2 އަތޮޅެއްގައި 3 ކަނދުފަތި އަޅައިފި

މިނިސްޓްރީ އޮފް ފިޝަރީޒް އެންޑް އެގްރިކަންލްޗަރއިން ރާއްޖޭގެ 2 އަތޮޅެއްގައި 3 ކަނދުފަތި އަޅުއްވައިފިއެވެ.

ފިޝަރީޒް މިނިސްޓްރީން ކަނދުފަތި އަޅުއްވާފައިވަނީ ބ.އަތޮޅާއި ޅ އަތޮޅުގައެވެ.

ކަނދުފައްޗަކީ ދޮށީގެ މަސްވެރިކަން ކުރާ ފަރާތްތަކުގެ މަސައްކަތަށް ފަސޭހަކޮށްދިނުމުގެ ގޮތުން، އެއް ދިމާލަަކަށް މަސްޖަމާވާ ގޮތަށް ކަނޑަށް ފައްތާފައި އޮންނަ ބޮއެކެވެ.

ފިޝަރީޒް މިނިސްްޓްރީން ރާއްޖޭގެ އެކި ކަންކޮޅުތަކުގައި ކަނދުފަތި އެޅުއްވުމުގެ މަސައްކަތް ކުރައްވަމުންދާއިރު، އެންމެފަހުން ކަނދުފަތި އަޅުއްވާފައިވަނީ ބ. ކަށިފުށީގެ ހުޅަނގުން 9 މޭލު ބޭރުންނާއި، ޅ. ފާދޫގެ އިރު އުތުރުން 10.25 މޭލު ބޭރުގައާއި، ޅ.ރަތްރުއް ހުރާގެ އިރުން 30 މޭލުގައި ބޭރުގައެވެ.

މިދިޔަ މާރޗްމަހުގެ ތެރޭގައިވެސް މިނިސްޓްރީން ވަނީ ގއ. ސ. އަދި ޏ އަތޮޅުގައި 4 ކަނދުފައްޗެއް އަޅާފައެވެ.

ކަނދުފަތި އެޅުއްވުމުގެ އިތުުރުން، ހަލާކުވެފައިވާ ކަނދުފަތިތައް މަރާމާތުކުރެއްވުމުގެ މަަސައްކަތްވެސް މިނިސްޓްރީން ދަނީ ކުރިއަށްގެންދަވަމުންނެވެ. އެގޮތުން ހއ އަތޮޅާއި ހދ. އަތޮޅުގައި އަޅާފައިވާ ކަނދުފަތިތައް އައު ކުރުމުގެ މަސައްކަތް ކުރިއަށްގެންދިއުމަށް ވަނީ ތާވަލުކޮށްފައެވެ.

ކަނދުފަތިތަކަކީ އޮއެވާލުގައި މަސް އަޅާ އުސޫލުން މަސައްކަތްކުރާ އެއްޗެކެވެ. އަދި ކަނދުފަތީގައި އަޅާ ހިޔަނީގެ ސަބަބުން، މަސް ކަނދުފަތީގެ ގާތަށް މަސް އައިސް، ކަނދުފަތީގެ ކައިރީގައި މަސްވެރިކަން ތިޔާގިވެއެވެ.

ފިޝަރީޒް މިނިސްޓްރީން ވަނީ މިހާތަނަށް ރާއްޖޭގެ އެކި ސަރަހައްދުތަކުގައި 100 އަށްވުރެ ގިނަ ވަދު ކަނދުފަތި ޤާއިމްކޮށްފައެވެ.