަންސް ކޮމިޝަނުގެ ޖަލްސާއިން ފާސްކޮށްފައިވާ ކަމަށެވެ. ޤާނޫނީ ހަމަތަކާ އެއްގޮތަށް މާލީ ބަޔާން ހުށަހަޅުއްވާފައިވަނީ 3 ކެންޑިޑޭޓެއްކަމަށް ޙަބީބު ވިދާޅުވިއެވެ.
އެންމެފަހުން ބޭއްވި ރިޔާސީ އިންތިޚާބުގައި ޖުމުލަ 8 ކެންޑިޑޭޓުން ވާދަކުރެއްވިއެވެ. އެއީ ސިޔާސީ ޕާޓީތަކުން ވާދަކުރެއްވި 5 ކެންޑިޑޭޓަކާއި އަމިއްލަގޮތުން ވާދަކުރެއްވި 3 ކެންޑިޑޭޓެކެވެ.
ރިޔާސީ އިންތިޚާބު 2023 ގެ ކެންޑިޑޭޓުންގެ މާލީ ބަޔާން އިލެކްޝަންސް ކޮމިޝަނުން ދިރާސާ ކުރުމަށްފަހު، އިންތިޚާބުތަކާ ބެހޭ ޢާންމު ޤާނޫނުގައި ބަޔާންކުރާ މިންގަނޑުތަކަށް ނުފެތޭ 5 ކެންޑިޑޭޓަކަށާއި، އެ 5 ކެންޑިޑޭޓުންގެ އިންތިޚާބީ އޭޖެންޓުންނަށް ޤާނޫނުގައިވާ ގޮތުގެ މަތީން، ފިޔަވަޅު އަޅަން…
— Ismail Habeeb (@IsmailHabeeb) December 11, 2023
ޙަބީބް ވިދާޅުވީ މިކަމާގުޅޭ ތަފްސީލުތައް ފަހުން ހާމަކުރައްވާނެ ކަމަށެވެ.
އިންތިޚާބާ ގުޅިގެން ކެންޑިޑޭޓު ކުރައްވާފައިވާ ޚަރަދުގެ ތަފުސީލާއި އިންތިޚާބަށް ޚަރަދު ކުރެއްވުމަށް ފައިސާ ހޯއްދެވި ގޮތުގެ ތަފުސީލު މާލީ ބަޔާނުގައި ހިމަނަންޖެހެއެވެ. އަދި ފައިސާއާއި ތަކެތި ދިން ފަރާތްތަކާއި ދިން މިންވަރުގެ ތަފުސީލާއި ބޭންކު އެކައުންޓުން ކުރައްވާފައިވާ ހުރިހާ މުއާމަލާތެއް އެނގޭނެހެން ބޭންކު ސްޓޭޓްމަންޓާއި ސައްހަ މައުލޫމާތުކަން އަންގައިދޭން ފައިސާގެ ރަސީދު، އިންވޮއިސް، ބިލުގެ ކޮޕީވެސް ހުށައަޅުއްވަން ޖެހެއެވެ.
އިންތިޚާބާ ބެހޭ ޢާއްމު ޤާނޫނަށް 2018 އަހަރު ގެނައި އިޞްލާހުގައި ބުނެފައި ވަނީ، ވަކިކަމެއް ކުރުމަށް އެޤާނޫނުގައި ކަނޑައަޅާފައި ވަނިކޮށް އެކަން ނުކުރުމަކީ އިންތިޚާބީ ކުށެއް ކަމަށެވެ. އޭގެ އަދަބެއްގެ ގޮތުން، 6 މަސް ދުވަހާއި 2 އަހަރު ދުވަހުގެ މުއްދަތަކަށް ޖަލަށް ލުން ނުވަތަ 6،000 ރުފިޔާއާއި، 24،000ރުފިޔާއާ އާ ދެމެދުގެ ޢަދަދަކުން ޖޫރިމަނާ ކުރެވޭނެ ކަމަށް އެޤާނޫނުގައި ބުނެފައިވެއެވެ.