ސުޕްރީމް ކޯޓާއި ހައިކޯޓުގެ ފަނޑިޔާރުންނަށް ދައުލަތުން ދެއްވާ ހެލްތު އިންޝިއުރަންސް ޕެކޭޖްތައް ދިރާސާކުރެއްވުމަށް މާލިއްޔަތު ކޮމިޓީގެ ކުޑަ ކޮމިޓީއަށް ފޮނުއްވައިފިއެވެ.
ސުޕްރީމްކޯޓުގެ ފަނޑިޔާރުންނަށް ހެލްތު އިންޝިއުރަންސްގެ ޚިދުމަތް މެދުނުކެނޑޭފަދަ ގޮތަކަށް އެ ޕްރީމިއަމް މުރާޖަޢާކޮށްދެއްވުން އެދިވަޑައިގެން ސުޕްރީމް ކޯޓުން ރައްޔިތުންގެ މަޖިލީހުގެ މާލިއްޔަތު ކޮމިޓީއަށް ސިޓީ ފޮނުއްވާފައިވެއެވެ. އަދި ހައިކޯޓުންވެސް ވަނީ އެކޯޓުގެ ފަނޑިޔާރުންނަށް މަޤާމާއި އެކަށީގެންވާ ހެލްތު އިންޝިއުރަންސް ޕެކޭޖެއް ހަމަޖައްސަވައިދެއްވުމަށް އެދިވަޑައިގެން، ކޮމިޓީއަށް ސިޓީ ފޮނުއްވަވާފައެވެ.
ހައިކޯޓްގެ ފަނޑިޔާރުންނަށް ހެލްތު އިންޝިއުރަންސްގެ ގޮތުގައި އަހަރަކަށް ދުއިސައްތަ ސާޅީސް ހާހަށްވުރެ ގިނަ ރުފިޔާގެ އިންޝިއުރަންސް، ބޭރުގެ ޤައުމުތަކުގެ ހޮސްޕިޓަލްތަކުން ލިބިވަޑައިގަންނަވައެވެ. އެ ފަރާތްތަކަށް އިންޝިއުރަން ފޯރުކޮށްދެމުން އަންނަނީ އެލައިޑް އިންޝިއުރަންސް ކުންފުނި މެދުވެރިކޮށެވެ. ނަމަވެސް އެލައިޑް މެދުވެރިކޮށް ޚިދުމަތް ފޯރުކޮށްދޭ ބޭރުގެ ބައެއް ޞިއްޙީ ޚިދުމަތްދޭ ތަންތަނުން ޚިދުމަތުގެ އަގު ބޮޑުކޮށްފައިވާތީ އެކަންވެސް ވަނީ ކޮމިޓީގެ ސަމާލުކަމަށް ގެންނަވައި، އެކަމަށް ޙައްލެއް ހޯއްދެވުމަށް މަޝްވަރާކުރައްވާފައެވެ.
މި މައްސަލައަށް މިއަދުގެ ކޮމިޓީގައި ބަޙުސްކުރައްވަމުން ބައެއް މެމްބަރުން ވިދާޅުވީ، ފަނޑިޔާރުންނަށް އާސަންދައިން ހިލޭ ބޭސްފަރުވާގެ ޚިދުމަތް ލިބިވަޑައިގަންނަވަމުން އަދި ހެލްތު އިންޝިއުރަންސް ލިބުމަކީ ޤަބޫލްކުރެއްވޭ ކަމެއް ނޫންކަމަށެވެ. އެހެންކަމުން އެފަރާތްތަކުގެ އިންޝިއުރަންސް އާސަންދަ ކުންފުންޏާ ޙަވާލުކުރުމަށް ބައެއް މެމްބަރުން ގޮވާލެއްވިއެވެ. ނަމަވެސް އެކަމާ ދެކޮޅަށް ވާހަކަ ދެއްކެވި މެމްބަރުން ވިދާޅުވަމުން ގެންދެވީ އާސަންދަ މެދުވެރިކޮށް ބޭރު ޤައުމުތަކުން ބޭނުން ވަގުތަކު ޚިދުމަތް ހޯދެވުމަކީ އިންސާފަކަށް ނުވާނެކަމަށެވެ.
މިކަމާ ގުޅިގެން ބައެއް މެމްބަރުންގެ މެދުގައި ޚިޔާލު ތަފާތުވެ، ވިލުފުށީ ދާއިރާގެ މެމްބަރު ވަނީ ހުރިހަ ކޯޓުތަކެއްގެ ފަނޑިޔާރުންނަށް ފޯރުކޮށްދޭ އިންޝިއުރެންސް ދިރާސާ ކުރެއްވުމަށް މާލިއްޔަތު ކޮމިޓީގެ ކުޑަ ކޮމިޓީއަކަށް ފޮނުއްވުމަށް ހުށައަޅުއްވާފައެވެ. އަދި މެމްބަރުން އެކަމަށް ތާއީދުކުރެއްވިއެވެ މުސާރައާއި ޢިނާޔަތްތައް ދިރާސާކުރެއްވުމަށް އެކުލަވާލެއްވި ކުޑަ ކޮމިޓީގައި ހިމެނިވަޑައިގަންނަވަނީ، ވިލުފުށީ ދާއިރާގެ މެމްބަރު ރިޔާޒް ރަޝީދާއި، ކުޅުދުއްފުށީ އުތުރު ދާއިރާގެ މެމްބަރު ޢަބްދުލްޤަފޫރު މޫސާއާއި، ކާށިދޫ ދާއިރާގެ މެމްބަރު ފައިސަލް ނަސީމާއި ކުޑަހުވަދޫ ދާއިރާގެ މެމްބަރު އަޙްމަދު ޢާމިރު އަދި ގައްދޫ ދާއިރާގެ މެމްބަރު އަޙްމަދު ރަޝީދެވެ.