އަމީނީ މަގުގެ ބިލަބޮންގް ސްކޫލާ ހަމައަށް ތާރުއެޅުމުގެ މަސައްކަތް އަންނަ ބުރާސްފަތި ދުވަހު ކުރާނެކަމަށް ރޯޑް ޑިވެލޮޕްމަންޓް ކޯޕަރޭޝަން އާރްޑީސީން ހާމަކޮށްފިއެވެ. މިއީ އަމީނީ މަގުގައި ސްޓެލްކޯއިން ފަށައިގެން ބިލަބޮންގް ސްކޫލާ ހަމައަށް ހިމެނޭ ސަރަޙައްދެވެ.
އަމީނީ މަގުގެ މަސައްކަތް ކުރިއަށް ގެންދަނީ 13 ސެގްމަންޓަކަށް ބަހާލައިގެންނެވެ. މީގެތެރެއިން ފުރަތަމަ 3 ސެގްމަންޓްގައި ތާރުއެޅުމުގެ ހުރިހާ މަސައްކަތްތައް ނިންމައި، މިހާރު ދަނީ އެ ސަރަޙައްދު ބޭނުންކުރަމުންނެވެ.
މިމަގުގެ އިތުރު 4 ސެގްމަންޓެއްގެ މަސައްކަތް އެކުއެކީގައި ދަނީ ކުރަމުންނެވެ. އެއީ ސެގްމަންޓް 4،5،6،7 އެވެ. އެއީ މިހާރު ތާރު އަޅާފައިވާ ހިސާބުން ފެށިގެން ބިލަބޮންގް ސްކޫލާ ހަމައަށެވެ.
ރޯޑް ޑިވެލޮޕްމަންޓް ކޯޕަރޭޝަން އާރްޑީސީން ބުނީ، މަގުގައި ތާރުއެޅުން ފިޔަވައި ހުރިހާ މަސައްކަތެއް މިހާރު ގާތްގަނޑަކަށް ނިމިފައިވާ ކަމަށެވެ. އެގޮތުން ކޭބަލްއާއި ޕައިޕް ނެޓްވޯކްގެ މަސައްކަތްތަކާއި، ދުވާރާއި ފެން ހިންދާ ނިޒާމާއި ޖަންގްޝަންތަކުގެ މަސައްކަތް ވެސް ވަނީ ނިމިފައެވެ.
މަގުގައި ތާރުއެޅުމުގެ މަސައްކަތް ފެށުމަށް، މަގުގެ ފަސްގަނޑު ހަރުކުރުމުގެ މަސައްކަތް މިހާރު ފަށާފައިވާ ކަމަށް އާރްޑީސީން ބުނެއެވެ. އަދި ކުރިއަށް އޮތް 2 ދުވަހުގެ ތެރޭގައި، މަގުގައި ތާރު އެޅުމުގެ ކުރިން އަޅާ އޭބީސީ ލޭޔަރގެ މަސައްކަތް ވެސް ނިމޭނެކަމަށް އެ ކުންފުނިން ބުނެއެވެ.
ޕީއެސްއެމްއަށް މަޢުލޫމާތު ދެއްވަމުން އާރްޑީސީގެ މެނޭޖިން ޑިރެކްޓަރ މޫސާ ޢަލީ މަނިކު ވިދާޅުވީ، އަންނަ ބުރާސްފަތި ދުވަހު މަގުގައި ތާރު އަޅާނެކަމަށެވެ. މި 4 ސެގްމަންޓްގައި ތާރުއެޅުމުގެ މަސައްކަތް އެއް ދުވަހުން ނިންމާލެވޭނެއެވެ. ނަމަވެސް ޢާއްމުކޮށް މަގު ހުޅުވައިލާނީ، ޓްރެފިކް ނިޝާންތައް ހަރުކޮށް، ޓްރެފިކް ނިޝާންތައް ކުރަހާ ނިމުމުންނެވެ. އަދި މަގުގައި ލައިޓް ވެސް ހަރުކުރާނެއެވެ.
އަމީނީ މަގުގައި ބާކީ ހިމެނޭ 6 ސެގްމަންޓްގެ މަސައްކަތް ކުރިއަށްގެންދާނީ 3 ބަޔަކަށް ބަހާލައިގެނެވެ. އެގޮތުން ފުރަތަމަ ބައިގައި މަގު ރޫޅާލާނީ މާފަންނު ސްޓޭޑިއަމާ ހަމައަށެވެ. އެއަށްފަހު ޕްލޭނިން މިނިސްޓްރީއާ ހަމައަށް އަދި އޭގެ ފަހުން މަގުގެ ބާކީ ބައި އެއްކޮށް ނިންމާނެއެވެ.
އާރްޑީސީން ބުނީ މޫސުމާ ގުޅިގެން މަސައްކަތަށް ލަސްވާގޮތް ކުރިމަޔތިނުވާނަމަ އަންނަ އޮގަސްޓްމަހުގެ ނިޔަލަށް މުޅި އަމީނީ މަގުގެ މަސައްކަތް ނިންމާނެ ކަމަށެވެ.
އަމީނީ މަގުގެ މަސައްކަތުގައި އެންމެ ބޮޑު ގޮންޖެހުމަކަށްވީ މަގުގައި ހުރި ފެނާއި ނަރުދަމާއާއި އަދި މުއާޞަލާތީ ނެޓްވާރކްތައް ރަނގަޅުކޮށް މަސައްކަތް ކުރުމަށެވެ. މިއީ މާލޭ، ހުޅުލެ އަދި ހުޅުމާލެއަށް ވެސް ޚިދުމަތްދޭ މައި ނެޓްވޯކްތަކެވެ.
އަމީނީމަގު ޒަމާނީ ފެންވަރަށް ތަރައްޤީކުރުމުގެ މުޅި މަޝްރޫޢުގައި 1.79 ކިލޯމީޓަރުގެ މަގުގެ ސަރަޙައްދު ތަރައްޤީކުރެއެވެ. މި މަސައްކަތް ސަރުކާރުން ރޯޑް ޑިވެލޮޕްމަންޓް ކުންފުންޏާ ޙަވާލުކުރެއްވީ 84.4 މިލިޔަން ރުފިޔާއަށެވެ.