މަޖިލީހުގެ ރައީސްކަމުން ނަޝީދު ވަކިކުރުމަށް އެމްޑީޕީ ޕީޖީ ގުރޫޕުން ތްރީ ލައިން ވިޕެއް

ރައްޔިތުންގެ މަޖިލީހުގެ ރައީސްކަމުން ރައީސް ނަޝީދު ވަކިކުރުމަށް އެމްޑީޕީ ޕާލިމެންޓަރީ ގުރޫޕުން ތްރީ ލައިން ވިޕެއް ނެރެފިއެވެ.

އެމްޑީޕީ ޕީޖީ ގުރޫޕުގެ ބައްދަލުވުމަކަށްފަހު، ބޭއްވި ނޫސްވެރިންގެ ބައްދަލުކުރެއްވުމެއްގައި ވާހަކަދައްކަވަމުން އެމްޑީޕީ ޕީޖީ ގުރޫޕުގެ ލީޑަރު މުޙައްމަދު އަސްލަމް ވިދާޅުވީ، ތްރީ ލައިން ވިޕް ނެރެފައިވަނީ ބައްދަލުވުމުގައި ބައިވެރިވި މެންބަރުންގެ އިއްތިފާގުން ކަމަށެވެ. އަސްލަމް ވިދާޅުވީ މިމައްސަލަ ކުރިއަށް ނުގެންގޮސް މަޖިލީހުގައި އިތުރު އެއްވެސް މަސައްކަތެއް ކުރަން ޖާގަނުދެއްވާނެ ކަމަށެވެ.
އަދި ވޯޓަށް އެހުމުގެ ކުރިން މަޖިލީހުން ކުރަންޖެހޭ އެއްވެސް ކަމެއްގައި އެއްބާރުލުން ނުދެއްވާނެކަމަށް، އަސްލަމް ވިދާޅުވިއެވެ. މަޖިލީހުން ނިންމަންޖެހޭ މަސައްކަތްތަކުގެ ތެރޭގައި އިންތިޚާބީ ރައީސް ހުވާ ކުރެއްވުމުގެ ރަސްމިއްޔާތާއި ގުޅުން ހުރި ކަންކަން ހިމެނެއެވެ.

ރައީސް ނަޝީދުގެ އިތުބާރު ނެތް ކަމުގައި މައްސަލަ މިހާރު ވަނީ، އަންނަ އާދިއްތަ ދުވަހަށް އެޖެންޑާކޮށްފައެވެ. މި ޖަލްސާއަށް އެމްޑީޕީއަށް ނިސްބަތްވާ ހުރިހާ މެންބަރުން ހާޒިރުވެ ވޯޓު ދޭ ގޮތަށް، މިއަދުގެ ބައްދަލުވުމުގައި ނިންމާފައިވާ ކަމަށް އަސްލަމް ވިދާޅުވިއެވެ.

"މީގެ ކުރިން އަޅުގަނޑުމެން ވާނީ އެމްޑީޕީގެ ޕާލިމަންޓްރީ ގުރޫޕުން ނިންމައިގެން 49 މެންބަރުންގެ ސޮޔާއެކު، ނިންމުމެއް ނިންމާފައި. އެއީ މަޖިލީހުގެ ރައީސް، ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ. އެ މައްސަލާގެ ވޯޓަށް އަންނައިރު، އަޅުގަނޑުމެން ތްރީ ލައިން ވިޕެއް މި ނެރުނީ." އަސްލަމް ވިދާޅުވިއެވެ.

މަޖިލީހުގެ ސުޕަރ މެޖޯރިޓީ އޮންނަ އެމްޑީޕީން ރައީސް ނަޝީދުގެ އިތުބާރު ނެތްކަމުގެ މައްސަލަ ދެވަނަ ފަހަރަށް ހުށަހެޅީ އެ ޕާޓީގެ 49 މެންބަރުންގެ ސޮޔާއިއެކު ގައެވެ. މައްސަލަ ހުށަހެޅީ މިމަހު 9ވަނަދުވަހުއެވެ.

ރައީސް ނަޝީދުގެ އިތުބާރު ނެތް ކަމުގެ މައްސަލަ މީގެ ކުރިން ވެސް އެމްޑީޕީގެ ޕީޖީ ގުރޫޕުން ވަނީ ހުށަހަޅާފައެވެ. އެފަހަރު ހުށަހެޅީ ނިމިދިޔަ ރިޔާސީ އިންތިޚާބުގެ ކުރިންނެވެ. ނަމަވެސް، މައްސަލަ ނެގުމަށްފަހު، އަނެއްކާވެސް މިވަނީ އިތުބާރު ނެތްކަމުގެ މައްސަލަ ހުށަހަޅާފައެވެ.