ފަތުރުވެރިކަމުންދޭ އެހީތެރިކަން ދެމެހެއްޓެނިވި ތަރައްޤީ ލިބޭ ގޮތަށް ބައްޓަން ކުރުން މުހިންމު: އީޔޫ

ފަތުރުވެރިކަމަށްދޭ އެހީ ދެމެހެއްޓެނިވި ގޮތެއްގައި މަންފާ ލިބޭ ގޮތަށް ބޭނުން ކުރުން މުހިންމު ކަމަށް ސްރީލަންކާއާއި ރާއްޖެއަށް އީޔޫއިން ކަނޑައަޅާފައި ހުންނަވާ ހެޑް އޮފް ކޯޕަރޭޝަން އެޓް ދަ އީޔޫ ޑެލިގޭޝަން ޔޯހާން ހެސީ ވިދާޅުވެއްޖެއެވެ. އޭނާ މިހެން ވިދާޅުވީ މޯލްޑިވްސް ފަންޑް މެނޭޖްމަންޓް ކޯޕަރޭޝަނާއި ޔޫރަޕިއަން ޔޫނިއަން ގުޅިގެން "އީޔޫ ސަޕޯޓް ފޯ އަ ރެޒީލިއަންޓް ރިކަވަރީ އޮފް އެސްއެމްއީ ޓޫރިޒަމް އިންޑަސްޓްރީސް އިން ދަ މޯލްޑިވްސް" - ޕްރޮޖެކްޓުގެ ދަށުނ،ް މާފުށީގެ ގެސްޓްހައުސްތަކަށް މަޢުލޫމާތު ފޯރުކޮށްދިނުމަށް ބޭއްވި ބައްދަލުވުމުގައެވެ.

މި ބައްދަލުވުމުގައި ވާހަކަދައްކަވަމުން ޔޯހާން ހެސ،ީ ވިދާޅުވީ، ޔޫރަޕިއަން ޔޫނިއަން ގެ ފަރާތުން ފަންޑު ކުރެވޭ މަޝްރޫޢުތަކަކީ ވީހާވެސް ގިނަ ފަރާތްތަކަށް އޭގެ މަންފާ ލިބޭ ގޮތަށް ފަރުމާކުރެވިފައިވާ މަޝްރޫޢުތަކެއްކަމަށެވެ. އީޔޫގެ މަސައްކަތްތައް ބިނާކުރެވިގެންދަނީ ދިވެހި ސަރުކާރުގެ އެޖެންޑާއާއި އެއްގޮތަށްކަން އޭނާ ފާހަގަކުރެއްވިއެވެ.

ފަތުރުވެރިކަމުގެ ސިނާއަތުގައި ހަރަކާތްތެރިވާ ގެސްޓްހައުސްތަކާއި ސަފާރީ އުޅަނދު ފަދަ ކުދި ވިޔަފާރިތަކުގެ ކުރިއެރުވުމަށް އީޔޫ އިން އަބަދުވެސް މަސައްކަތް ކުރަމުންދާކަން ފާހަގަކުރައްވާ އޭނާ ވިދާޅުވީ، ދެމެހެއްޓެނިވި ތަރައްޤީ ލިބޭނެ ފަދަ ގޮތަކަށް މިފަދަ ޕްރޮޖެކްޓުތައް ބައްޓަންކުރުން މުހިއްމުކަމަށެވެ.

މާފުށީގައި ބޭއްވި މަޢުލޫމާތު ސެޝަންގެ ތެރެއިން ފަތުރުވެރިކަމުގެ ސިނާއަތުގައި ޙަރަކާތްތެރިވާ ގެސްޓްހައުސް ވިޔަފާރިތަކަށް ފަންނީ ކުރިއެރުން ލިބޭނެފަދަ ދާއިރާތަކަށް އަލިއަޅުވާލާފައިވާ ކަމަށް މޯލްޑިވްސް ފަންޑު މެނޭޖްމަންޓް ކޯޕަރޭޝަނުން ވިދާޅުވެއެވެ.

މި ޕްރޮޖެކްޓުގެ ދެވަނަ ކޮމްޕޮނެންޓްގެ ދަށުން ގެސްޓްހައުސް ވިޔަފާރިތަކަށް ފަންނީ ކުރިއެރުމާއި މާލީ ތަރައްޤީގެ ފުރުސަތުތަކަށް މަގުފަހިކޮށްދިނުމުގެ ގޮތުން ވަނީ ގެސްޓުހައުސް ހިންގުމާއިގުޅޭ 8 ދާއިރާއަކަށް އަލިއަޅުވާލާފައެވެ. އެގޮތުނ،ް މިސެޝަން ނިމިގެންދިޔައިރު ވަނީ ފައިނޭންޝަލް މެނޭޖްމަންޓާއި ފްރަންޓް އޮފިސް އޮޕަރޭޝަނާއި ވޭސްޓް މެނޭޖްމަންޓް އަދި ދެމެހެއްޓެނިވި ތަރައްޤީގެ އިތުރުން ކޯވިޑް 19 ގެ ސަބަބުން ކުރިމަތިވި ގޮންޖެހުންތަކުން އަރައިގަތުމަށްޓަކައި އެޅިދާނެ ފިޔަވަޅުތަކާއި ގުޅޭ ގޮތުން މަޢުލޫމާތު ޙިއްސާކޮށްފައެވެ.