ފުރަތަމަ 6 މަސްދުވަހު ޑޮލަރުން ލިބުނު އާމްދަނީ އިތުރު

މިއަހަރުގެ ފުރަތަމަ 6 މަސްދުވަހު ޑޮލަރުން ލިބުނު އާމްދަނީ އިތުރުވެއްޖެއެވެ. ދިވެހި ރުފިޔާގެ އިތުރުން ކޮންމެ މަހަކުވެސް މޯލްޑިވްސް އިންލޭންޑް ރެވެނިއު އޮތޯރިޓީ، މީރާއަށް ބަލައިގަންނަ އާމްދަނީގެ ބޮޑުބައެއް ޑޮލަރު އާމްދަނީ ހިއްސާކުރެއެވެ.

މީރާއިން އާންމުކޮށްފައިވާ ތަފާސްހިސާބަށް ބަލާއިރު މިދިޔަ އަހަރާއި އަޅާބަލާއިރު މިއަހަރުގެ ފުރަތަމަ 6 މަސްދުވަހު ޑޮލަރުން ލިބިފައިވާ އާމްދަނީ ވަނީ އިތުރުވެފައެވެ. މިއަހަރުގެ ފުރަތަމަ 6 މަސްދުވަހު ޑޮލަރުން ލިބިފައިވާ އާމްދަނީއަކީ 485.94 މިލިއަން ޑޮލަރެވެ. އަދި މިދިޔަ އަހަރު މި ޢަދަދު އުޅުނީ 454.47 މިލިއަން ޑޮލަރުގައެވެ.

މިއަހަރުގެ ފުރަތަމަ 6 މަސްދުވަހު ލިބިފައިވާ ޑޮލަރު އާމްދަނީ:

• ޖަނަވަރީ - 112.8 މިލިއަން ޑޮލަރު
• ފެބްރުއަރީ - 73.60 މިލިއަން ޑޮލަރު
• މާރޗް - 100.99 މިލިއަން ޑޮލަރު
• އޭޕްރީލް - 77.35 މިލިއަން ޑޮލަރު
• މެއި - 72.78 މިލިއަން ޑޮލަރު
• ޖޫން - 48.42 މިލިއަން ޑޮލަރު

2022 ވަނަ އަހަރުގެ ފުރަތަމަ 6 މަސްދުވަހު ލިބިފައިވާ ޑޮލަރު އާމްދަނީ:

• ޖަނަވަރީ - 73.88 މިލިއަން ޑޮލަރު
• ފެބްރުއަރީ - 63.09 މިލިއަން ޑޮލަރު
• މާރޗް - 106.71 މިލިއަން ޑޮލަރު
• އޭޕްރީލް - 72.65 މިލިއަން ޑޮލަރު
• މެއި - 55.54 މިލިއަން ޑޮލަރު
• ޖޫން - 82.60 މިލިއަން ޑޮލަރު

މީރާއަށް ލިބޭ ޑޮލަރު އާމްދަނީގެ ބޮޑުބައެއް ހިއްސާކުރަނީ ރިސޯޓްތަކުން ދައްކާ ޓެކުހެވެ. ފަތުރުވެރިކަން ރަނގަޅުވަމުން އަންނައިރު މީރާއަށް ލިބޭ އާމްދަނީވެސް އަންނަނީ އިތުރުވަމުންނެވެ.

މީރާއަށް ޓެކްސް ދައްކާ ފަރާތްތަކަށް ފަސޭހަކޮށްދިނުމުގެ ގޮތުން އެ އިދާރާއިން ވަނީ އޮންލައިންކޮށް ޓެކްސް ދެއްކޭނެ ފަސޭހަ ނިޒާމެއް ޤާއިމްކޮށްދީފައެވެ. "މީރާ ކަނެކްޓް" މެދުވެރިކޮށް ހުރިހާ ޓެކުހެއްވެސް އޮންލައިންކޮށް ދައްކާލެވޭނެއެވެ.