"ވިޒިޓް މޯލްޑިވްސް ޕްރޯ 2023" ޑިޖިޓަލް ޕާޓްނަރަކަށް ދިރާގު

މޯލްޑިވްސް ބޮޑީބޯރޑިންގ އެސޯސިއޭޝަން (އެމް.ބީ.ބީ.އޭ) އާއި އިންޓަނޭޝަނަލް ބޮޑީބޯރޑިންގ ކޯޕަރޭޝަން (އައި.ބީ.ސީ) އިން ގުޅިގެން ބާއްވާ 'ވިޒިޓް މޯލްޑިވްސް ޕްރޯ 2023' އައި.ބީ.ސީ ބޮޑީބޯރޑިންގ ވަރލްޑް ޓުއާރގެ ޑިޖިޓަލް ޕާރޓްނަރަކަށް ދިރާގު ހަމަޖައްސައިފިއެވެ.

'ވިޒިޓް މޯލްޑިވްސް ޕްރޯ 2023' އަކީ އައި.ބީ.ސީ ވަރލްޑް ޓުއަރގެ މޯލްޑިވްސް ޕްރޯ ސީރީޒްގެ ދެވަނަ އެޑިޝަންއެވެ.

މިދިޔަ އަހަރު ރާއްޖޭގައި ބޭއްވި ބޮޑީބޯރޑިންގ އިވެންޓް ވަނީ 2022 ވަނަ އަހަރުގެ ވަރލްޑް ޓުއާރގެ އެންމެ ކާމިޔާބު އިވެންޓުގެ ގޮތުގައި ރޭޓް ކުރެވިފައެވެ. އަދި މިއަަހަރުގެ އިވެންޓަކީ އޭޝިއާ ސަރަހައްދުގައި ބޭއްވޭ އެންމެ ބޮޑު ބޮޑީބޯރޑިންގ އިވެންޓަށް ވާނެކަމަށްވެސް އިވެންޓް އިންތިޒާމް ކުރާ ފަރާތުން ލަފާކުރައްވައެވެ.

މި އަހަރުގެ އިވެންޓަށް ދުނިޔޭގެ ފެންވަރުގެ މަޝްހޫރު އެތައް ބޮޑީބޯރޑަރުންނާއެކު މިދިޔަ ފަހަރަށް ވުރެ ދެގުނަ އިތުރަށް އެތުލީޓުންވެސް ބައިވެރިވުމަށް ވަނީ ހަމަޖެހިފައެވެ. އިވެންޓް ކުރިއަށްދާނީ އޯގަސްޓު 3 އިން 12އަށް މާލޭގެ ވަރުނުލާ ރާޅުގަނޑު ސަރަހައްދުގައެވެ.

ދިރާގުގެ ކަސްޓަމަރ ސާރވިސަސް އެންޑް ރީޖަނަލް އޮޕަރޭޝަންސްގެ ޑިރެކްޓަރ، މަސްއޫދު އަލީ ވިދާޅުވީ 'ވިޒިޓް މޯލްޑިވްސް ޕްރޯ 2023' އައި.ބީ.ސީ ބޮޑީބޯރޑިންގ ވަރލްޑް ޓުއާރގެ ޑިޖިޓަލް ޕާޓްނަރަށްވެ، ދެވަނަ ފަހަރަށް މި އިވެންޓް ރާއްޖެއަށް ގެނެސްދިނުމަށް އެހީތެރިވެދިނުމަކީ ދިރާގަށް ލިބޭ ވަރަށް ބޮޑު އުފަލެއްކަމަށެވެ.

"ރާއްޖޭގައި ބޮޑީބޯރޑިންގ ހަލުވިކަމާއެކު ކުރިއަރަމުން އައުމާއި، އަޅުގަނޑުމެންގެ ޤައުމީ އެތުލީޓުން ރާއްޖޭގެ ރާޅުތަކުގައި އަދި ބައިނަލްއަޤްވާމީ ފެންވަރުގައި ވިދާލާތަން ފެނުމަކީވެސް އަޅުގަނޑުމެންނަށް ލިބޭ ވަރަށް ބޮޑު ފަޚުރެއް" މަސްއޫދު ވިދާޅުވިއެވެ.

މޯލްޑިވްސް ބޮޑީބޯރޑިންގ އެސޯސިއޭޝަން، އެމް.ބީ.ބީ.އޭގެ ރައީސް އަބްދުﷲ އަރީފް ވިދާޅުވީ މިއަހަރު ރާއްޖޭގައި ބާއްވާ މި އިވެންޓަކީ އައި.ބީ.ސީ ޓުއަރގެ ރޭންކިންގއަށް ވަރަށް މުހިންމު އިވެންޓެއްކަމަށެވެ. އެހެންކަމުން މި އިވެންޓަށް ދުނިޔޭގެ އެކި ކަންކޮޅުތަކުން ހުނަރުވެރި ބޮޑީބޯރޑަރުން އައިސް، ރާއްޖެއަކީ ކުރިއަރާފައިވައި ބޮޑީބޯރޑިންގ މަންޒިލެއްގެ ގޮތުގައި ދުނިޔޭގައި މަޝްހޫރުވުމަށް އިތުރަށް މަގުފަހިވެގެންދާނެކަމަށްވެސް އޭނާ ވިދާޅުވިއެވެ.

"ބައިނަލްއަޤްވާމީ ފެންވަރުގައި ފާހަގަކޮށްލެވޭ މި އިވެންޓް ދެވަނަ ފަހަރަށް ރާއްޖެގައި ކުރިއަށްވުރެ ފުރިހަމަކޮށް ގެނައުމުގައި ދިރާގުން ދެމުން ގެންދާ އެއްބާރުލުމަށް ވަރަށް ޚާއްސަ ޝުކުރެއް ދަންނަވަން" އަރީފް ވިދާޅުވިއެވެ.

ދިރާގަކީ ރާއްޖޭގެ ކުޅިވަރުގެ ދާއިރާ އިތުރަށް ހަރުދަނާ ކުރުމަށާއި އަދި މި ދާއިރާގައި ޝާމިލްވާ ފަރާތްތަކަށް އިތުރު ފުރުޞަތުތައް ފަހިކޮށްދޭ މިފަދަ އިވެންޓްތަކަށް އަބަދުވެސް އެއްބާރުލުންދެމުން އަންނަ ކުންފުންޏެކެވެ.