ޙާލާގެ އިޙްސާސް، ދައްކަން ޖެހުނީ ހިތްދަތި އުނދަގޫ ވާހަކަތަކެއް!

އިވެމުންދަނީ ރުއިމާއި، އާދޭހުގެ އަޑުތަކެކެވެ. ކެކުޅުމުގެ އަޑުތަކެކެވެ. އެހީއަށް އެދި ގޮވާ އަދޭސްކުރާ އަޑުތަކެވެ. މި ދަންނަވަނީ ފަލަސްޠީނުގެ ކުށެއް ނެތް އެތަށް ހާސް މުސްލިމުން އަބަދާ އަބަދުމެ، އުފުލަމުންދާ ވޭނުގެ އަޑުތަކުގެ ވާހަކައެވެ.

ޖައްބާރު ޔަހޫދީ އިސްރާޢީލުން ފަލަސްޠީނުގެ ބިންތަކަށް ވެރިވެގަނެ، އެ މުސްލިމް އުންމަތުގެ މިނިވަންކަމާއި، އިސްތިޤުލާލު ނަގާލާލަމުން ދާތީ، އެ ޤައުމުގެ އަހުލުވެރީންގެ އުދާހުގެ އަޑުތަކުގެ ވާހަކައެވެ.

އިސްރާޢީލުންގެ ލާއިންސާނީ، ޢަމަލުތަކާއި ދެކޮޅަށް ދުނިޔޭގެ އެތައް ޤައުމަކުން ދަނީ ބަޔާންތައް ނެރެމުންނެވެ. އ.ދ.ގެ އެތައް މަންސަތަކުގައި މުސްލިމް ޤައުމުތަކުން، އެކިގޮތަށް، އެހެންނަމަވެސް އެއް ރާގެއްގައި ފަލަސްޠީނުގެ މުސްލިމުންނަށް، އިސްރާޢީލުން ހިންގަމުންދާ ލާއިންސާނީ ޢަމަލުތައް ހުއްޓާލުމަށް ވަކާލާތު ކުރެއެވެ.

ހަމަ މިބީދައިން ރާއްޖެއިންވެސް ވަނީ އ.ދ. ގައި ބަޔާނެއް އިއްވާފައެވެ. ހަމަ ފަލަސްޠީނުގެ ރައްޔިތުންނަށް ދެމުންދާ އަނިޔާތައް ހުއްޓާލުމަށް އެދިއެވެ. އެ މީހުންނަށް ދެމުންދާ ވޭންތައް ހުއްޓާލުމަށް އެދިއެވެ.

މިފަދަ ބަޔާނެއް ހުށަހަޅާއިރު، އެބަޔާނެއް ހުށަހަޅާ މީހެއްގެ ހިތަށް ކުރަނީ ކިހާ އަސަރެއްތޯ، މިއީ ވެސް ކޮށްލުން ރަނގަޅު ސުވާލެކެވެ. އ.ދ.ގެ 78 ވަނަ ޢާންމު މަޖިލީހުގެ އިޤުތިޞާދީ އަދި މާލީ ކަންތައްތަކާއި ބެހޭ ކޮމެޓީގައި މިމަހުގެ 16 ވަނަ ދުވަހު، ރާއްޖޭގެ ފަރާތުން ބަޔާނެއް އިއްވިއެވެ. މި ބަޔާން އިއްވެވީ ރާއްޖޭގެ ފަރާތުން އ.ދ.އަށް ކަނޑައަޅުއްވާފައި ހުންނަވާ މަންދޫބު ޑރ. ޙާލާ ޙަމީދުއެވެ.

މި ބަޔާން ހުށައަޅުއްވަމުން ޑރ. ޙާލާގެ ހިތްޕުޅަށް ކުރި އަސަރު، ބަންޑުންކޮށްލީ، ފޭސްބުކް ޕޯސްޓަކުންނެވެ. އެތަނުގައި ދައްކަން ޖެހިވަޑައިގަތީ، ހިތަށް، އުނދަގޫވާފަދަ ހިތްދަތި، އެހާމެ ހިތާމަވެރި ވާހަކަތަކެއް ކަމަށް މި ޕޯސްޓުގައި ޑރ. ޙާލާ ފާހަގަކުރެއްވިއެވެ. އެހެނީ ދައްކަންޖެހިވަޑައިގަތީ ކުށެއް ނެތް ޅަ ދަރިންނާއި، ނޫ ކަށި ފުރާއިގެ ޒުވާނުންނާއި، މަޢުސޫމް މައިންނާއި ބަފައިންނާއި، ލޭފަވެތި މާމައިންނާއި ކާފައިން މަރަމުންދާކަމުގެ ވާހަކައެވެ. އިންސާނިއްޔަތުކަމެއް، އޯގާތެރިކަމެއްގެ ކުޑަ މިންވަރެއްވެސް ނެތް ޔަހޫދީން، މުސްލިމުންގެ މުޤައްދަސް ބިމަށް ދެމުންދާ ޙަމަލާތަކެއްގެ ވާހަކައެވެ.

