ރޭ ހުޅުމާލޭގައި ފުލުހަކަށް ޙަމަލާދީ މާރާމާރި ހިންގި މައްސަލައިގައި ހައްޔަރުކުރި 4 މީހުންގެ ބަންދުގެ މުއްދަތު ޖަހައިފިއެވެ.
ފުލުހުން ވިދާޅުވީ، ހުޅުމާލޭގައި ޙަމަލާދީފައިވަނީ ގަލޮޅު ޕޮލިސް ސްޓޭޝަންގެ ސަރޖަންޓްއަކަށްކަމަށެވެ. މި ފުލުސް މީހާއަށް ހަމަލާދިނުމުގައި ބައިވެރިވި 4 މީހުންވެސް، ރޭ ހުޅުމާލެގެ ފުލުހުން ކުރި މަސައްކަތުން ވަނީ އަތުލައިގެންފައެވެ.
ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރުކުރުމުން ވަނީ، އެންމެންގެ ބަންދަށްވެސް މުއްދަތު ޖަހާފައެވެ.
އެގޮތުން މައްސަލައިގައި ހައްޔަރުކުރި މީހުންގެ ތެރެއިން، 21 އަހަރުގެ މީހާގެ ބަންދަށް 15 ދުވަސް، 42 އަހަރާ 44 އަހަރުގެ މީހާގެ ބަންދަށް 7 ދުވަސް އަދި، 33 އަހަރުގެ މީހާގެ ބަންދަށް 5 ދުވަސްވަނީ ޖަހާފައެވެ.
މި ގްރޫޕުން ހަމަލާދިން ފުލުސް މީހާއަށް ލިބުނު ޒަޙަމްތަކަށް، ހުޅުމާލޭ ހޮސްޕިޓަލްގައި ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.
މި ހާދިސާގެ ސީ.ސީ.ޓީ.ވީ ފޫޓެޖްތައް ބަލާ، ޚާއްސަ އިސްކަމެއް ދީގެން މައްސަލަ ތަޙުޤީޤުކުރުމުގެ މަސައްކަތް ކުރަމުންދާކަމަށް ފުލުހުން ވަނީ ވިދާޅުވެފައެވެ. އެމީހާއަށް ހަމަލާދީފައި ވަނީ އެންމެން ދަންނަ ގޭންގަކުންކަމަށް ކޮމިޝަނަރ އޮފް ޕޮލިސް މުޙައްމަދު ޙާމީދު ވަނީ ވިދާޅުވެފައެވެ.