އިމްޕޯޓް އެކްސްޕޯޓުން ލިބުނު އާމްދަނީ ދަށަށް!

މިދިޔަ ޖޫންމަހު އިމްޕޯޓް އެކްސްޕޯޓުން ދައުލަތަށް ލިބުނު އާމްދަނީ ދަށަށް ގޮސްފައިވާކަމަށް މޯލްޑިވްސް ކަސްޓަމްސްއިން ވިދާޅުވެއްޖެއެވެ.

ކަސްޓަމްސްގެ ތަފާސް ހިސާބުތައް ދައްކާގޮތުން މިދިޔަ އަހަރުގެ ޖޫން މަހު ދިވެހިރާއްޖެއަށް 5.2 ބިލިއަން ރުފިޔާގެ މުދާ އިމްޕޯޓް ކޮށްފައިވެއެވެ. ނަމަވެސް މި އަހަރުގެ ޖޫންމަހު މި ޢަދަދު ވަނީ 4 ބިލިއަން ރުފިޔާ އަށް ދަށްވެފައެވެ. އަދި ފާއިތުވި ޖޫން މަހު ދައުލަތަށް ލިބުނު އާމްދަނީ 2022 ވަނަ އަހަރުގެ ޖޫން މަހާ އަޅާބަލާއިރު 12 އިންސައްތަ ވަނީ ދަށްވެފައެވެ.

ތަފާސް ހިސާބުތައް ދައްކާގޮތުން ފާއިތުވި ޖޫންމަހު ރާއްޖެއަށް އިމްޕޯޓް ކުރެވުނު މުދަލުގެ ސީ.އައި.އެފް އަގު 2022 ވަނަ އަހަރުގެ ޖޫންމަހާއި އަޅާބަލާއިރު 24 އިންސައްތަ ވަނީ ދަށްވެފައެވެ. އެގޮތުން މިދިޔަ އަހަރުގެ ޖޫން މަހު 394 މިލިއަން ރުފިޔާ ދައުލަތަށް ބިފައިވާއިރު، މި އަހަރުގެ ޖޫން މަހު މި ޢަދަދުވަނީ 347 މިލިއަން ރުފިޔާއަށް ދަށްވެފައެވެ.

ޖޫންމަހު ދިވެހިރާއްޖެއަށް އެންމެ ގިނައިން މުދާ އެތެރެކޮށްފައިވާ ގައުމުތަކަކީ އޮމާން، ޗައިނާ، އިންޑިއާ، ޔޫ.އޭ.އީ އަދި ސިންގަޕޯރއެވެ. އޮމާންއިން 706 މިލިއަން ރުފިޔާގެ މުދާ، ޗައިނާއިން 550 މިލިއަން ރުފިޔާގެ މުދާ، އިންޑިއާއިން 545 މިލިއަން ރުފިޔާގެ މުދާ، ޔޫ.އޭ.އީއިން 439 މިލިއަން ރުފިޔާގެ މުދާ އަދި ސިންގަޕޯރއިން 287 މިލިއަން ރުފިޔާގެ މުދާ ވަނީ ރާއްޖެ އެތެރެކޮށްފައެވެ.