ސިނަމާލެ ފްލެޓު ދޫކޮށްލުމުން، ގެދޮރުވެރިޔާ ސްކީމުން ފްލެޓު ދޫކުރަނީ

ކުރީގެ ސަރުކާރުގައި ދޫކުރި ސިނަމާލެ ފްލެޓާއި އެނޫންވެސް އެހެން ބައެއް ފްލެޓުތައް ދޫކޮށްލަން ބޭނުންވާ މީހުންނަށް، ސަރުކާރުގެ ބިންވެރިޔާ އަދި ގެދޮރުވެރިޔާ ސްކީމްގެ ދަށުން ދޫކުރާ ފްލެޓާއި ގޯއްޗަށް ކުރިމަތިލެވޭނެކަމަށް ހައުސިން މިނިސްޓްރީން ވިދާޅުވެއްޖެއެވެ.

ހައުސިންގ މިނިސްޓްރީގެ ސްޓޭޓް މިނިސްޓަރ އަކްރަމް ކަމާލުއްދީން ވިދާޅުވީ، ކުރީގެ ސަރުކާރުން ދޫކޯށްފައިވާ ސިނާމާލެ ފްލެޓުގައި ދިރިއުޅޭ މީހުންނަށް، އެ ދިރިއުޅޭތަން ދޫކޮށްލަން އެއްބަސްވާނަމަ ސަރުކާރުން މިހާރު ދޫކުރާ ފްލެޓަށް ކުރިމަތިލުމުގެ ފުރުޞަތު އޮންނާނެކަމަށެވެ.

މީގެ އިތުރުން މީގެ ކުރިން ދޫކޮށްފައިހުރި އެއް ކޮޓަރީގެ ފްލެޓުތަކާއި، ކުންފުނިތަކުން ދޫކޮށްފައިހުރި ފްލެޓުތަކުގައި ދިރިއުޅޭ މީހުންވެސް ބިމާއި ފްލެޓަށް ކުރިމަތިލެވޭނެކަމަށް އަކްރަމް ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއުލާން ކުރެއްވި "ބިންވެރިޔާ" ސްކީމާއި "ގެދޮރުވެރިޔާ" ސްކީމްގެ ދެވަނަ ފިޔަވަހީގެ ދަށުން ފްލެޓާއި ގޯއްޗަށް ކުރިމަތިލުމަށް މިހާރު ވަނީ ހުޅުވާލާފައެވެ. މި ސްކީމްތަކުގެ ދަށުން މާލެ ސަރަހައްދުން 4000 ގޯއްޗާއި 6000 ފްލެޓް ދޫކުރުމަށް ވަނީ ނިންމާފައެވެ.

ގެދޮރުވެރިޔާ ސްކީމްގެ ދެވަނަ ފިޔަވަހީގެ ދަށުން ފުލެޓް ދޫކުރުމަށްވެސް ހަމަޖެހިފައިވަނީ މާލެ ސަރަޙައްދުންނެވެ.

މިހާރު ހުރި ސިނަމާލެ އިމާރާތްތަކަކީ ގިނަ ދުވަސްވުމުގެ ސަބަބުން އެތައް މައްސަލަތަކެއް ދިމާވެފައިވާ އިމާރާތްތަކަކެވެ.

މާލޭގެ ގަލޮޅު ގައި ހުންނަ މާލޭ ހިޔާ އަދި ސިނަމާލެ ފްލެޓުތަކަކީ މާލޭގައި އެންމެ ފުރަތަމަ ދޫކުރި ފްލެޓުތަކެވެ. އެ ޢިމާރާތްތައް މަރާމާތު ނުކުރެވުމުގެ ސަބަބުން އެތަނުގައި ދިރިއުޅޭ ރައްޔިތުންނަށް ދަނީ ވަރަށް ބޮޑެތި ދަތިތަކާއި ކުރިމަތިވަމުންނެވެ. އިމާރާތް މަރާމާތުކުރުމަށް ކުރުމަށް ކުރަންޖެހޭ މަސައްކަތްތައްވެސް ނުކުރެވޭކަން އެ ޢިމާރާތުގައި ދިރިއުޅޭ ފަރާތްތަކުން ފާހަގަކުރެއެވެ.