ކެމިކަލް ފެނުނު އެއްވެސް ބޭހެއް، އެއްވެސް ބޭސްފިހާރައަކު ނެތްކަމުގެ ޔަޤީންކަން ދީފި

ނުރައްކާތެރު ކެމިކަލް ހުރިކަން ފާހަގަވެގެން ވިއްކުމާއި ރާއްޖެއަށް އެތެރެކުރުން މަނާކުރި ބޭހުގެ ތިން ހާހަށްވުރެ ގިނަ ފުޅި 2021 ވަނަ އަހަރު ރާއްޖެ އެތެރެކޮށްފައިވާކަމަށާއި، ނަމަވެސް އެ އެއްވެސް ބޭހެއް ރާއްޖޭގެ އެއްވެސް ބޭސްފިހާރައަކު މިހާރު ނުހުންނާނެކަމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން ވިދާޅުވެއްޖެއެވެ.

ފުޑް އެންޑް ޑްރަގް އޮތޯރިޓީން ވަނީ މިފަހަކަށް އައިސް ޢާންމުކޮށް ބޭނުންކުރާ ބައެއް ބޭސްތައް ރާއްޖޭގެ މާކެޓުން ނެގުމަށް އަންގާ، ވިއްކުމާއި އެތެރެކުރުން މަނާކޮށް ބަޔާންތަކެއް ނެރެފައެވެ. އެގޮތުން، މިދިއަ މަހުގެ ތެރޭ އެމްއެފްޑީއޭއިން ވަނީ ޕާކިސްތާނުގެ ބޭސް އުފައްދާ ކުންފުންޏެއް ކަމަށްވާ ފާމިކްސް ލެބޯރެޓަރީސްއިން އުފައްދާ އެމިޑޯން ސަސްޕެންޝަން ކިޔާ ހޮޑު ބޭހެއް ރާއްޖޭގައި ވިއްކުމާއި ބޭނުންކުރުން މަނާކޮށް، މާކެޓުން ނަގަން އަންގާފައެވެ އަދި ކެއްސުމާއި، ހުމާއި ރޯގާއަށްދޭ ދިޔާ ބޭހެއް ކަމަށްވާ ޕާކިސްތާނުގެ ފާމިކްސް ލެބޯޓަރީން އުފައްދާ އެލާގޯ ބްރޭންޑުގެ ސިޓްރިޒަން ރާއްޖެ އެތެރެ ކުރުމާއި ވިއްކުމާއި ބޭނުން ކުރުންވެސް މަނާކޮށްފައެވެ.

މިކަމާއި ގުޅޭގޮތުން މަޢުލޫމާތު ސާފުކުރުމަށް، އެމްއެފްޑީއޭ ވަނީ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީއަށް ހާޒިރުކޮށްފައެވެ. އެމްއެފްޑީއޭގެ އިތުރުން، އާސަންދަ ކޮންޕެނީއާއި، އެސްޓީއޯ އާއި އޭޑީކޭ އަދި ހެލްތު ޕްރޮޓެކްޝަން އެޖެންސީ (އެޗްޕީއޭ)ވެސް ވަނީ ކޮމިޓީއަށް ހާޒިރުކޮށްފައެވެ.

ކޮމިޓީ ބައްދަލުވުމުގައި މެންބަރުން ވަނީ ކެމިކަލް އެކުލެވޭ ބޭސްތައް ރާއްޖެ އެތެރެވުމާއި، މި ބޭސްތައް ރާއްޖޭގެ މާކެޓުގައި ހުރުމުން ކަންބޮޑުވުން ފާޅުކޮށްފައެވެ. އެގޮތުން، މެންބަރުން ވަނީ މިފަދަ ބޭސްތައް ރާއްޖޭގެ މާކެޓުން ނަގާ، ބޭސް ނައްތާލުމުގެ މަސައްކަތް އެމްއެފްޑީއޭއިން ކުރަމުން އަންނަގޮތާއި ގުޅޭގޮތުން ސުވާލު ކުރައްވާފައެވެ.

މެންބަރުންގެ ސުވާލުތަކަށް ޖަވާބުދެއްވަމުން އެމްއެފްޑީއޭގެ ސީނިއަރ ފާމަސިސްޓް ޢައިޝަތު ޖަލީލާ ވިދާޅުވީ ކެމިކަލް ހުރިކަމަށް ޝައްކު ކުރެވިގެން ބޭސްތައް ޓެސްޓުކުރިއިރު، ބޭސްތަކުގައި ކެމިކަލް ހުރިކަން ފާހަގަކުރެވުނު ވަގުތުން ފެށިގެން، ވިއްކުން މަނާކޮށް، އަދި ރާއްޖެ އެތެރެކުރުން ވެސް މަނާ ކޮށްފައިވާ ކަމަށެވެ. އަދި މި ބޭސްތައް މާކެޓުން ނެގުމަށް، ރާއްޖޭގެ ހުރިހާ ބޭސްފިހާރަތަކަކަށް އަންގާފައިވާ ކަމަށް ޖަލީލާ ވިދާޅުވިއެވެ.

