ފުލުހުންގެ ދައުރު އަދާކުރުމަށްކުރާ މަސައްކަތަކާ ގުޅިގެން ވަކިވަކި ފުލުހުންނާއި އެފުލުހުންގެ ޢާއިލާތަކަށް އިންޒާރުދިނުން ފަދަ މައްސަލަތައް ހުއްޓުވައި ފިޔަވަޅު އެޅުމަށް މުޅި ފުލުހުންގެ މުއައްސަސާ މަސައްކަތްކުރާނެކަމަށް ކޮމިޝަނަރ އޮފް ޕޮލިސް އަޙްމަދު ޢަރީފް ވިދާޅުވެއްޖެއެވެ.
ކޮމިޝަނަރ އޮފް ޕޮލިސް މިހެން ވިދާޅުވީ، ކ.އަތޮޅުގެ ދެރަށަކަށް ކުރައްވާ ދަތުރުފުޅުގައި ކ.ހިންމަފުށި ކައުންސިލް މެމްބަރުންނާ ބައްދަލުކުރައްވައި، ދެއްކެވި ވާހަކަފުޅުގައެވެ. ކޮމިޝަނަރ ވިދާޅުވީ ފުލުހުންގެ މުއައްސަސާގައިވެސް ރަނގަޅުކުރަންޖެހޭ ކަންކަން ހުންނާނެކަމަށް ޤަބޫލުފުޅު ކުރައްވާ ކަމަށެވެ. އެހެންކަމުން އެކަންކަން ރަނގަޅުކުރައްވަން މަސައްކަތް ކުރައްވަމުން ގެންދަވާއިރު، ފުލުހުންގެ މުއައްސަސާއާ ދޭތެރޭގައި ރައްޔިތުން ނަފްރަތު އުފެއްދުމަށް ބައެއް ފަރާތްތަކުން މަސައްކަތްކުރުމުގެ ބަދަލުގައި ފުލުހުންގެ މުއައްސަސާ ރަނގަޅުކުރުމަށް ހަމަޖެހިފައިވާ އުޞޫލުތަކުގެ ތެރެއިން މަސައްކަތް ކޮށްދެއްވުމަށް ކޮމިޝަނަރ އޮފް ޕޮލިސް އެދިވަޑައިގެންނެވިއެވެ.
ޢަރީފް ވިދާޅުވީ، ފުލުހުންގެ ޚިދުމަތް މިހާރަށްވުރެ ހަރުދަނާކޮށް ފުޅާކުރެއްވުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށެވެ. ހަމަ އެއާއެކު ފުލުހުންގެ ޚިދުމަތް މިހާރަށްވުރެ ހަރުދަނާކުރުމަށް ރައްޔިތުންގެ ހިޔާލާއި މަޝްވަރާ ބޭނުންވާކަމަށްވެސް ވިދާޅުވިއެވެ.
ކޮމިޝަނަރ އޮފް ޕޮލިސް ވިދާޅުވީ މިގޮތުން ދެއްވާ ޚިޔާލުފުޅާއި މަޝްވަރާއަކީ ބިނާކުރަނިވި ޚިޔާލުފުޅާއި މަޝްވަރާއަށްވުން މުހިއްމު ކަމަށެވެ.
ފުލުހުންގެ މުއައްސަސާގެ ކަންކަމަށް ބިނާކުރަނިވި ފާޑުކިޔުއްވަން އަބަދުވެސް މަރުޙަބާކިޔުއްވާނެ ކަމަށާއި ރައްޔިތުން ދޭ އެފަދަ ޚިޔާލުފުލުތަކާއި ފާޑު ކިޔުއްވުންތައް ފުލުހުން ހެޔޮ ހިތުން ބަލައިގަންނާނެ ކަމުގައިވެސް ކޮމިޝަނަރ އޮފް ޕޮލިސް ވިދާޅުވިއެވެ.