ޔަހުދީ އިސްރާޢީލުން ފަލަސްޠީނުގެ ޣައްޒާގައި މުވާސަލާތީ ގުޅުންތައް ކަނޑާލުމާއެކު، އެހީ ފޯރުކޮށްދިނުމުގައި ބޮޑެތި ދަތިތަކަކާއި ކުރިމަތިލާން ޖެހިފައިވާ ކަމަށް ފަލަސްޠީނު ރެޑް ކްރެސެންޓުން ބުނެފިއެވެ.
އިސްރާޢީލުން ފަލަސްޠީނުގެ ޣައްޒާއަށް ދެމުންދާ ޙަމަލާތަކުގައި އެތައް ބަޔަކު ޝަހީދުކޮށް، އެތައް މުސްލިމުންނެއް އަންނަނީ ޒަޚަމްކޮށްލަމުންނެވެ. އަދި ޒަޚާމްވާ މީހުންނަށް އެހީ ފޯރުކޮށްދިނުމުގައި ފަލަސްޠީނު ރެޑް ކްރެސެންޓް ޓީމުން އަންނަނީ ޣައްޒާގައި ހަރަކާތްތެރިވަމުންނެވެ.
ބީބީސީ ނިއުސްއަށް ދެއްވި ބަސްދީގަތުމެއްގައި ފަލަސްޠީން ރެޑް ކްރެސެންޓްގެ ފަރާތުން ވާހަކަދައްކަވަމުން އެހަރަކާތުގެ މީޑިއާ އޮފިޝަލެއް ކަމަށްވާ ނިބާލް ފަރްސަކް ވިދާޅުވީ ފަލަސްޠީނުގައި ހަރަކާތްތެރިވަމުންދާ ރެޑް ކްރެސެންޓުގެ ހުރިހާ މުވައްޒަފުންނާއި މުވާސަލާތީ ގުޅުން ކެނޑިފައިވާކަމަށެވެ. އަދި މިހާތަނަށް އައިއިރު، ޣައްޒާގައި ހަރަކާތްތެރިވާ އެއްވެސް މީހަކާ، މުވާސަލާތު ކުރެވޭނޭ ގޮތް ވެފައިވާ ނުވާ ކަމަށް އޭނާ ވިދާޅުވިއެވެ.
ނިބާލް ވިދާޅުވީ ފަލަސްޠީނުގައި ހަރަކާތްތެރިވާ އިމަޖެންސީ މެޑިކަލް ސާވިސް، އީއެމްއެސްގެ ޓީމުތަކަށް ޢަމާޒުކޮށް ބޮމެއް ގޮއްވާލުމުން ޒަޚަމްވާ ފަރާތްތަކުގެ ގާތަށް ދިއުމަށް ދަތިވެފައިވާކަމަށެވެ. އަދި މިހާރު އީއެމްއެސް އިން ކަންކުރާކަމަށް ލަފާ ކުރެވެނީ އިހުގައި ކަން ކުރިގޮތަށް، ބޮމެއް ގޮއްވާލީމާ އެ ދިމާއަކަށް ގޮސް، ޒަޚަމްވެފައިވާ މީހުން ހޮސްޕިޓަލަށް ގެންދިއުންކަމަށް ނިބާލް ވިދާޅުވިއެވެ.
"އަހަރެމެންނާއި މަސައްކަތް ކުރާ ފަރާތްތަކަށް އަންނަނީ ބޮޑެތި ދަތިތަކަކާއި ކުރިމަތި ވަމުން، ޒަހަމް ވެފައިވާ މީހުންގެ ގާތަށް ވަގުތު އޮއްވާ ދިއުމަށް. ވީމާ އަހަންނަށް ހީވާ ގޮތުގައި މިހާރު އެ މީހުން ކަން ކުރާނީ އިހުގައި ކަންކުރި ގޮތަށް، ބޮމެއް ގޮއްވާލާ އަޑު އިވުނީމާ، އެ ސަރަހައްދަކަށް ގޮސް އަނިޔާވެފައި ތިބި މީހުން ހޮސްޕިޓަލަށް ގެންދިއުން." ނިބާލް ވިދާޅުވިއެވެ.
ފަލަސްޠީނުގެ މުސްލިމުންނަށް، އިސްރާޢީލުން ދެމުންދާ ލާއިންސާނީ ޙަމަލާތައް ފުޅާކޮށް، ޣައްޒާގެ މުވާސަލާތީ ގުޅުންތައް ކަނޑާލީ ހުކުރު ދުވަހު ޣައްޒާގެ ގަޑިން ރޭގަނޑު 7 ޖަހާ ކަންހާއިރުކަމަށް އަލް ޖަޒީރާއިން ރިޕޯޓު ކުރެއެވެ. އަދި މުވާސަލާތީ ގުޅުންތައް ކަނޑާލުމަށްފަހު، އިސްރާޢީލުންގެ ލަޝަކަރުން ބުނެފައިވަނީ ޣައްޒާގެ ބިމުގައި އެ މީހުން ހިންގާ އޮޕަރޭޝަން ފުޅާ ކުރަމުން އަންނަ ކަމަށެވެ.