އެގޮތުން، މިހާރު ރާއްޖޭގެ ހުރިހާ ބޭސްފިހާރަތަކަކުން ވެސް ކެމިކަލް އެކުލެވޭކަން ފާހަގަކުރެވިފައިވާ ހުރިހާ ބޭސްތަކެއް ނަގާފައިވާކަމުގެ ޔަޤީންކަން ޖަލީލާ ދެއްވިއެވެ. އަދި ރަށްރަށުގައި، އެ ރަށެއްގެ ޕަބްލިކް ހެލްތު ޔުނިޓާއި ގުޅިގެން ބޭސްފިހާރަތަކުން ބޭސް ނެގުމަށްފަހު، މިހާރު ކުރެވެމުން އަންނަނީ ބޭސް ނައްތާލުމުގެ މަސައްކަތްކަމަށް ޖަލީލާ ވިދާޅުވިއެވެ.

"ހުރިހާ ރަށެއްގެ ޕަބްލިކް ހެލްތު ޔުނިޓު މެދުވެރިކޮށް ރަށްރަށުގައި ހުރި ފާމަސީތަކާއި ހޮސްޕިޓަލްތަކުން މި ބޭސްތައް ވަނީ ނަގާ، ނައްތާލުމަށް ތައްޔާރުކޮށްފައި. އަދި ނައްތާލައެއް ނުލެވޭ. ހެލްތު ސެންޓަރގެ ބެލުމުގެ ދަށުގައި އެ ހުންނާނީ. މިހާރު ކުރެވެމުންދަނީ ނައްތާލުމުގެ މަސައްކަތް. އަޅުގަނޑުމެންނަށް ޔަޤީން ކުރެވޭ އެއްވެސް ފާމަސީއެއްގައި މި ބޭސް ނެތްކަން." ޖަލީލާ ވިދާޅުވިއެވެ.

ނުރައްކާތެރި ކެމިކަލް މާއްދާތަކެއް ހުރިކަން ފާހަގަކުރެވުމުގެ ސަބަބުން މިދިޔަ މަހު ރާއްޖޭގައި ވިއްކުމާއި އެތެރެކުރުން މަނާކުރި، ސިޓްރިޒެން ދިޔާ ބޭހުގެ 3،100 ފުޅި 2021 ވަނަ އަހަރު ރާއްޖެ އެތެރެކޮށްފައިވާކަމަށް އެމްއެފްޑީއޭއިން ވިދާޅުވެއެވެ.


ކުޑަކުދިންނަށް ދޭ ބޭހެއްގައި ކެމިކަލެއް ފެނިގެން ޑަބްލިޔުއެޗްއޯއިން ނެރުނު އެލަރޓަކާއިއެކު، ސަމާލުވުމަށް މިއަހަރުގެ ޖުލައި މަހުވެސް އެމްއެފްޑީއޭއިން ބަޔާނެއް ނެރުނެވެ. މިއީ ނެޗުރަލް ކޯލްޑް ނަމަކަށްކިޔާ ބޭހެކެވެ. މި ބޭހުން ޑައިއީތައިލިން ގްލައިކޯލް، (DEG) އަދި އިތައިލީން ގްލައިކޯލް، (EG) ނަމަކަށް ކިޔާ ކެމިކަލްގެ ބާވަތްތަކެއް ފެނިފައިވާ ކަމަށް އޭރު އެމްއެފްޑީއޭއިން ވިދާޅުވެފައިވެއެވެ. އޭގެފަހުން މިދިއަ މަހު، ކުޑަކުދިންނަށް ދޭ ދިޔާ ބޭހެއްކަމަށްވާ ސިޓްރިޒަންގެ އެލަރގޯ ބްރޭންޑުން ހަމަ މި ކެމިކަލް ބާވަތް ފެނިގެން، މި ބޭހުގެ ހުރިހާ ބާވަތެއް ރާއްޖޭގައި ވިއްކުމާއި، އެތެރެކުރުމާއި ބޭނުންކުރުން މަނާކޮށް، މާކެޓުން ނެގުމަށް އެމްއެފްޑީއޭއިން އެންގިއެވެ.