ރާއްޖޭގައި މިހާރު އެކުލަވާލައްވާފައިވާ ބައެއް ޤަވައިދުތަކަށް ޤާނޫނީ ބާރު ދިނުމަށްޓަކައި ކަމާބެހޭ ޤާނޫނުތައް ހެދެންދެން އެ ޤަވާއިދުތަކަށް ޢަމަލުކުރުމުގެ މުއްދަތު އިތުރުކޮށްދިނުމަށް ރައްޔިތުންގެ މަޖިލީހުން މިއަދު ފާސްކުރައްވައިފިއެވެ.
އެގޮތުން ޤާނޫނު އެކުލަވާލެވެންދެން 41 ޤަވާއިދަކަށް ޢަމަލުކުރެއްވުމުގެ މުއްދަތު އިތުރުކޮށްދެއްވާފައިވެއެވެ.
އެޤަވާއިދުތަކަށް ޢަމަލުކުރެއްވުން އިތުރުކޮށްދެއްވާފައި ވަނީ 2017 ވަނަ އަހަރުގެ އޭޕްރީލް މަހުގެ ނިޔަލަށެވެ. މި ޤަވާއިދުތައް ދިރާސާކުރެއްވި، ޤަވާއިދު ކޮމިޓީގެ މުޤައްރިރު ކުޅުދުއްފުށި ދެކުނު ދާއިރާގެ މެމްބަރު މުޙައްމަދު ނަޝީދު ވިދާޅުވީ، އާ ޤާނޫނު އަސާސީގެ ދަށުން އެކުލަވާލެއްވި 88 ޤަވާއިދެއްގެ ތެރެއިން މިހާތަނަށް ޤާނޫނު އެކުލަވާލެވިފައި ނުވަނީ 37 ޤަވައިދަކަށްކަމަށެވެ.
ޢަމަލުކުރުމުގެ މުއްދަތު އިތުރުކޮށްދީފައިވާ ބައެއް ޤަވާއިދުތަކުގެ ތެރޭގައި ޖިނާއީ އިޖުރާތުގެ ޤަވާއިދާއި، ޖިނާއީ ކުށުގެ މައްސަލަތައް އަވަސް ނިޔާއިން ނިންމުމާބެހޭ ޤަވާއިދު ހިމެނެއެވެ. މީގެ އިތުރުން ކުށެއްގެ ތުހުމަތުގައި ބަންދުކުރެވޭ މީހުން ފަނޑިޔާރެއްގެ ކުރިމައްޗަށް ހާޟިރުކޮށް ބަންދާ މެދު ގޮތެއް ނިންމުމުގެ ޤަވާއިދުވެސް ހިމެނެއެވެ. އަދި ރާއްޖޭގެ ޞިއްޙީ ފަރުވާދޭ ކްލިނިކްތައް ހިންގުމުގެ ޤަވާއިދާއި، މެޑިކަލް ކައުންސިލްގެ ޤަވާއިދާއި، ރާއްޖޭގެ ކުޅިވަރުގެ ޤައުމީ މަޖިލީހުގެ ޤަވާއިދާއި، ކާބޯ ތަކެތީގެ ޚިދުމަތްދޭ ތަންތަނާއި ބެހޭ ޢާންމު ޤަވާއިދު ހިމެނެއެވެ.