މާފަރާއި މަޑިވަރަށް މޯލްޑިވިއަނުން އިތުރު ދަތުރުތައް ބާއްވަން ފަށައިފި

ޤައުމީ އެއަރލައިން މޯލްޑިވިއަނުން ނ. މާފަރާއި ޅ. މަޑިވަރަށް ކުރާ ދަތުރުތައް އިތުރުކޮށްފިއެވެ. ދަތުރުތައް އިތުރުކޮށް ފެށީ މިދިޔަ ބުރާސްފަތި ދުވަހުއެވެ.

މޯލްޑިވިއަން ހިންގާ އައިލެންޑް އޭވިއޭޝަނުން ބުނީ ދަތުރުތައް އިތުރުކުރަނީ މިމަންޒިލްތަކަށް އޮތް ޑިމާންޑް ބޮޑުވުމުންކަމަށެވެ.

މޯލްޑިވިއަނުން މިމަންޒިލްތަކަށް ކުރާ ދަތުރުތައް މިމަހުގެ 20 ވަނަ ދުވަހުން ފެށިގެން އިތުރުކުރާއިރު، މާލެއިން ސީދާ މާފަރަށް އަދި މާފަރުން މާލެއަށް އާދެވޭގޮތަށް ޑައިރެކްޓްކޮށް ކޮންމެ ދުވަހަކުވެސް ދަތުރުކުރާނެއެވެ. އަދި މާލެއިން މަޑިވަރަށް، އަދި މަޑިވަރުން މާފަރަށްގޮސް މާލެ އާދެވޭގޮތަށްވެސް ދަތުރުތަކެއް ބާއްވާނެއެވެ. އެ އެއަރލައިނުން މިވަގުތު މި ދެ މަންޒިލަށްވެސް ކުރަނީ ދުވާލަކު 1 ދަތުރެވެ.

މޯލްޑިވިއަނުން އަބަދުވެސް ޑިމާންޑަށް ބެލުމަށްފަހު މަންޒިލްތަކަށް އިތުރު ފްލައިޓްތައް ބާއްވައެވެ. އެގޮތުން ޢީދާއި އަދި ޗުއްޓީ ބަންދާއި ދިމާކޮށްވެސް މޯލްޑިވިއަނުން ވަނީ ޑޮމެސްޓިކް އަދި އިންޓަރނޭޝަނަލް މަންޒިލްތަކަށް އިތުރު ފްލައިޓްތައް ބާއްވާފައެވެ.

މޯލްޑިވިއަނުން ބުނީ މިހާރުވެސް އެތެރޭގެ އުދުހުންތަކުގެ ޑިމާންޑް ވަރަށް ބޮޑުވެފައިވާކަމަށެވެ. އެހެންކަމުން ޑިމާންޑް އިތުރުވަމުންދާ މަންޒިލްތަކަށް އިތުރު ދަތުރުތައް ބާއްވަމުންދާކަމަށެވެ.