ފުރަތަމަ ފަހަރަށް ރާއްޖޭގައި ބާއްވާ "ތާނަވާ އަދަބީ ކާނިވަލް" ފަށައިފި

އަދަބީ ހަރަކާތްތަކާއި، އަދަބީ ކަންކަމާއި ގުޅޭ އުފެއްދުންތައް ދައްކާލުމަށް ބާއްވާ "ތާނަވާ" އަދަބީ ކާނިވާ ފަށައިފިއެވެ.

ދިވެހިބަހާއި އަދަބިއްޔާތަށް ލޯބި ކުރާ ފަރާތްތަކަށް ޚާއްސަކޮށްގެން ކުރިއަށްގެންދާ މި ކާނިވަލަކީ މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިންތިޒާމްކޮށްގެން ބިޒްނަސް ސެންޓަރ ކޯޕަރޭޝަނުން ބާއްވާ ކާނިވަލެކެވެ.

މި ކާނިވާ ފެށުމުގެގޮތުން ބޭއްވި ރަސްމިއްޔާތު ޝަރަވެރިކޮށްދެއްވައި، ކާނިވާ ހުޅުވައިދެއްވީ ދިވެހި ބަހާއި އަދަބިއްޔާތަށް ގިނަ ހިދުމަތްތަކެއް ކޮށްދެއްވާފައިވާ މަޑުލު މުޙައްމަދު ވަޙީދުއެވެ. މި ރަސްމިއްޔާތުގައި ދިވެހިބަހުގެ އެކެޑެމީގެ ރައީސް ޑރ. އަޝްރަފް ޢަބްދުއްރަޙީމާއި، ނިޝާން ޢިއްޒުއްދީނުގެ ޢިއްޒަތުގެ ވެރިޔާ ޢަބްދުއްރަޝީދު ޙުސައިންވެސް ބައިވެރިވެވަޑައިގެންނެވިއެވެ.

މި ކާނިވަލާއި ގުޅޭ ގޮތުން މަޢުލޫމާތު ދެއްވަމުން ބީސީސީގެ ޗީފް ކޮމާޝަލް އޮފިސަރ ސާމިހް އާދަމް ވިދާޅުވީ، ދެ ދުވަހުގެ މުއްދަތަކަށް ކުރިއަށްގެންދާ މި ކާނިވަލަކީ އަދަބާއި ވިޔަފާރި އާއި ގުޅުވާދޭ މަންސައެއްގެ ގޮތަށް ކުރިއަށްގެންދާ ކާނިވަލެއް ކަމަށެވެ. އެގޮތުން ދިވެހި އަދަބާއި ގުޅުންހުރި އެކި ހަރަކާތްތަކާއި ދިވެހި ސަޤާފަތާއި ގުޅޭ އެކި ފަންނުވެރިންގެ މަސައްކަތްތައް ކާނިވަލުން ފެނިގެންދާނެކަމަށްވެސް އޭނާ ވިދާޅުވިއެވެ. އަދި ކާނިވަލުގެ ނަމާއި ގުޅޭ ގޮތުން މަޢުލޫމާތު ދެއްވަމުން ސާމިހް ވިދާޅުވީ ތާނަވާގެ ނަން އައިސްފައިވަނީ ކާނިވާ އަދި ތާނަ، މި ދެ ލަފްޒު ގުޅުވައިލާގެން ކަމަށެވެ.

ސާމިހް ވިދާޅުވީ މި ކާނިވަލުގައި 30 ވަރަކަށް ސްޓޯލް ހުންނާނެކަމަށާއި، އެ ސްޓޯލްތަކުން އަދަބީ ފަންނާއި ގުޅޭ އުފެއްދުންތަކުގެ އިތުރުން، އެހެން ބައެއް ތަކެތިވެސް ލިބެން ހުންނާނެކަމަށެވެ. ދެ ދުވަހުގެ މުއްދަތަށް ކުރިއަށްދާ މި ކާނިވާ ހުޅުވާފައި ހުންނާނީ ހަވީރު 4:00 އިން 6:00 އަށް، އަދި ރޭގަނޑު 8:00 އިން 11:00 އަށް ހުޅުމާލެ ސެންޓްރަލް ޕާކުގައެވެ.

"ތާނަވާ"ގެ ނަމުގައި ކުރިއަށް ގެންދާ މި ކާނިވަލަކީ، މިފަދަ ގޮތަކަށް ދިވެހި އަދަބިއްޔާތާއި ސަޤާފަތާއި ގުޅޭ މަޢުޟޫއަކަށް ބިނާކޮށް، ރާއްޖޭގައި ބާއްވާ ފުރަތަމަ ކާނިވަލެވެ.