މިދިޔަ އަންގާރަ ދުވަހު ސިނަމާލެ އެކެއްގައި ހިނގި އަލިފާނުގެ ހާދިސާގައި ޙާލުގައި ޖެހުނު އާއިލާތަކަށް، އެފަރާތްތަކުން ހިތްހަމަ ޖެހޭ ފެންވަރުގެ ވަގުތީ ބޯހިޔާވަހިކަމެއް މިހާރު ފޯރުކޮށްދެއްވާފައިވާކަމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން ވިދާޅުވެއްޖެއެވެ.
5 ފަންގިފިލާ ހިމެނޭ ސިނަމާލެ އެކެއްގެ އެންމެ މަތީ ފްލޯގެ 1404 ނަންބަރު އެޕާޓްމަންޓްގައި ހިނގި އަލިފާނުގެ ޙާދިސާގައި އެ އެޕާޓްމަންޓްގައި މީހުން ދިރި ނޫޅެވޭވަރަށް ވަނީ އަނދައިގެން ގޮސްފައެވެ. ނޭޝަންލް ޑިޒާސްޓަރ މެނޭޖްމަންޓް ސެންޓަރުން ވިދާޅުވީ، ހާލުގައި ޖެހުނު 2 އާއިލާއަކަށް އެފަރާތްތަކުން ހިތްހަމަ ޖެހޭ ފެންވަރުގެ ވަގުތީ ބޯހިޔާވަހިކަމެއް ފޯރުކޮށްދެއްވާފައިވާ ކަމަށާއި، އެ ދެ އާއިލާ މިހާރު ދިރިއުޅެމުންދަނީ މާލޭގެ ދެ ގެސްޓްހައުސްއެއްގައި ކަމަށެވެ.
ހާލުގައި ޖެހުނު ދެ އާއިލާގައި 12 މީހުން ތިބެއެވެ. ޑިޒާސްޓަރ މެނޭޖްމަންޓް ސެންޓަރުން މަޢުުލޫމާތުދެއްވި ގޮތުގައި، ދާއިމީ ބޯހިޔާ ވަހިކަމެއް ފޯރުކޮށްދިނުމުގެ ކުރިން މިހާރު ގެންދަވަނީ އަލިފާނުގެ ޙާދިސާ ހިނގި ތަނުގެ އެސެސްމަންޓްތަކެއް ހައްދަވަމުންނެވެ. އަދި ދާއިމީ ބޯހިޔާވަހިކަމެއް ފޯރުކޮށްދެވޭނެ ދުވަހެއް އަންނަ ހަފްތާގެ ތެރޭގައި އެނގިގެންދާނެކަމަށްވެސް އެސެންޓަރުން ހާމަކުރައްވައެވެ. އަންގާރަ ދުވަހު ހިނގި އަލިފާނުގެ ހާދިސާގައި ގެއްލުން ލިބުނު އާއިލާތަކަށް ޑިޒާސްޓަރ މެނޭޖުމަންޓް ސެންޓަރުން ވަނީ އަންނައުނުވެސް ފޯރުކޮށްދެއްވާފައެވެ.
މިމަހުގެ 22 ވަނަ ދުވަހު ސިނަމާލެ އެކެއްގައި ހިނގި ޙާދިސާގައި އަލިފާން ރޯވި އެޕާޓްމަންޓްގެ އިތުރުން އިންވެގެން ހުރި އެހެން އެޕާޓްމަންޓްތަކަށްވެސް ވަނީ ބޮޑެތި ގެއްލުންތަކެއްވެފައެވެ. މި ހާދިސާގައި އެއްވެސް މީހަކަށް ގެއްލުމެއް ލިބިފައެއް ނުވެއެވެ.