އެތައް އަންހެނުންނެއް ހުވަފަތްވެ، ޢާއިލާތައް ބިކަ ވަމުންދާ ވާހަކައެވެ. މާބަނޑު އެތައް އަންހެނުން މަރުވެ، ދަރިފުޅު ބަނޑަށް މަރުވަމުންދާ ވާހަކައެވެ. ދަރިން ޔަތީމުވެ، ޟަމީރަށް ފުން އަސަރުތަކެއް ކުރުވަނިވި ހިތާމަވެރި ވާހަކަތެކެވެ. މި ވާހަކަތައް ހުށަހަޅާއިރު، ޑރ. ޙާލާގެ ހިތްޕުޅަށް ކިހާ އަސަރެއް ކުރާނެ ތޯއެވެ.

"ދިވެހި ސަރުކާރާއި ދިވެހި ރައްޔިތުން އަބަދުވެސް ތިބޭނީ ފަލަސްތީނުގެ ލޮބުވެތި އަޚުންނާއި އުޚްތުންނާއެކުގައި ކަން ބަޔާނުގައި ފާހަގަކުރީމެވެ. ދިވެހިރާއްޖެއިން އަބަދުވެސް ވަކާލާތުކުރަމުންގެންދާ ފަދައިން ފަލަސްތީނުގެ ޒަމާންވީ ޙާލަތަށް ދާއިމީ ދެމެހެއްޓެނިވި ޙައްލެއް ލިބެން އޮތީ 1967 ގެ ކުރީގެ ބޯޑަރުތަކުގެ މައްޗަށް އެކުލެވިފައިވާ، އިރުމަތީ ޤުދުސް ވެރިރަށެއްގެ ގޮތުގައި ކަނޑައެޅިފައިވާ މިނިވަން މުސްތަޤިއްލު ފަލަސްތީނު ދައުލަތެއް ޤާއިމުކޮށްގެން ކަން ވެސް ދިވެހިސަރުކާރުން ހުށަހެޅި މިބަޔާނުގައި ތަކުރާރުކޮށް އަޅުގަނޑުގެ ޒިންމާ އަދާ ކުރީމެވެ." ޑރ. ޙާލާ ލިޔުއްވާފައިވެއެވެ.

ފަލަސްޠީނުގެ ޣައްޒާގައި ދިރިއުޅޭ، ރައްޔިތުންނަށް 24 ގަޑިއިރުގެ ތެރޭގައި ވަޒަންދޫކޮށް އެހެން ސަރަހައްދަކަށް ހިޖުރަކުރުމަށް، އިސްރާޢީލުން މަޖުބޫރުކުރިއެވެ.

ރާއްޖެއިން އިއްވި މި ބަޔާނުގައި މި ޢަމުރު ކުށްވެރިކޮށް، ރާއްޖޭގެ ފަރާތުން ޑރ. ޙާލާ އަޑު އުފުލިއެވެ. ފަލަސްޠީނުގައި ޙާލުގައި ޖެހިފަ ތިބި ރައްޔިތުންނަށް، އެ މީހުންނަށް ބޭނުންވާ ޟަރޫރީ ބޭނުންތައް ފުއްދުމަށް، ބޭނުންވާ ތަކެތި ފޯރުކޮށްދެވޭނެ މަގެއް ހޯދުމަށް، ބައިނަލްއަޤުވާމީ މުޖުތަމަޢުތަކަށް ރާއްޖޭގެ ފަރާތުން ގޮވާލީވެސް ޑރ. ޙާލާއެވެ.

މުސްލިމުންގެ މިސާލަކީ އަބަަދުވެސް އެއް ހަށިގަނޑެއްގެ މިސާލެވެ. އެ މީހުންގެ އެއްބައިވަންތަކަމަށް ގުޑުމެއް ނާންނާނެއެވެ. ބަޔާން އިއްވަވަމުންވެސް ޑރ. ޙާލާ ފާހަގަކުރެއްވި ވާހަކައަކީ މިއީއެވެ. ދިވެހީން އަބަދުވެސް ތިބޭނީ ފަލަސްޠީނުގެ ލޮބުވެތި މުސްލިމް އަޚުންނާއި އުޚްތުންނާއި އެކީގައި ކަމެވެ.

އެ ދުވަހު ދިވެހީންގެ މި އެދުން، އ.ދ.އަށް ޑރ. ޙާލާ ބަންޑުންކޮށްލިއެވެ.