ޤައުމީ ޔުނިވަރސިޓީގެ ފެކަލްޓީ އޮފް އިސްލާމިކް ސްޓަޑީޒް އިން ޕީއެޗްޑީ ޕްރޮގްރާމް ފެށުމަށްޓަކައި މަސައްކަތްތައް ފަށާފައިވާކަމަށް އެފެކަލްޓީގެ ޑީން ވިދާޅުވެއްޖެއެވެ.
ފެކަލްޓީ އޮފް އިސްލާމިކް ސްޓަޑީޒްގެ ޑީން އައްޝައިޚް ޢަލީ ޒާހިރު ވިދާޅުވީ މަތީ ތަޢުލީމު ފޯރުކޮށްދޭ ފަރާތްތަކުގެ އަދަދު އިތުރުވަމުންދާއިރު މިކަމާއިގުޅިގެން ގިނަ މަސައްކަތްތަކެއް ކުރަންޖެހޭކަމަށެވެ. އެގޮތުން އެފެކަލްޓީ އިން މާސްޓަރސް ޑިގްރީގެ ކޯސްތައް ފަށާފައިވާކަން ފާހަގަކުރައްވާ، ދުރު ނޫން މުސްތަޤްބަލެއްގައި ޕީއެޗްޑީ ޕްރޮގްރާމް ފެށުމަކީ އުއްމީދެއްކަމުގައި ވިދާޅުވިއެވެ.
ޢަލީ ޒާހިރު ވިދާޅުވީ ޕީއެޗްޑީ ޕްރޮގްރާމް ފެށުމަށް ކަމާއިބެހޭ ފަރާތްތަކާއެކު ޚިޔާލުބަދަލުކޮށް މަސައްކަތްތަކެއް ކުރަމުންދާކަމަށެވެ. އަދި އެފެކަލްޓީ އިން ނިކުންނަ ކުދިންނަކީ ހަމައެކަނި ސެޓްފިކެޓް ހޯދާ، މުޖުތަމަޢަށް ނިކުންނަ ބައެއްގެ ބަދަލުގައި ފެންވަރު ރަގަޅު ތަޢުލީމެއް ފޯރުކޮށްދިނުމަށް މަސައްކަތްކުރަމުންދާކަމަށް އައްޝައިޚް ޢަލީ ޒާހިރު ވިދާޅުވިއެވެ.
ފެކަލްޓީ އޮފް އިސްލާމިކް ސްޓަޑީޒް އިން ސެޓްފިކެޓް ލެވެލް އިން ފެށިގެން މާސްޓަރސް ޑިގްރީ ފެންވަރުގެ ކޯސްތައް ދަނީ ހިންގަމުންނެވެ. އެފެކަލްޓީގެ ގިނަ ކޯސްތަކެއް ދަނީ އަތޮޅުތަކުގައި ހުންނަ ޔުނިވަރސިޓީގެ ކެމްޕަސްތަކުގައި ހިންގަމުންނެވެ.