ޓެރަރިޒަމްގެ ޤާނޫނުގެ ދަށުން މޮނިކޮން އަމުރު ތަންފީޒް ކުރަން ފުލުހުން ހޯދަމުންދިޔަ 3 މީހުން ފުލުހުންގެ އިދާރާއަށް އަމިއްލައަށް ހާޟިރުވެ ޓެގް އަޅުފައިވާކަމަށް ފުލުހުން ހާމަކުރައްވައިފިއެވެ.
ނަމަވެސް އިތުރު ތަފްޞީލް ފުލުހުން ހާމަކުރައްވާފައެއް ނުވެއެވެ.
ހައިކޯޓުން 11 މީހުންގެ މައްޗަށް މޮނިކޮން އަމުރު ނެރުއްވުމާއި ގުޅިގެން އޭގެތެރެއިން 6 މީހެއްގެ ފައިގައި ކުރިން ވަނީ ޓެގް އަޅުވާފައެވެ. ޓެރަރިޒަމް މަނާކުރުމުގެ ޤާނޫނުގައި ބަޔާންކުރައްވާފައިވާ ފަދައިން މޮނިކޮން އަމުރު ނެރުއްވުމަށް ހޯމް މިނިސްޓަރ ނިންމަވައި ހައިކޯޓުން އަމުރު ނެރުއްވާފައިވާ 11 މީހުންނަކީ ރާއްޖޭގައި ބޮޑެތި ކުށްތަކެއް ތަކުރާރުކޮށް އެމީހުންގެ އަމަލުތަކުގެ ސަބަބުން މުޖުތަމައުގެ ސަލާމަތަށް ނުރައްކާވެފައިވާ ބައެއް ކަމަށް ފުލުހުން ވިދާޅުވެއެވެ.
މި 11 މީހުން މޮނީޓަރކުރުމުގެ ގޮތުން ރޭގަނޑު 10:00 އާއި ހެނދުނު 06:00 އާއި ދެމެދު ގެއިން ބޭރަށް ނުދިއުމާއި، މިނިސްޓަރުގެ ހުއްދަ ނެތި މާލެއިން ފުރައިގެން ނުދިއުމާއި، އަމުރުގައި ކަނޑައަޅާފައިވާ ވަކި ސަރަހައްދުތަކަކަށް ނުދިއުމާއި، އެމީހުންގެ މާލީ މުއާމަލާތްތަކާއި މުދާ ކޮންޓްރޯލްކުރުމުގެ ގޮތުން ފިޔަވަޅު އެޅުމާއި، އެމީހުން މުއާސަލާތީ މުއާމަލާތްތައް ކޮންޓްރޯލްކުރުމާއި، ފުލުހުންގެ މަރުކަޒަށް ހާޒިރުވެ ސޮއިކުރުމާއި، އިލެކްޓްރޯނިކް އާލާތްތައް އެމީހުންގެ ހަށިގަނޑުގައި ނުވަތަ ދިރިއުޅޭތަނުގައި ހަރުކުރުމާއި އެމީހެއްގެ ފޮޓޯއާއި ދިރިއުޅޭ ތަންތަނުގެ ފޮޓޯއާއި އެމީހެއްގެ ފިންގަރ ޕްރިންޓްފަދަ ސާމްޕަލްތައް ނަގައި އެމީހުން މޮނީޓަރކޮށް ކޮންޓްރޯލްކުރުމަށް އަމުރުކުރައްވާފައިވާކަމަށް ފުލުހުން ހާމަކުރައްވައެވެ.
މޮނިކޮން އަމުރު ހިންގާ މީހުންގެ ކަންކަން ބަލަހައްޓައި މޮނިޓަރ ކުރެވޭނެ ހަރުދަނާ ނިޒާމެއް ފުލުހުންގެ މުއައްސަސާގައި ވަނީ ޤާއިމް ކޮށްފައެވެ. މިގޮތުން މި މީހުންނަށް މި އަމުރުގެ ދަށުން ކަނޑައަޅާފައިވާ ކަންކަން ފުރިހަމަ ކުރުންމަތީ ދެމިތިބޭތޯ ބަލައި ދުވަހުން ދުވަހަށް އަދި ވަގުތުން ވަގުތަށް އެކަންކަން ބެލެހެއްޓިގެން ދާނެކަމަށްވެސް ފުލުހުން ހާމަކުރައްވައެވެ.
img:http://s2.psmnews.mv/images/660x400/14590219306282.jpg|މޮނިކޮން އަމުރުގެ ދަށުން މީހެއްގެ ފައިގައި ޓެގް އަޅުވާފައި- ފޮޓޯ: ޕޮލިސް
ހޯމް މިނިސްޓަރުގެ ނިންމެވުމާއެކު ހައިކޯޓުން ނެރުއްވި އަމުރު ތަންފީޒް ކުރެއްވުމުގެ ގޮތުން މޮނިކޮން އަމުރުގެދަށުން މީގެ ކުރިން ފުލުހުން ވަނީ 6 މީހެއްގެ ފައިގައި ޓެގް އަޅުއްވާފައެވެ.
މިގޮތުން މިހާތަނަށް ޓެގް އަޅުވާފައިވާ 6 މީހުންނަކީ،
ގއ. ދާންދޫ ފަހުދާ ވާދީ، ފައްސާން ވަލީދް،
ގ. ޝާރާޒް މުޙައްމަދު މަފާޒް ޙުސައިން ސަލީމް،
ދަފްތަރު ނަމްބަރު 9634، މިދުހަތު އަބޫބަކުރު،
ހދ. ނޮޅިވަރަމް ހާވިލާ، އައްސަދު އިބްރާހީމް ރަޝީދް،
ގ. ކެރަފާގެ މުޙައްމަދު ޝާބިލް އިސްމާޢީލް،
ދަފްތަރު ނަމްބަރު އާރު އެސް. 1475، އަޙްމަދު ރިޒާމް.
މި މީހުންގެ އިތުރުން މޮނިކޮން އަމުރު ނެރުއްވާފައިވާއަނެއް 5 މީހުންގެ ތެރެއިން 2 މީހުން މިވަގުތު ތިބީ ފުލުހުން ތަޙުޤީޤު ކުރައްވަމުންދާއެހެން 2 މައްސަލައެއްގެ ތުހުމަތުގައި ފުލުހުންގެ ބެއްލެވުމުގެ ދަށުގައި ކަމަށްފުލުހުން ވިދާޅުވެއެވެ. މިރޭ އަމިއްލައަށް ފުލުހުންގެ އިދާރާއަށް ހާޟިރުވި 3 މީހުންނާއިއެކު ޖުމްލަ 9 މީހެއްގެ ފައިގައި ޓެގް އަޅުވައި، ފުލުހުން ދަނީ މޮނިޓަރ ކުރަމުންނެވެ.