ޢުމްރާއަށް މީހުން ގެންދިއުމަށް އެދި ހުށަހެޅުމުގެ މުއްދަތު އިތުރުކޮށްފި

ދިވެހިރާއްޖެއިން ޢުމްރާއަށް މީހުން ގެންދިއުމަށް އެދި ހުށަހެޅުމުގެ މުއްދަތު މިމަހުގެ ނިއަލަށް އިތުރުކުރައްވައިފިއެވެ.

ޢުމްރާއަށް މީހުން ގެންދިއުމަށް ޝައުޤުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލީ މި މަހުގެ 8 ވަނަ ދުވަހުއެވެ. އޭރު
އިސްލާމިކް މިނިސްޓްރީން ޕްރޮޕޯސަލް ހުށަހެޅުމުގެ މުއްދަތު ދެއްވާފައިވަނީ މިއަދުގެ ނިއަލަށެވެ. ނަމަވެސް މިމުއްދަތު މިމަހުގެ 31ގެ ނިއަލަށް އިތުރުކުރައްވާފައިވާ ކަމަށް އެމިނިސްޓްރީންވަނީ ހާމަކުރައްވާފައެވެ. މުއްދަތު އިތުރުކުރެއްވީ ގިނަ ބަޔަކަށް ފުރުސަތު ދެއްވުމުގެ ގޮތުން ކަމަށް އިސްލާމިކް މިނިސްޓްރީން ވިދާޅުވެއެވެ.

އިސްލާމިކް މިނިސްޓްރީން ވިދާޅުވީ މިމަހުގެ ނިޔަލަށް ސަރުކާރު ބަންދު ނޫން ކޮންމެ ދުވަހަކު ހެނދުނު 9 އަކުން މެންދުރުފަހު 1 އަކަށް، ޕްރޮޕޯސަލް ހުށަހެޅޭނެ ކަމަށެވެ.

ޢުމްރާއަށް މީހުން ގެންދިއުމަށް އެދި ހުށަހެޅޭނީ އިސްލާމިކް މިނިސްޓްރީން ކަންޑައަޅާފައިވާ ޢުމްރާއަށް މީހުން ގެންދިއުމާއި ބެހޭ އުޞޫލާއި އެއްގޮތަށް ޝަރުޠު ފުރިހަމަވާ ކުންފުނިތަކަށް އެކަންޏެވެ.

އިސްލާމިކް މިނިސްޓްރީން ވިދާޅުވީ ޢުމްރާއަށް މީހުންގެންދިއުމަށް އެދި ހުށަހަޅަންޖެހޭ ޕްރޮޕޯޒަލް، އެ މިނިސްޓްރީގެ ވެބްސައިޓުން ލިބެން ހުންނާނެ ކަމަށެވެ. ޕްރޮޕޯޒަލް ހުށަހަޅަންޖެހޭނީ، ސިޓީ އުރައެއްގައި ބަންދުކޮށް، "ދިވެހިރާއްޖެއިން ޢުމްރާއަށް މީހުން ގެންދިއުމުގެ ހުއްދައަށް އެދި" މިހެން ޖަހާފައި ކަމަށް މިނިސްޓްރީން ވިދާޅުވެއެވެ.

ޢުމްރާއަށް މީހުން ގެންދިއުމަށް އިސްލާމިކް މިނިސްޓްރީން ވަނީ 41 ކުންފުންޏަކަށް ހުއްދަ ދެއްވާފައެވެ. މި ކުންފުނިތަކުގެ ތެރެއިން މިއަހަރުގެ ނޮވެންބަރާއި ހަމައަށް 12 ކުންފުންޏެއްގެ ހުއްދައިގެ މުއްދަތު ހަމަވާނެ ކަމަށް އެމިނިސްޓްރީންވަނީ ވިދާޅުވެފައެވެ.

ޢުމްރާއަށް މީހުން ގެންދިއުމާއި ބެހޭ އުސޫލުގައިވާގޮތުން، ކޮންމެ ކުންފުންޏަކަށްވެސް ޢުމްރާއަށް މީހުން ގެންދިއުމަށް ހުއްދަ ދެއްވަނީ 2 އަހަރުގެ މުއްދަތަކަށެވެ.